ডিজিটেল ডেস্কঃ পদিনা অসমীয়া সমাজত অতি জনপ্ৰিয়। পদিনাৰ চাট্নি বেয়া পোৱা মানুহ হয়তো নায়েই৷ বিশেষকৈ কেঁচা আমৰ লগত পদিনাৰ চাট্নিৰ সোৱাদ অতুলনীয়৷ বহু মানুহে চাহ, চৰ্বত আদিতো পদিনা পাত ব্যৱহাৰ কৰে। পদিনা এবিধ বাৰমহীয়া সুগন্ধিযুক্ত বনৌষধি। ই যে অকল সোৱাদবিশিষ্ট তেনে নহয়, পদিনাৰ আছে বহুতো ঔষধি গুণ৷ ইয়াক ঠাইবিশেষে পদুনা নামেৰেও জনা যায়৷ ইয়াৰ বৈজ্ঞানিক নাম মেন্থা স্পাইকেটা ( Mentha spicata )৷ পদিনা সহজতে আমাৰ বাৰীত পোৱা যায়।
সুস্বাস্থ্যৰ বাবে পদিনা কিমান উপকাৰী জানো আহক
১)পদিনাত পোৱা পটাচিয়ামে ৰক্তচাপ নিয়মীয়া কৰি ৰখাত সহায় কৰে৷
২)পদিনাৰ পাত চোবাই খালে দাঁতৰ বিষ, দাঁতৰ আলুৰ পৰা তেজ ওলোৱা, পায়'ৰিয়া আদি ৰোগৰ পৰা পৰিত্ৰাণ পাব পাৰি।
৩)পদিনাৰ ৪-৫ টা পাত লৈ পানীত উতলাৱক আৰু সেই পানী মুখত লৈ কুলকুলি কৰিলে মুখৰ দুৰ্গন্ধ আঁতৰ হয়।
৪)পদিনাৰ পাত মিহলাই তৈয়াৰ কৰা চাহ খালে ছালৰ বিকাৰ আৰু পেটৰ সকলো সমস্যা নাশ হয়।
৫) পদিনাৰ ৰস ঘৰৰ চাৰিওফালে ছটিয়ালে মহ, মাখি, পৰুৱা আদি পলাই যায়।
৬) পদিনাই তেজ পৰিষ্কাৰ কৰে আৰু ৰক্তসঞ্চালন ক্ৰিয়া মজবুত কৰে৷
৭)পদিনাৰ পাত পিহি তাৰ প্ৰলেপ মুখত লগালে বা তাৰ ভাপ ললে শালমইনা, বিভিন্ন দাগ,মুখত পৰা বৰ্ধিত বয়সৰ চাপ আদি নোহোৱা হয়।
৮) হঠাতে পেট বিষ হলে পদিনাৰ সজীৱ ৰসৰ লগত আদা আৰু সৈন্ধৱ লৱণ মিহলাই সেৱন কৰিলে লাভ হয়।
৯) যদি কাহ হয়,তেন্তে পদিনা মিহলাই তৈয়াৰ কৰা চাহৰ লগত অকণমান নিমখ দি খালে আৰাম পোৱা যায়।
১০)পদিনাৰ পাতৰ সজীৱ ৰস ক্ষয়ৰোগ,এজমা আৰু শ্বাস-প্ৰশ্বাস সম্বন্ধীয় ৰোগত উপকাৰী।
১১)পদিনাৰ ৰসৰ সৈতে মৌজোল মিহলাই সেৱন কৰিলে চৰ্দি,পানীলগা,জ্বৰ আদি ৰোগ উপশম হয়। লগতে নিমুনিয়াৰ দ্বাৰা দেখা দিয়া লক্ষণসমূহো নষ্ট হৈ যায়।
১২)পদিনাত যথেষ্ট এণ্টিঅক্সিডেণ্ট থকাৰ বাবে শৰীৰৰ ৰোগ প্ৰতিৰোধ ক্ষমতা বৰ্তাই ৰাখে৷
১৩) পদিনা সেৱনে মহিলাৰ অনিয়মিত ঋতুস্ৰাৱৰ সমস্যা দূৰ কৰে৷
১৪) প্ৰস্ৰাৱ জ্বলা-পোৰা কৰা, কমকৈ প্ৰস্ৰাৱ হোৱা, মূত্ৰনলীৰ সংক্ৰমণ দূৰ কৰাত পদিনাৰ চৰবত উপযোগী৷
১৫)কৃমি হ’লে ৰাতিপুৱা খালী পেটত পদিনাৰ ৰস গৰম পানীৰ লগত মিহলাই খাব লাগে৷
১৬)বিছাই ডাকিলে পদিনাৰ পাত মোহাৰি বিছা লগা স্থানত ঘহিলে বিষ উপশম হয়৷
গতিকে এনে অনেক ঔষধি গুণৰ অধিকাৰী পদিনা আমি নিময়িতভাৱে সেৱন কৰি নিজক সুস্বাস্থ্যৱান আৰু ৰোগমুক্ত কৰি ৰাখো আহক৷
Leave A Comment