মমতা বেনাৰ্জী আহি আছে অসমলৈ: শাসক-বিৰোধীৰ নিমিলা অংক

• Image Credit: Internet

• Dec 12, 2021 | Deleted

ডিজিটেল ডেস্ক: অসমলৈ আহি আছে মমতা বেনাৰ্জী৷ পশ্চিম বংগৰ মুখ্যমন্ত্ৰী তথা তৃণমূল কংগ্ৰেছৰ অধ্যক্ষগৰাকী অসম ভ্ৰমণলৈ আহিব বুলি খবৰ ওলোৱাৰ পাছৰে পৰা অসমৰ ৰাজনৈতিক শিবিৰত আৰম্ভ হৈছে জল্পনা-কল্পনা৷ এই মাহৰ ২০ পৰা ২৪ ডিচেম্বৰৰ ভিতৰত অসম আৰু মেঘালয় ভ্ৰমণ কৰিব মমতা বেনাৰ্জীয়ে৷ বেনাৰ্জীৰ অসম আগমনৰ খবৰে এতিয়া টোপনি হৰিছে শাসক-বিৰোধীৰ৷

বংগৰ অগ্নিকন্যাৰূপে পৰিচিত নেত্ৰীগৰাকীয়ে অসমলৈ আহি অসমত তৃণমূল কংগ্ৰেছৰ ৰাজনৈতিক ভেটি সুদৃঢ় কৰাৰ বাবে প্ৰস্তুতি চলাব বুলি জানিব পৰা গৈছে৷ সমাগত লোকসভা নিৰ্বাচনত বিৰোধী ঐক্য গঠনৰ বাবে দেশজুৰি মমতা বেনাৰ্জীয়ে প্ৰচেষ্টা অব্যাহত ৰাখিছে৷ ইতিমধ্যে, অসমৰ ৰাইজৰ দলৰ সভাপতি অখিল গগৈয়েও নেত্ৰীগৰাকীক সাক্ষাৎ কৰি ৰাজনৈতিক কথা-বতৰা আগবঢ়াইছে৷ সমগ্ৰ দেশতে প্ৰভাৱ বিস্তাৰ কৰা এইগৰাকী নেত্ৰীক আনকি প্ৰধানমন্ত্ৰীয়েও সমীহ কৰি চলা দেখিবলৈ পোৱা যায়৷ পশ্চিম বংগৰ আঞ্চলিক দল তৃণমূল কংগ্ৰেছৰ সুদৃঢ় ভেটি আৰু ৰাজ্যখনৰ স্বাৰ্থত বেনাৰ্জীৰ আপোচবিহীন স্থিতিৰ বাবেই পশ্চিম বংগত খোপনি পুতিব পৰা নাই বিজেপিয়ে৷

আনকি, পশ্চিম বংগৰ নিৰ্বাচনক কেন্দ্ৰ কৰি ‘কা’ অনা বিজেপিয়ে সেইখন ৰাজ্যতেই শোচনীয় পৰাজয়ৰ সন্মুখীন হৈছে৷ তেনে স্থলত মমতা বেনাৰ্জীয়ে এইবাৰ অসমলৈ আহিব বুলি গম পোৱাৰ পাছৰে পৰা টোপনি হৰিছে অসম বিজেপিৰ৷ কিয়নো, অসমৰ বাবেও ‘কা’ গৃহীত কৰি হিন্দু বঙালী ভোটাৰৰ মন জয় কৰি স্থায়ী ভোটবেংক নিৰ্মাণৰ চেষ্টা অব্যাহত ৰাখিছে বিজেপিয়ে৷ তেনেস্থলত অসমত তৃণমূল কংগ্ৰেছৰ ৰাজনৈতিক সম্প্ৰসাৰণবাদে বিজেপিৰ হিন্দু বঙালী ভোটবেংকত যে প্ৰচণ্ড আঘাত হানিব, সেয়া নিশ্চিত৷

আনহাতে, মমতা বেনাৰ্জীৰ অসম আগমনৰ বিষয়টোক সহজভাৱে ল’ব পৰা নাই অসম প্ৰদেশ কংগ্ৰেছ সমিতিয়েও৷ কিয়নো, ইতিমধ্যে অসমৰ কংগ্ৰেছ নেত্ৰী সুস্মিতা দেৱে কংগ্ৰেছ এৰি যোগদান কৰিছে তৃণমূল কংগ্ৰেছত৷ জানিব পৰা মতে, অসম কংগ্ৰেছৰ একাংশ জ্যেষ্ঠ নেতাই তৃণমূল কংগ্ৰেছত যোগদানৰ বাবে যো-জা চলাইছে৷ আনকি, তেওঁলোকে মমতা বেনাৰ্জীৰো সেউজ সংকেট লাভ কৰিছে৷ গতিকে, মমতা বেনাৰ্জীৰ অসম ভ্ৰমণৰ পাছতেই হয়তো কংগ্ৰেছৰ এইসকল জ্যেষ্ঠ নেতাই তৃণমূল কংগ্ৰেছত যোগদান কৰিব৷ ইফালে, অসমৰ সংখ্যালঘু সমাজেও কংগ্ৰেছৰ বিকল্প শক্তিৰ সন্ধানত আছে বহুদিনৰ পৰাই৷ গতিকে, তেওঁলোকেও অসমত তৃণমূল কংগ্ৰেছক আস্থাত লোৱাৰ সম্ভাৱনাক নুই কৰিব নোৱাৰি৷

মমতা বেনাৰ্জীৰ অসম ভ্ৰমণৰ বিষয়টোক লৈ আন এটা কাৰণতো অস্বস্তিত পৰিছে ৰাজ্যিক বিজেপি৷ এক অসমৰ্থিত সূত্ৰৰ পৰা গম পোৱা মতে, মমতা বেনাৰ্জীয়ে অসমত এখন সংবাদ মেল সম্বোধন কৰিব৷ আৰু, সেই সংবাদ মেলতে নেত্ৰীগৰাকীয়ে অসমৰ শাসক দলৰ একাংশ প্ৰতাপী নেতাৰ অনিয়মৰ তথ্য ৰাজহুৱা কৰিব৷ প্ৰধানমন্ত্ৰী মোদী অথবা অমিত শ্বাহকো কেৰেপ নকৰা নেত্ৰীগৰাকীয়ে যে অসমৰ কোনো নেতাক সমীহ কৰিব, সেয়া ভবাতো ভুল৷ এনে পৰিপ্ৰেক্ষিতত মমতা বেনাৰ্জীৰ সম্ভাৱ্য সংবাদমেলখনত কেতবোৰ ৰাজনৈতিক বিস্ফোৰণ ঘটাৰ সম্ভাৱনা আছে৷ অসমৰ শাসকীয় দলৰ নেতাৰ অনিয়মৰ তথ্য, ফাইল পৰ্যন্ত ইতিমধ্যে মমতা বেনাৰ্জীৰ হাতত পৰিছে৷ আৰু, সেয়া শাসক দলৰেই অন্য নেতাই নেত্ৰীগৰাকীক যোগান ধৰিছে বুলি খবৰ ওলাইছে৷ মমতা বেনাৰ্জীৰ অসম ভ্ৰমণৰ পৰৱৰ্তী সময়ত অসম ৰাজনৈতিক পট পৰিৱৰ্তনৰ ইংগিত পোৱা গৈছে৷