ইজৰাইলৰ নীতি কিয় সলনি কৰিলে মোদীয়ে?৪৬ বছৰ পুৰণি বাজপেয়ীৰ ভাষণ এইবাৰ চৰ্চাত

শনিবাৰে বিয়লি ইজৰাইলৰ বায়ুসেনাই নিৰ্বিচাৰে গাজাৰ নিঃসামৰিক অঞ্চলত বোমাবৰ্ষণ কৰাৰ সময়তে পশ্চিম এছিয়াৰ প্ৰতি নতুন দিল্লীৰ দীৰ্ঘদিনীয়া কূটনৈতিক ভাৰসাম্য নীতিৰ পৰা আঁতৰি আহি প্ৰধানমন্ত্ৰী মোদীয়ে ৰাজহুৱাভাৱে ইজৰাইলক সমৰ্থন কৰে। ইয়াৰ পাছতে প্রধানমন্ত্রীৰ এই স্থিতি সন্দর্ভত ৰাজনৈতিক মহলত বিভিন্ন প্রশ্ন উত্থাপন হৈছে৷ ছচিয়েল মিডিয়াতো প্ৰশ্ন উত্থাপন হৈছে।আৰু মোদীৰ এই স্থিতি সলনিৰ আঁৰৰ কাৰণটো ছ’চিয়েল মিডিয়াত ভাইৰেল হৈ পৰিছে, ১৯৭৭ চনৰ লোকসভা নিৰ্বাচনৰ পূৰ্বে, দিল্লীত এখন সভাত তদানীন্তন জনতা পাৰ্টিৰ নেতা বাজপেয়ীৰ ভাষণ।

সেই ভাষণত বাজপেয়ীয়ে ইজৰাইলে পেলেষ্টাইন, লেবানন, ছিৰিয়াৰ ভূখণ্ড দখল কৰাটো স্পষ্টভাৱে গৰিহণা দিছিল। তেওঁ কয়, ‘ইজৰাইলে দখল কৰা আৰব ভূমি খালী কৰিব লাগিব।’ তেওঁৰ দলৰ প্ৰধানমন্ত্ৰী হিচাপে তেওঁৰ দলৰ উত্তৰাধিকাৰী মোদীয়ে ভাৰতৰ সাড়ে সাত দশকৰ কূটনৈতিক স্থিতি সলনি কৰি পেলেষ্টাইনৰ গাজাৰ ভূখণ্ডত ইজৰাইলৰ আগ্ৰাসনক বৈধতা প্ৰদান কৰিলে, ছ’চিয়েল মিডিয়াত উত্থাপন হৈছে।

দিল্লী ৰেলীত দিয়া সেই ভাষণত তেওঁ পশ্চিম এছিয়াত স্থায়ী শান্তি প্ৰতিষ্ঠাৰ উদ্দেশ্যে ইজৰাইলক স্বীকৃতি দিয়াৰ উপৰিও পেলেষ্টাইনী জনসাধাৰণৰ অধিকাৰ প্ৰতিষ্ঠা কৰাত গুৰুত্ব আৰোপ কৰিছিল। লগতে কংগ্ৰেছক পৰাস্ত কৰি জনতা পাৰ্টীয়ে কেন্দ্ৰত ক্ষমতালৈ আহিলেও নতুন দিল্লীৰ কূটনৈতিক স্থিতি সলনি নহ’ব বুলিও প্ৰতিশ্ৰুতি দিয়ে।

১৯৭৭ চনৰ লোকসভা নিৰ্বাচনত ইন্দিৰা গান্ধীৰ কংগ্ৰেছক পৰাস্ত কৰি জনতা পাৰ্টী ক্ষমতালৈ আহে। প্ৰধানমন্ত্ৰী মোৰাৰজী দেশাইৰ চৰকাৰত বৈদেশিক মন্ত্ৰীৰ দায়িত্ব গ্ৰহণ কৰি বাজপেয়ীয়ে সেই প্ৰতিশ্ৰুতি পূৰণ কৰিছিল। তেওঁ নিজৰ গৃহভূমি হেৰুৱা পেলেষ্টাইনী জনসাধাৰণৰ পক্ষত দৃঢ়তাৰে থিয় দিছিল। ছ’চিয়েল মিডিয়াত প্ৰশ্ন, চাৰি দশকৰ পাছত কিয় নিজৰ দলৰ মোদীয়ে নিজৰ স্থিতি সলনি কৰিলে?