ডিজিটেল ডেস্কঃ
সমাপ্ত হল দেশৰ পাঁচখন ৰাজ্যৰ বিধানসভাৰ নিৰ্বাচন। পঞ্জাৱক বাদ দি দেশৰ পাঁচখন ৰাজ্যতে বিজেপিৰ জয়যাত্ৰা অব্যাহত আছে। কিন্তু এইবাৰ পঞ্জাৱৰ নিৰ্বাচনী ফলাফলক লৈ দেশৰ ৰাজনৈতিক মহলত আৰম্ভ হৈছে চৰ্চা। এফালে বিজেপিৰ উত্থান আনফালে পঞ্জাৱৰ পৰা কংগ্ৰেছক উৎখাত কৰি আপে চৰকাৰ গঠন কৰাটো মুঠেই সহজ নাছিল, কিন্তু বাস্তৱত আপে সেইয়া কৰি দেখুৱালে। পঞ্জাব বিধানসভা নিৰ্বাচনত একক সংখ্যাগৰিষ্ঠতা লাভ কৰাৰ পিছত আম আদমি পাৰ্টীয়ে এতিয়া দেশৰ আন ৰাজ্যতো সংগঠনৰ প্ৰসাৰ কৰা আৰম্ভ কৰিছে। বিশেষকৈ এই বছৰ গুজৰাটত হবলগীয়া নিৰ্বাচনত বা অহা বছৰ নিৰ্বাচন হ’বলগীয়া ৰাজ্যসমূহত বিশেষ নজৰ দিছে দলটোৱে।
পঞ্জাৱ দখলৰ পাছত আম আদমী পাৰ্টিয়ে গুজৰাটত শাসনাধিষ্ঠিত বিজেপিৰ মুখ্য প্ৰতিদ্বন্দী হিচাপে আত্মপ্ৰকাশ কৰাৰ সম্ভাৱনা আছে। য'ত এই বছৰৰ ডিচেম্বৰত বিধানসভা নিৰ্বাচন অনুষ্ঠিত হ'ব। বিজেপিৰ বিভাজনমুখী ৰাজনীতি, কংগ্ৰেছৰ সু-নেতৃত্ব অভাৱৰ পূৰ্ণ সুযোগ লব আপে। ইফালে দেশখনৰ শিক্ষিত চামেও আপৰ পক্ষত আছে বুলিও দেশৰ ৰাজনৈতিক মহলে কৱ খোজে। দেশৰ বিৰোধী শিবিৰো অৱগত যে, গুৰাটত যদি বিজেপিৰ একমাত্ৰ প্ৰতিদ্বন্দী আছে সেইয়া হল আপ, আপৰ ক্ৰমাগত উত্থানৰ বিষয়ে এতিয়া বিজেপিয়েও ভালদৰে বুজি উঠিছে। ইফালে গুজৰাটৰ বিধানসভাৰ নিৰ্বাচন নৰেন্দ্ৰ মোদীৰ বাবেও সন্মান ৰক্ষাৰ যুঁজ হব, এনে পৰিস্থিতিত গুজৰাটৰ বিধানসভাৰ নিৰ্বাচনে যথেষ্ট তাৎপৰ্য বহন কৰিছে।
ইফালে, বিজেপিয়ে এতিয়া আপৰ উত্থানক লৈ ৰচিছে ৰণকৌশল। বিভিন্ন প্ৰলোভন দি আম আদমী পাৰ্টিৰ (আপ) কেইবাজনো বিষয়াক বিজেপিয়ে তেওঁলোকৰ দলত যোগ কৰালে। আপৰ ৰাষ্ট্ৰীয় আহ্বায়ক অৰবিন্দ কেজৰিৱাল আৰু নৱনিযুক্ত পঞ্জাৱৰ মুখ্যমন্ত্ৰী ভগৱন্ত মানৰ আহমেদাবাদ ভ্ৰমণ আৰু ৰোড শ্ব'ৰ পূৰ্বে তেওঁলোকে বিজেপিৰ গান্ধী নগৰমুখ্য কাৰ্যালয়ত গেৰুৱা দলত যোগদান কৰাটো এখ লক্ষ্যণীয় বিষয় হিচাপে পৰিগণিত হৈছে। অৱশ্যে, স্থানীয় আপ নেতাসকলে দলত্যাগক "লজ্জাজনক" বুলি অভিহিত কৰে আৰু কয় যে বিজেপিত যোগদান কৰা লোকসকল অৰবিন্দ কেজৰিৱাল নেতৃত্বাধীন দলটোৰ সৈতে কোনো সম্পৰ্ক নাই।
গুজৰাটৰ এজন আপ নেতাই দাবী কৰিছে যে এইবাৰ গুজৰাটত স্থিতি সকলোৰে বাবে সলনি হ'ব। কেইবা দশকধৰি, বিজেপি আৰু কংগ্ৰেছে গুজৰাটত আধিপত্য বিস্তাৰ কৰি আহিছে,কিন্তু কিছুমান ৰাজনৈতিক পৰ্যবেক্ষকে কয় যে দিল্লী, পঞ্জাৱৰ পিছত আপৰ হাতত এতিয়া বিজেপিৰ সৈতে খেলিবলৈ আন এটা ভাল সুযোগ আহি আছে।
আপ গুজৰাটৰ মুখপাত্ৰ যোগেশ পেটেলে কয়, “গুজৰাটৰ জনসাধাৰণৰ আশীৰ্বাদত গুজৰাটত বিজেপিৰ মুখ্য প্ৰতিদ্বন্দী হিচাপে আপ আত্মপ্ৰকাশ কৰিব। যোৱা ২৭ বছৰ ধৰি ইয়াত মানুহে কংগ্ৰেছক প্ৰত্যাখ্যান কৰি আহিছে,এইবাৰ বিজেপিকো কৰিব"।
তেওঁ লগতে কয়,"গুজৰাটত আমি দিল্লীত অৰবিন্দ কেজৰিৱাল চৰকাৰৰ কামৰ আধাৰত উন্নয়নৰ এক বিকল্প আৰ্হি আগবঢ়াইছো।বিজেপিৰ অপশাসনৰ ২৭ বছৰৰ পিছত মানুহ ভাগৰি পৰিছে আৰু সেইবাবে আপক সুযোগ দিব।শিক্ষা, বিদ্যুৎ, স্বাস্থ্য বা পানী হওক, বিজেপিয়ে ৰাজ্যখনৰ জনসাধাৰণক প্ৰাথমিক সুবিধাসমূহ প্ৰদান কৰিবলৈ সক্ষম হোৱা নাই আৰু আমি আশা কৰোঁ যে এইকথা বিবেচনা কৰিলে ৰাইজে আমাক এটা সুযোগ দিব।"
Leave A Comment