বিধায়কৰো পিছলে পাৱ! শীতকালীন অধিৱেশনৰ শেষৰ দিনা বিধানসভাত ঘটিল অঘটন

• Image Credit: Internet

• Dec 24, 2021 | Deleted

ডিজিটেল ডেস্ক : এখন ফটো আৰু দুটা অঘটন৷ ফটোয়েই যেন কাল হ'ল দুগৰাকী বিধায়কৰ৷ ফটো উঠিবলৈ গৈ বাগৰি পৰিল বিধায়ক দুগৰাকী৷ ঘটনাৰ সবিশেষ এনেধৰণৰ-- আজি অন্ত পৰিল বিধানসভাৰ শীতকালীন অধিৱেশন৷ আটকধুনীয়াকৈ সজাই-পৰাই তোলা হ'ল অসম বিধানসভাৰ চৌহদ৷ নানা ৰঙী ফুল, কাৰ্পেটেৰে সু-সজ্জিত কৰিলে বিধানসভাৰ ভিতৰ তথা বাহিৰচ’ৰা৷ ডিঙিত গামোচা পিন্ধি শাসক-বিৰোধীও উপস্থিত হ'ল সদনত৷ সকলো ঠিকেই চলিল৷ কিন্তু তাৰমাজতেই ঘটিল এই অঘটন৷ লোকসভাৰ অধ্যক্ষ ওম বিৰলাৰ সৈতে ফটো ছেছনৰ সময়ত ঢলি পৰে বিধায়ক ফণী তালুকদাৰ৷ মূৰ ঘূৰাই ঢলি পৰে বিধায়কগৰাকী৷

ইপিনে, বিধানসভাৰ চৌহদত পৰি আহত হয় বিধায়ক কৃষ্ণেন্দু পাল৷ ফটো উঠিবলৈ গৈ ভৰি পিছল খাই বিধানসভাৰ চৌহদত বাগৰি পৰে তেওঁ৷ যাৰ ফলত হাতত গুৰুতৰভাৱে আঘাত হয় বিধায়কগৰাকী৷ ইতিমধ্যেই পালক গুৱাহাটী মেডিকেল কলেজ হাস্পতাললৈ প্ৰেৰণ কৰা হৈছে বুলি জানিব পৰা গৈছে৷ ইয়াৰ বিপৰীতে বিধায়ক ফণী তালুকদাৰ চিকিৎসালয়লৈ যাবলৈ অমান্তি হয়৷ অৱশেষত ধমক দি তেওঁক চিকিৎসালয়লৈ পঠিওৱাৰ ব্যৱস্থা কৰিলে মুখ্যমন্ত্ৰী ডঃ হিমন্ত বিশ্ব শৰ্মাই৷

গুৱাহাটী মেডিকেল কলেজত ফণী তালুকদাৰক চিকিৎসা প্ৰদান কৰা হয়৷ আজি ৫ টা দিনে শাসক-বিৰোধীয়ে উত্তাল কৰি তুলিছিল সদনৰ মজিয়া৷ বিধানসভাৰ অধিৱেশনৰ অন্তিমটো দিনটোত লোকসভাৰ অধ্যক্ষ ওম বিৰলা উপস্থিত থকাত বিধানসভাত আজি একপ্ৰকাৰ উৎসৱমুখৰ পৰিস্থিতিৰ সৃষ্টি হয়৷ পিছে তাৰ মাজতে দুই বিধায়কৰ এই অঘটনে কিছু উদ্বেগৰো সৃষ্টি কৰে। যেন 'দিনটো গ'লেও ক্ষণটো নাযায়'-এই কথাযাৰেই ফলিয়ালে ফণী তালুকদাৰ আৰু কৃষ্ণেন্দু পালৰ ক্ষেত্ৰত৷