হতাশ নহ’ব! হেমা মালিনীকো পৰিচালকে ৰিজেক্ট কৰিছিল; ৪ বছৰ বহি আছিল

১৯৬১ চনত হেমাই প্ৰথমবাৰৰ বাবে তামিল ছবিত অভিনয় কৰাৰ প্ৰস্তাৱ পাইছিল। হেমাই অভিনয় আৰম্ভ কৰাৰ লগে লগে ছবিখনৰ পৰিচালকে তেওঁক নাকচ কৰি কয় যে তেওঁ বহুত ক্ষীণ আৰু তেওঁ কেতিয়াও নায়িকা হ’ব নোৱাৰে। ইয়াৰ লগতে পৰিচালকজনে কয় যে হেমাৰ গাত নায়িকাসুলভ কোনো গুণ নাই, গতিকে তেওঁ এইখন ক্ষেত্ৰত অহা উচিত নহয়। 

হেমা আৰু তেওঁৰ মাতৃৰ এই কথাত গভীৰ দুখ লাগিছিল যদিও হেমা এটা কথাত সুখী আছিল যে তেওঁ আৰু চিনেমাত কাম কৰিব নালাগে। হেমাক অভিনেত্ৰী হিচাপে গঢ় দিয়াত মাতৃৰহে আগ্ৰহ আছিল, হেমাৰ নাছিল। কিন্তু এইবোৰ কথাৰ বাবে মাতৃক দুখী দেখি হেমাৰ দুখ লাগে আৰু মনতে তেওঁ সিদ্ধান্ত ল’লে যে চিনেমাত অভিনয় কৰি মাতৃক সুখী কৰি তুলিব।

ইয়াৰ পিছত তেওঁ বহু তামিল ছবিত সৰু সৰু চৰিত্ৰত অভিনয় কৰিবলৈ আৰম্ভ কৰে। প্ৰায় ৪ বছৰে তেওঁ ৰিজেক্ট হয় আৰু কেতিয়াবা কিছুমান সৰু সৰু চৰিত্ৰত অভিনয় কৰাৰ সুযোগ পায়। অৱশেষত ৰাজ কাপুৰৰ ছবি 'সপ্নো কে সৌদাগৰ'ৰ জৰিয়তে হেমাই নায়িকা হিচাপে আত্মপ্ৰকাশ কৰাৰ সুযোগ পালে। ৰাজ কাপুৰৰ এই ছবিখনৰ পিছত হেমাই কেতিয়াও পিছলৈ ঘূৰি চাবলগীয়া নহ'ল আৰু ড্ৰীম গাৰ্ল হৈ বলীউডত আধিপত্য বিস্তাৰ কৰিলে। 'শ্বোলে', 'সীতা ঔৰ গীতা', 'সত্তে পে সত্তা',  আদি বহু হিট ছবিত অভিনয় কৰি উজলি উঠে হেমা মালিনী। হেমা মালিনীৰ স্থান এতিয়া ক'ত, সেয়া নিশ্চয়কৈ নতুনকৈ কোৱাৰ প্ৰয়োজন নাই।