এইবাৰ তালিবানৰ আক্ৰমণৰ লক্ষ্য মুম্বাই! ইমেইল যোগে এনআইএৰ কাৰ্যালয়লৈ ভাবুকি, সতৰ্কতা বৃদ্ধি

এই ইমেইল পোহৰলৈ অহাৰ পিছত সতৰ্কতামূলক ব্যৱস্থা হিচাপে সমগ্ৰ মুম্বাইত নিৰাপত্তা অধিক শক্তিশালী কৰা হৈছে। বাণিজ্য মহানগৰীৰ গুৰুত্বপূৰ্ণ স্থানত বৃদ্ধি কৰা হৈছে আৰক্ষী বাহিনী। ৰে’ল ষ্টেচন আৰু বাছ টাৰ্মিনাছতো চোৰাংচোৱাগিৰি বৃদ্ধি কৰা হৈছে। ইফালে, আৰক্ষীয়ে জনোৱা মতে, চাইবাৰ চেলে ইমেইল প্ৰেৰকজনৰ আই পি ঠিকনা অনুসৰণ কৰিছে। জানিব পৰা মতে পাকিস্তানৰ পৰা এই ভাবুকি মেইল ​​প্ৰেৰণ কৰা হৈছে।

আৰক্ষী বিষয়াসকলে কয় যে এই ভাবুকি দিয়া মেইল ​​সঠিকভাৱে ক’ৰ পৰা প্ৰেৰণ কৰা হৈছে সেই সন্দৰ্ভত বিষয়টো অধিক তদন্ত চলি আছে। অৱশ্যে কোনোবাই ইচ্ছাকৃতভাৱে এনে মেইল ​​প্ৰেৰণ কৰি আতংক সৃষ্টি কৰাৰ সন্দেহ কৰিছে আৰক্ষীয়ে। আৰক্ষীৰ মতে, ইয়াৰ পূৰ্বেও কেইবাবাৰো এনে ভাবুকি ই-মেইল আহিছে। কিন্তু এইবাৰ এনআইএৰ কাৰ্যালয়লৈ ভাবুকি মেইল ​​প্ৰেৰণ কৰাৰ ফলত ৰাজ্যৰ আৰক্ষী অধিক সতৰ্ক হৈ পৰিছে।

প্ৰসংগক্ৰমে কিছুদিন পূৰ্বে কেন্দ্ৰীয় মন্ত্ৰী নীতিন গাডকাৰীয়ে ধন উলিয়াবলৈ দাবী জনাই ভাবুকিপূৰ্ণ ফোন আহিছিল। ১৪ জানুৱাৰীত তেওঁৰ কাৰ্যালয়লৈ আহিছিল উক্ত ফোনটো। বৃহৎ পৰিমাণৰ প টকা দাবী কৰা হৈছিল। শনিবাৰে নীতিন গাডকাৰীৰ কাৰ্যালয়ত বাৰে বাৰে ভাবুকিমূলক টেলিফোন কল আহিছিল। কেন্দ্ৰীয় মন্ত্ৰীগৰাকীৰ পৰা ধন বিচৰাৰ অভিযোগো উত্থাপন হৈছে। সূত্ৰ অনুসৰি এই ঘটনাত ফোন কৰা ব্যক্তিজনে নিজকে ডি কোম্পানী অৰ্থাৎ দাউদ ইব্ৰাহিমৰ গেঙৰ সদস্য বুলি দাবী কৰে। লগতে আৰক্ষীয়ে কেন্দ্ৰীয় মন্ত্ৰীৰ পৰা প্ৰায় ১০০ কোটি টকা বিচৰা বুলিও জানিবলৈ দিয়ে।

উল্লেখযোগ্য যে শেহতীয়াকৈ পাকিস্তানৰ ফেডাৰেল ইনভেষ্টিগেশ্যন এজেন্সীৰ মুৰব্বীগৰাকীয়ে ভাৰত ভ্ৰমণ কৰিছিল। তেওঁক দাউদ আৰু হাফিজ ছাইদৰ বিষয়ে সোধা-পোছা কৰা হৈছিল। তেওঁ উত্তৰ দিবলৈ অস্বীকাৰ কৰিলে।