পুনৰ জিলিকিল আদিল হুছেইন! লণ্ডনত অনুষ্ঠিত 'ইউ কে ইণ্ডিয়ান ফিল্ম ফেষ্টিভেল'ত' শ্ৰেষ্ঠ অভিনেতাৰ সন্মান লাভ

উল্লেখ্য যে ১৩ মে'ত আদিল হুছেইন অভিনীত বলীউডৰ ছবিখনৰ 'ইউ কে ইণ্ডিয়ান ফিল্ম ফেষ্টিভেল'ত প্ৰিমিয়াৰ হৈছিল৷ ছবিখন পৰিচালনা কৰিছে নাটালিয়া শ্যামে। ব্ৰিটেইনলৈ হোৱা অনুপ্ৰৱেশ আৰু প্ৰৱজনকাৰীসকলে ব্ৰিটেইনত সন্মুখীন হোৱা নানা সমস্যাক বিষয়বস্তু হিচাবে লৈ ছবিখনৰ কাহিনীভাগ আগবঢ়াই নিয়া হৈছে৷ ব্ৰিটেইনত অনুপ্ৰৱেশ কৰাৰ পাচত এগৰাকী পিতৃয়ে নিজ সন্তানক হেৰুৱাৰ কৰুণ কাহিনীৰ লগতে সন্তানৰ সন্ধান কৰাৰ বৰ্ণনা কৰা হৈছে ছবিখনত৷

এই ছবিখনতে এক গুৰুত্বপূৰ্ণ চৰিত্ৰ ৰূপায়ণ কৰিছে আদিল হুছেইনে৷ আদিল হুছেইনৰ অভিনয়ৰ প্ৰশংসত পঞ্চমুখ হৈ পৰিছে চিনেপ্ৰেমীসকল। মন কৰিবলগীয়া যে, 'ফুটপ্ৰিণ্টছ্ অন ৱাটাৰ' ছবিখনে ইয়াৰ পূৰ্বে নিউয়ৰ্কত অনুষ্ঠিত ইণ্ডিয়ান ফিল্ম ফেষ্টিভেলত পৰিচালকৰ প্ৰথম ছবিৰ শিতানত শ্ৰেষ্ঠ ছবি হিচাবেও পুৰস্কৃত হৈছিল। উক্ত ছবি মহোৎসৱতো আদিল হুছেইনে শ্ৰেষ্ঠ অভিনেতাৰ বাবে মনোনয়ন লাভ কৰিছিল। আদিল হুছেইনৰ এই সাফল্যত উৎফুল্লিত হৈ পৰিছে অসমবাসী।