মুক্তি পালে দুটি ব্যতিক্ৰমী গীত! ইমন-অনুভূতিৰ 'সখীয়া ৰবে নীৰৱে' আৰু 'পুৰণি সেই দিনৰ কথা'

প্ৰতি বছৰে  ৯মে'ত সমগ্ৰ ভাৰতবৰ্ষত ৰবীন্দ্ৰ জয়ন্তী উদযাপন কৰা হয়। এই দিনটোৰ লগত সংগতি ৰাখিয়েই গীত দুটি মুক্তি দিয়া হয় । দুয়োটি গীততেই কণ্ঠদান কৰিছে অনুভূতি কাকতি গোস্বামীয়ে। সংগীত পৰিচালনা কৰিছে ইমন সেউজ গোস্বামীয়ে।  'সখীয়া ৰবে নীৰৱে' গীতটিত অনুভূতিৰ লগত কণ্ঠদান কৰিছে উদীয়মান শিল্পী জোনাকী মনে। 

ৰূপকোঁৱৰ জ্যোতিপ্ৰসাদ আগৰৱালাদেৱৰ গীত 'আমাৰে সখীয়া' আৰু কবিগুৰু ৰবীন্দ্ৰ নাথ ঠাকুৰৰ গীত 'তুমি ৰবে নীৰৱে' - দুটি গীতৰ সংমিশ্ৰণ কৰি এটি নতুন সংগীতৰ সৃষ্টি কৰিবলৈ চেষ্টা কৰা বুলি জনালে পৰিচালক ইমন সেউজ গোস্বামীয়ে। সেউজ অনুভূতিৰ যুটীয়া প্ৰচেষ্টাত কৰা দ্বিতীয় গীতটি ক'লকাতাৰ এম এছ টি নামৰ ইউটিউব চেনেলটিয়ে মুকলি কৰিছে। 

গীতটিৰ নাম 'পুৰণি সেই দিনৰ কথা'। কবিগুৰু ৰবীন্দ্ৰনাথ ঠাকুৰৰ অতি জনপ্ৰিয় 'পুৰানো সেই দিনেৰ কথা' গীতটি অনুবাদ কৰিছে যোৰহাট নিবাসী অনুভূতিৰ পিতৃ শ্ৰীযুত দ্বিপেন কাকতিয়ে। গীতটিক ৰাগ কেদাৰৰ এটি বন্দিছৰ লগত সংমিশ্ৰণ কৰা হৈছে। দুয়োটি গীতকে তবলাৰে সজাইছে নিলোৎপল সিঙে। 'সখীয়া ৰবে নীৰৱে' গীতটিত সংযোজিত হৈ থকা বাকী শিল্পীসকলৰ নাম হ'ল, শুভংকৰ হাজৰিকা (চেতাৰ) আৰু জগদীশ নাথ (গীটাৰ)। 

গীতটিৰ ভিডিঅ' পৰিচালনা আৰু সম্পাদনা কৰিছে অম্বৰীশ বৰকটকীয়ে। চিত্ৰ পৰিচালনাত তেখেতক সহযোগ কৰিছে ক্ৰমে শিৱম ৰয়, বিকি দাস আৰু বিকাশ ডেকাই। পুৰণি সেই দিনৰ কথা গীতটিৰ লিৰিকেল ভিদিঅ' তৈয়াৰ কৰি উলিয়ালে মৰাণ নিৱাসী মুন ৰংপিয়ে। গীতটি সকলোৱে আদৰি ল'ব বুলি আশাবাদী গীত দুটিৰ সৈতে জড়িত প্ৰতিজন কলা-কুশলী।