সুস্মিতাই যাক বাচি লৈছে নিশ্চয় তেওঁ যোগ্য! ললিত-সুস্মিতাৰ প্ৰেমক লৈ এনেদৰে ক'লে প্ৰাক্তন প্ৰেমিকে

ললিত মোদীয়ে ছ’চিয়েল মিডিয়াত নিজৰ সম্পৰ্কৰ কথা ঘোষণা কৰিছে। কিন্তু এতিয়ালৈকে এই সন্দৰ্ভত সুস্মিতা সেনে কোনো প্ৰতিক্ৰিয়া প্ৰকাশ কৰা নাই। অৱশ্যে দুয়োৰে ছবিয়ে নিশ্চিতভাৱে তেওঁলোকৰ সুদৃঢ় সম্পৰ্কৰ সাক্ষ্য বহন কৰিছে। সুস্মিতা সেন আৰু ললিত মোদীৰ মৰমলগা ছবিবোৰে যে সকলোকে আচৰিত কৰি তুলিছে তাত কোনো সন্দেহ নাই। কিছুমানে এয়া চাঞ্চল্যকৰ খবৰ বুলিও অভিহিত কৰিছে। কিন্তু সুস্মিতাৰ প্ৰাক্তন প্ৰেমিক ৰোহমানৰ বাবে এই খবৰটো একেবাৰেই চাঞ্চল্যকৰ নহয়।

 ৰোহমান শ্বলেই সুস্মিতাৰ প্ৰসংগত কয়, ''তেওঁলোক সুখী হওক। প্ৰেম সুন্দৰ। মই ইমানখিনি জানো যে তেওঁ যদি কাৰোবাক বাছি লৈছে, তেন্তে নিশ্চয়কৈ তেওঁ তাৰ যোগ্য। ইয়াৰ উপৰিও ৰোহমানে ইনষ্টাগ্ৰামত এটা পোষ্ট শ্বেয়াৰ কৰিছে। পোষ্টটোত ৰোহমানে লিখিছে, কাৰোবাক হাঁহিলে যদি সকাহ পায়, তেন্তে হাঁহক, কাৰণ অস্থিৰ তেওঁ নহয়..আপুনি হে। প্ৰেম বিয়পাওক..ঘৃণা নহয়।'' অৰ্থাৎ ললিত মোদীৰ লগত নিজৰ প্ৰাক্তন প্ৰেয়সীক দেখি ৰোহমান যে অলপো বিচলিত হোৱা নাই তেওঁৰ কথাই তাকেই প্ৰমাণ কৰে।

উল্লেখ্য যে সুস্মিতা সেনে নিজতকৈ ১৬ বছৰৰ সৰু ৰোহমন শ্বলৰ সৈতে প্ৰেম-ৰোমাঞ্চ কৰি সকলোৰে দৃষ্টি আকৰ্ষণ কৰিছিল। দুয়োৰে বিয়া হোৱাৰো কথা আছিল কিন্তু হঠাতে দুয়োৰে সম্পৰ্কত ফাঁট মেলে। ২০১৮ চনত দুয়োজনে ইজনে সিজনৰ লগত ডেটিং আৰম্ভ কৰিছিল। ২০২১ চনৰ ২৩ ডিচেম্বৰত দুয়ো পৃথক হৈ পৰে। সুস্মিতা আৰু ৰোহমান আজিও বন্ধু। ললিত মোদীৰ আগমনৰ পিছত তেওঁলোকৰ বন্ধুত্ব কিমান দিনলৈ থাকে সেয়াহে এতিয়া একো ক’ব পৰা নাযাব।