নেহা ধুপীয়া আৰু অংগদ বেদীৰ বিয়াত কি কৰিছিল কৰণ জোহৰে? প্ৰেমৰ দিৱসৰ দিনা জনালে তাৰকা দম্পতীহালে!

নেহা আৰু অংগদৰ প্ৰেম কাহিনী অনুৰাগীসকলৰ বাবে জ্ঞাত। কিন্তু ভেলেণ্টাইন ডে’ৰ প্ৰাকক্ষণতে এই সন্দৰ্ভত নতুন তথ্য প্ৰকাশ কৰিছে দম্পতীহালে। কেনেকৈ লগ পাইছিল দুয়ো দুয়োকে? প্ৰেমৰ আৰম্ভণি কেনেকৈ হৈছিল?

দম্পতীহালৰ প্ৰেমৰ আঁৰত কৰণ জোহৰ আছিল। নেহাই কয়, “যেতিয়া আমি প্ৰথম লগ পাইছিলো, তেতিয়া মোৰ সম্পৰ্ক আছিল আন এজন ব্যক্তিৰ সৈতে। আনহাতে অংগদে ইটোৰ পিছত সিটো সম্পৰ্ক সলনি কৰি আছিল।’’

এবাৰ নেহাই অংগদক এটা হাউচ পাৰ্টিলৈ মাতিছিল। অংগদে কয় যে তাতেই তেওঁ নেহাৰ স’তে পৰিচয় হ’ল। নেহাৰ ভাষাত "আমাৰ প্ৰেমৰ আঁৰত সঁচাকৈয়েই এজনে প্ৰাচীন গ্ৰীক প্ৰেমৰ দেৱতা কিউপিডৰ ভূমিকা লৈছিল।" নেহাই এইদৰে কোৱাৰ পাছতে অংগদে জনায় যে কৰণ জোহৰে সেই পাৰ্টিটোতে নেহাক কৈছিল যে সন্মুখত থিয় হৈ থকা ল’ৰাটোৰ লগত আপোনাৰ কেমিষ্ট্ৰী জমি উঠিব পাৰে। গতিকে তেওঁৰ বিষয়ে কিছু চিন্তাভাৱনা কৰা।''

ইয়াৰ পিছত কি হ'ল অনুৰাগীসকলে জানে। ২০১৮ চনত দিল্লীৰ এখন গুৰদ্বাৰাত অংগদ আৰু নেহা বিবাহপাশত আবদ্ধ হয়। এইবাৰ প্ৰথমবাৰৰ বাবে দুয়ো এখন কমেডী ছবিত দম্পতী হিচাপে অভিনয় কৰিছে। চেতন ভগতে লিখা কাহিনীৰ আধাৰত ছবিখনৰ শ্বুটিং ইতিমধ্যে আৰম্ভ হৈছে।