• মোডী-শ্বাহৰ ৰাজ্যত নতুন মুখ্যমন্ত্ৰী: দাবীদাৰ পিছে তিনিগৰাকী

    ৰাজনৈতিক

    ডিজিটেল ডেস্ক: বিধানসভা নিৰ্বাচনলৈ মাজত মাথো এটা বছৰ থকাৰ পৰতে গুজৰাটৰ মুখ্যমন্ত্ৰী বিজয় ৰূপানীয়ে পদত্যাগ কৰিলে। দলীয় নীতিৰ প্ৰতি আনুগত্যতা ৰাখি পদ ত্যাগ কৰা বুলি সংবাদ মাধ্যমৰ সন্মুখত তেওঁ ব্যক্ত কৰে। যি নহওঁক, তেওঁৰ পদত্যাগৰ পিছতেই এতিয়া ৰাজ্যখনত মুখ্যমন্ত্ৰী পদৰ বাবে চলিছে নতুন মুখৰ সন্ধান। চৰ্চাত আছে তিনিগৰাকী নেতা।
    গেৰুৱা শিবিৰত চলা চৰ্চা অনুসৰি গুজৰাটৰ নতুন মুখ্যমন্ত্ৰী পদৰ প্ৰধান দাবীদাৰ হ’ল কেন্দ্ৰীয় স্বাস্থ্যমন্ত্ৰী মনসুখ মাণ্ডব্য। তেওঁক প্ৰধানমন্ত্ৰী নৰেন্দ্ৰ মোডীৰ ‘গুড বুক’ত অন্তৰ্ভুক্ত নেতাসকলৰ এজন বুলি জনা যায়।
    মাণ্ডব্যৰ পিছতে চৰ্চাত আছে ৰাজ্যসভাৰ সাংসদ পুৰষোত্তম ৰূপালাৰ নাম। এওঁৰ কাৰ্যকাল সমাপ্ত হ’বলৈ মাথো চাৰি মাহ বাকী।পাতিদাৰ সম্প্ৰদায়ৰ এগৰাকী পৰিচিত নেতা হ’ল ৰূপালা। এসময়ত গুজৰাট বিজেপিৰ সভাপতিও আছিল তেওঁ।
    চৰ্চাত থকা আন এগৰাকী নেতা হ’ল নীতিন পেটেল। স্বাস্থ্য, শিক্ষা,পৰিয়াল কল্যাণ আদি অনেক গুৰুত্বপূৰ্ণ বিভাগ পৰিচালনাৰ অভিজ্ঞতাৰে পুষ্ট তেওঁ।
    অৱশ্যেই এইসময়ত নিযুক্ত হ’বলগীয়া মুখ্যমন্ত্ৰীগৰাকীৰ কান্ধত যথেষ্ট গুৰু দায়িত্ব থাকিব। তেওঁ গুজৰাটত বিজেপিৰ স্থান অক্ষুণ্ণ ৰখাৰ স্বাৰ্থত এটা বছৰ পিছতেই আহিবলগীয়া বিধানসভা নিৰ্বাচনত দলক সন্মুখৰ পৰা নেতৃত্ব দিব লাগিব।

    আনহাতে মুখ্যমন্ত্ৰীৰ পদত্যাগক এক ৰাজনৈতিক নাটক আখ্যা দি সমালোচনাত মুখৰ হৈ পৰিছে কংগ্ৰেছ ।কংগ্ৰেছ নেতাসকলৰ দাবী, “ ৰিমোট কণ্ট্ৰলৰ দ্বাৰা পৰিচালিত গুজৰাট চৰকাৰৰ বিগত সময়ৰ বিফলতাক গাপ দিয়াৰ বাবে এনে এক সময়ত মুখ্যমন্ত্ৰী গৰাকীক আঁতৰোৱা হৈছে”। গুজৰাট কংগ্ৰেছৰ শীৰ্ষ নেতা হাৰ্দিক পেটেলে কয়,” মুখ্যমন্ত্ৰীৰ পদত্যাগে বিজেপি দল যে গুজৰাটত চৰকাৰ পৰিচালনাত ব্যৰ্থ হৈছে সেয়াই প্ৰতিপন্ন কৰিছে”।
    যি নহওঁক, মুখ্যমন্ত্ৰী পৰিৱৰ্তনে গেৰুৱা বাহিনীক সমাগত বিধানসভা নিৰ্বাচনত গুজৰাটত কিভাৱে উপকৃত কৰে সেয়া সময়েহে ক’ব।

    Weather Forecast