কন্যা আদিৰাৰ জন্মৰ পাছতে দুঃশ্চিতাৰ মাজত কটাইছিল ৰাণী মূখাৰ্জীয়ে! কিয়? ক’লে অভিনেত্ৰীগৰাকীয়ে

শেহতীয়া ছবি ‘মিচেছ চেটাৰ্জী বনাম নৰৱে’ৰ প্ৰচাৰ চলোৱাত ব্যস্ত হৈ পৰিছে ৰাণীয়ে। ছবিখনৰ উপৰিও অভিনেত্ৰীগৰাকীয়ে কৰীনা কাপুৰ খানৰ স’তে হোৱা এটা প্ৰচাৰমূলক অনুষ্ঠানত মাতৃত্বৰ বিষয়ে মুকলি আড্ডা মাৰিছিল। ৰাণীয়ে ক’লে, “মাতৃ হোৱাৰ পিছত যিকোনো নাৰীৰ পৰিৱৰ্তন ঘটে। আচলতে আদিৰাৰ জন্ম নিৰ্ধাৰিত সময়ৰ দুমাহ আগতেই হৈছিল। সেই সময়ত তাইক ২৪ ঘণ্টীয়া পৰ্যবেক্ষণৰ অধীনত ৰখা হৈছিল।''

কন্যাৰ সৈতে থকা সেই কঠিন সময়খিনিৰ কথা মনত পেলাই ৰাণীয়ে কয়, ''আচলতে তাইৰ শৰীৰটোও আন শিশুৰ তুলনাত অতি সৰু আছিল। সেয়ে তেওঁক স্পৰ্শ কৰিবলৈ ভয় লাগিছিল। সেই সময়ছোৱাত প্ৰতিটো দিন মোৰ উদ্বিগ্নতাত পাৰ হৈছিল।’’

'মৰ্দানী ২'ৰ পিছত ৰাণীয়ে যথেষ্ট বিৰতি লৈছিল। 'মিচেছ চেটাৰ্জী বনাম নৰৱে' ছবিত ৰাণীৰ অভিনয়ক দৰ্শক আৰু সমালোচকে যথেষ্ট শলাগিছে।