এইবাৰ কেৰালাত প্ৰৱেশ আম আদমী পাৰ্টীৰ: ৰাজনৈতিক সমীকৰণ সলনিৰ ইংগিত

দিল্লীৰ মুখ্যমন্ত্ৰী আৰু আম আদমী পাৰ্টিৰ ৰাষ্ট্ৰীয় আহ্বায়ক অৰবিন্দ কেজৰিৱালে আজি কেৰালাত উপস্থিত হৈ এই ‘পিপলছ ৱেলফেয়াৰ এলায়েন্স’ মিত্ৰতাৰ বিষয়ে সদৰী কৰে৷ ত্ৰিককাক্কাৰা বিধানসভা সমষ্টিৰ উপ-নিৰ্বাচনৰ পূৰ্বে কেৰালাত টুৱেণ্টি-২০ দলৰ সৈতে আপ-এ মিত্ৰতা স্থাপন কৰিলে৷  কেজৰিৱালে ভাষণ প্ৰসংগত দেশৰ বিভিন্ন প্ৰান্তত বছৰ বছৰ ধৰি দলটোৰ যাত্ৰাৰ ওপৰত আলোকপাত কৰিছিল। কেজৰিৱালে টুৱেণ্টি-২০ পাৰ্টিৰ মুৰব্বী চাবু জেকবৰ উপস্থিতিত সমবেত লোকসকলক সম্বোধন কৰিছিল।

ভাৰতৰ নিৰ্বাচন আয়োগে ৩১ মে’ৰ বাবে ত্ৰিককাকাৰা বিধানসভা সমষ্টিৰ উপ-নিৰ্বাচনৰ সময় সূচী নিৰ্ধাৰণ কৰিছে। ভোটগণনা সম্পন্ন হ’ব ৩ জুনত৷ অৰবিন্দ কেজৰিৱালে লগতে কয়, কেৰালা ঈশ্বৰৰ নিজৰ ঠাই। ইমান ধুনীয়া ঠাই, ইমান ধুনীয়া মানুহ! ১০ বছৰ আগতে, কোনেও অৰবিন্দ কেজৰিৱালক চিনি পোৱা নাছিল। আজি, দিল্লী আৰু পঞ্জাবত আমাৰ চৰকাৰ আছে। এই সকলোবোৰ ঈশ্বৰৰ বাবে হৈছে। এতিয়া, কোনে বিচাৰে যে আপে কেৰালাত চৰকাৰ গঠন কৰক?- তেওঁ সুধিছিল৷

গৃহনিৰ্মাতা, শিক্ষাৰ্থী আৰু ভ্ৰাম্যমাণ মেৰামতিকাৰীকে ধৰি আমাৰ নৱগঠিত দলৰ প্ৰাৰ্থীসকলে পঞ্জাব আৰু দিল্লীত পূৰ্বৰ মুখ্যমন্ত্ৰীক পৰাজিত কৰিছিল৷ এই সকলো ঈশ্বৰৰ কাৰণে হৈছে আপৰ ৰাষ্ট্ৰীয় আহ্বায়কগৰাকীয়ে মন্তব্য কৰে৷ কেজৰিৱালে আৰু উল্লেখ কৰে যে দিল্লীৰ এজন দৰিদ্ৰ শ্ৰমিকে নিম্নতম মজুৰি হিচাপে ১৫,০০০ টকাৰো অধিক ধন লাভ কৰে যিটো ভাৰতত সৰ্বাধিক। ইয়াৰ ওপৰত, শ্ৰমিকসকলে মানসম্পন্ন স্বাস্থ্যসেৱা, শিক্ষা, মহিলাৰ বাবে পৰিবহন, বিদ্যুৎ, পানী, সকলো বিনামূলীয়াকৈ লাভ কৰে। সৎ আপ চৰকাৰৰ বাবে এয়া সম্ভৱ হৈ উঠিছে বুলি মন্তব্য কৰে অৰবিন্দ কেজৰিৱালে৷  

২০২০ত একেৰাহে দ্বিতীয়বাৰৰ বাবে দিল্লী বিধানসভা নিৰ্বাচনত জয়ী হোৱাৰ পিছত কেজৰিৱালৰ এইটোৱে আছিল প্ৰথম কেৰালা ভ্ৰমণ।