গান শুনাৰ চখ! ৰেডিঅ’ বুলি ভাবি আৰক্ষীৰ ৱায়াৰলেচ চেট চুৰ কৰিলে ই-ৰিক্সা চালকে

ঘটনাটো প্ৰয়াগৰাজ জংচনত নিৰ্মিত জি আৰ পি ষ্টেচনৰ সৈতে জড়িত। ১ নম্বৰ প্লেটফৰ্মত কনিষ্টবল বিপিন কুমাৰ ভাৰতী কৰ্তব্যৰত আছিল।১ নম্বৰ প্লেটফৰ্মত নিৰ্মিত মন্দিৰৰ ওচৰৰ প্লেটফৰ্মত বিপিন কুমাৰ বহি আছিল, তেতিয়াই তেওঁ টোপনি গ’ল। সাৰ পোৱাৰ লগে লগে তেওঁ দেখে যে ৱায়াৰলেচ চেটটো নাই। এনে পৰিস্থিতিত তেওঁ স্তম্ভিত হৈ পৰিল।

লগে লগে কনিষ্টবল বিপিন কুমাৰে নিজৰ বিষয়াসকলক এই বিষয়ে অৱগত কৰে। আৰক্ষী বিষয়াসকলে ইয়াক গাফিলতি বুলি গণ্য কৰি কনিষ্টবলজনক নিলম্বন কৰে আৰু এজন অচিনাকি ব্যক্তিৰ বিৰুদ্ধে চুৰিৰ গোচৰ ৰুজু কৰে। ইয়াৰ পিছত চিচিটিভিৰ ফুটেজৰ তদন্তৰ সময়ত এজন লোকে তাত থকা ৱায়াৰলেচ চেটটো লৈ যোৱা দেখা গৈছিল।

যেতিয়া আৰক্ষীয়ে চিচিটিভিৰ ফুটেজৰ ভিত্তিত তদন্ত আগুৱাই লৈ যায় আৰু আশে-পাশে থকা লোকসকলক সোধা-পোছা কৰে তেতিয়া দেখা গ’ল যে ৱায়াৰলেচ চেটটো চুৰি কৰা ব্যক্তিজন হৈছে ই-ৰিক্সা চালক ৰামবাবু। আৰক্ষীয়ে যেতিয়া তেওঁক বিচাৰিবলৈ আৰম্ভ কৰিলে তেতিয়াই গম পোৱা গ’ল যে তেওঁ ৱায়াৰলেচ চেটটো লৈ গাঁৱত ঘূৰি ফুৰিছে।

আৰক্ষীয়ে তেওঁক গ্ৰেপ্তাৰ কৰি ৱায়াৰলেচ চেটটোও উদ্ধাৰ কৰিছে। সোধা-পোছাৰ সময়ত ৰামবাবুৱে কয় যে তেওঁ গীত শুনিবলৈ বৰ ভাল পায়। ঘটনাৰ দিনা তেওঁ যাত্ৰীৰ অপেক্ষাত মন্দিৰৰ ওচৰত থিয় হৈ আছিল, তেতিয়াই শুই থকা কনিষ্টবলজনৰ ওচৰত এই ৱায়াৰলেচ চেটটো দেখিছিল। তাৰে সুযোগ গ্ৰহণ কৰি গান শুনিবলৈ ৰেডিঅ' বুলি ভাবি চুৰি কৰি লৈ গ'ল।

অভিযুক্ত ৰামবাবুক কাৰাগাৰলৈ প্ৰেৰণ কৰিছে আৰক্ষীয়ে। আৰক্ষী বিষয়াসকলেও নিজৰ জোৱানসকলক কঠোৰ বাৰ্তা দিছে যে কৰ্তব্যৰ সময়ত যিকোনো ধৰণৰ গাফিলতি সহ্য কৰা নহ’ব আৰু তেওঁলোকে নিজৰ সা-সৰঞ্জামৰ ওপৰত বিশেষ গুৰুত্ব দিব লাগিব।