‘কা’বিৰোধীৰ বিৰুদ্ধে এতিয়াও চলি আছে দেশদ্ৰোহিতাৰ গোচৰ, প্ৰত্যাহাৰৰ দাবী তোলা নাই কোনেও

• Image Credit: Internet

• Dec 14, 2021 | Deleted

ডিজিটেল ডেস্কঃ ‘কা’বিৰোধী আন্দোলনত অংশ ল’বলৈ ৰাজপথলৈ ওলাইছিল স্বাভিমানী অসমীয়া৷ ছাত্ৰবিদ্ৰোহৰ অগনিয়ে ছানি ধৰিছিল অসমৰ আকাশ৷ ‘কা’বিৰোধী গণআন্দোলনে তীব্ৰ ৰূপ ধাৰণ কৰিছিল অসমত৷ মোতায়েন কৰা হৈছিল সেনা, অৰ্ধ-সামৰিক বাহিনী৷ অসমৰ আন্দোলনৰ তীব্ৰতাক নিয়ন্ত্ৰণ কৰিবলৈ বাহিৰৰ পৰা অনা হৈছিল সেনাৰ কেইবাটাও বৃহৎ দল৷ সেই সময়তে আৰক্ষীয়ে আটক কৰিছিল বিভিন্ন সংগঠনৰ কেইবাগৰাকীও নেতা, কৰ্মী আৰু সাধাৰণ ৰাইজক৷ অভিযোগ ‘কা’বিৰোধী আন্দোলনত অংশ আৰু চৰকাৰবিৰোধী স্থিতি৷ অসমৰ কেইবাগৰাকীও নেতাৰ বিৰুদ্ধে আছিল ৰুজু গৈছিল দেশদ্ৰোহিতাৰ গোচৰ৷ তাৰ ভিতৰত অখিল গগৈ, ধৈৰ্য কোঁৱৰ, মানস কোঁৱৰ, বিতু সোণোৱাল অন্যতম৷ সৰ্বভাৰতীয় প্ৰেক্ষাপটত ‘কা আন্দোলন’ৰ নেতৃ্ত্ব বহন কৰা অসমৰ জীয়ৰী দেৱাংগনা কলিতাৰ বিৰুদ্ধেও ৰুজু হৈছিল দেশদ্ৰোহিতাৰ গোচৰ৷

পৰৱৰ্তী সময়ত এইসকল নেতাই মুকলি আকাশৰ তললৈ আহিল৷ তথাপি, অসমৰ বিভিন্ন থানাত আজিও কেইবাটাও গোচৰ ৰুজু হৈ আছে ‘কা আন্দোলন’ৰ সময়ৰ৷ এইসমূহ গোচৰ অদ্যপি প্ৰত্যাহাৰ হোৱা নাই৷ আদালতলৈ তাঁতবাতি কাঢ়ি থাকিলগীয়া হৈছে পদকীয়া পক্ষই৷ ‘কা আন্দোলন’ৰ সময়ত অসমত ৰুজু হোৱা গোচৰসমূহ প্ৰত্যাহাৰ কৰাবলৈ অসমৰ কোনো জাতীয় সংগঠনে বলিষ্ঠ ভূমিকা লোৱা পৰিলক্ষিত হোৱা নাই৷ ‘কা আন্দোলন’ৰ নেতৃত্ব লোৱা সদৌ অসম ছাত্ৰ সন্থাই শেহতীয়াকৈ কেইবালানিও বৈঠকত অসম চৰকাৰৰ মুখ্যমন্ত্ৰী আৰু মন্ত্ৰীৰ সৈতে অংশ লৈছে৷ এই বৈঠকত সদৌ অসম ছাত্ৰ সন্থাই ‘কা আন্দোলন’ৰ সময়ৰ গোচৰ প্ৰত্যাহাৰৰ দাবী তোলা নাই৷ যিসময়ত কৃষক বিদ্ৰোহৰ ওচৰত শিৰনত হৈ প্ৰধানমন্ত্ৰীয়ে বিতৰ্কিত তিনিখন কৃষি আইন বাতিলৰ কথা ঘোষণা কৰিছিল৷ কিন্তু, কৃষকসমাজে কৃষকবিদ্ৰোহৰ সময়ত কৃষকৰ বিৰুদ্ধে ৰুজু হোৱা সমূহ গোচৰ প্ৰত্যাহাৰ নকৰা পৰ্যন্ত আন্দোলনৰ কাৰ্যসূচী বাতিল নকৰে বুলি স্পষ্টকৈ জনাই দিছিল৷

বিগত বিধানসভা নিৰ্বাচনৰ পূৰ্বে অসমত কংগ্ৰেছৰ তদানীন্তন সভাপতি ৰিপুণ বৰাই অসমত মহাজোঁটৰ চৰকাৰ গঠন হ’লে কা আন্দোলনৰ সময়ত ৰুজু হোৱা সমূহ গোচৰ প্ৰত্যাহাৰ কৰাৰ ব্যৱস্থা কৰিব বুলি প্ৰতিশ্ৰুতি দিছিল৷ শাসনলৈ বিজেপি আহিল৷ বৰ্তমানৰ চৰকাৰখনে ‘কা আন্দোলন’ৰ সময়ত ৰুজু হোৱা গোচৰ প্ৰত্যাহাৰ সম্পৰ্কে কোনো মন্তব্য কৰা পৰিলক্ষিত হোৱা নাই৷