কন্যা আলিয়া মাতৃ হোৱাৰ পথত! ককাক হোৱাৰ আনন্দত আৱেগিক হৈ পৰিল কৰণ জোহৰ

এনে অৱস্থাত ককাক হোৱাৰ আনন্দত আৱেগিক হৈ পৰিছে চলচ্চিত্ৰ নিৰ্মাতা কৰণ জোহৰ। আচলতে কৰণ জোহৰে আলিয়া ভাটক নিজৰ কন্যা আৰু ৰণবীৰ কাপুৰক জোঁৱাই বুলি গণ্য কৰে। আলিয়াই সুখবৰটো ঘোষণা কৰাৰ লগে লগে কৰণ জোহৰে কমেণ্ট ছেকচনত অভিনন্দন জনাই লিখিছে, ‘মোৰ বুকুৰ ঢপঢপনি বৃদ্ধি পাইছে।’ ইয়াৰ লগতে ৰণবীৰ-আলিয়াৰ বিয়াৰ ফটো ইনষ্টাগ্ৰামত শ্বেয়াৰ কৰি কৰণ জোহৰে লিখিছে, ‘‘এওঁলোকক বহুত ভালপাওঁ! মোৰ ছোৱালীজনী এতিয়া মাতৃ হ’বলৈ ওলাইছে! এই অনুভৱ মই প্ৰকাশ কৰিব নোৱাৰো... বহুত এক্সাইটেড হৈ আছোঁ। দুয়োকে বহুত মৰম।’’

উল্লেখ্য যে বিবাহৰ দুমাহৰ পাছত বলীউডৰ তাৰকা ৰণবীৰ কাপুৰ আৰু আলিয়া ভাটে অনুৰাগীসকলৰ সৈতে এই সুখবৰটো শ্বেয়াৰ কৰিছে। ছ'চিয়েল মিডিয়াত এটা বিশেষ পোষ্ট কৰি আগন্তুক সন্তানটিৰ কথা ঘোষণা কৰিছে আলিয়াই। আলিয়াই চিকিৎসালয়ৰ ভিতৰৰ পৰা দুখন ফটো শ্বেয়াৰ কৰি লিখিছে- 'Our baby….. coming soon'। ফটোখনত আলিয়াৰ সৈতে ৰণবীৰ কাপুৰকো দেখা গৈছে। দুয়োজনে ডিছপ্লেত নিজৰ আগন্তুক কেঁচুৱাটোৰ আভাস চাই আছে। এই সময়ত আলিয়াৰ মুখত এটা অতি মৰমলগা হাঁহি দেখিবলৈ পোৱা গৈছে।আনখন ফটোত দেখা গৈছে এহাল সিংহ-সিংহনী আৰু সিহঁতৰ এটা মৰমলগা পোৱালি।

দীৰ্ঘদিনীয়া প্ৰেমৰ অন্তত ২০২২ চনৰ এপ্ৰিল মাহত বিবাহপাশত আবদ্ধ হৈছিল ৰণবীৰ কাপুৰ আৰু আলিয়া ভাট। বিবাহৰ দুমাহৰ পাছতেই এটি দেৱশিশুক আদৰাৰ প্ৰস্তুতিত এতিয়া ব্যস্ত হৈ পৰিছে আলিয়া আৰু ৰণবীৰ। অহা ছেপ্তেম্বৰ মাহত ৰণবীৰ আৰু আলিয়াক একেলগে দেখিবলৈ পোৱা যাব বিগ বাজেটৰ ছবি 'ব্ৰহ্মাস্ত্ৰ'ত। দুয়ো একেলগে অভিনয় কৰা এইখনেই প্ৰথম ছবি। এই ছবিখনক লৈও ব্যগ্ৰ হৈ পৰিছে ৰণবীৰ-আলিয়াৰ লগতে তেওঁলোকৰ অনুৰাগীসকল।