বিকল্প ৰাজনীতিৰ ধ্বজাবাহক হ’ব পাৰিবনে অসম জাতীয় পৰিষদ?

সদৌ অসম ছাত্ৰ সন্থা আৰু অসম জাতীয়তাবাদী যুৱ-ছাত্ৰ পৰিষদৰ যৌথ প্ৰচেষ্টাত ভূমিষ্ঠ হৈছিল অসম জাতীয় পৰিষদ৷ নেতৃত্ব লৈছিল সদৌ অসম ছাত্ৰ সন্থাৰ তদানীন্তন সাধাৰণ সম্পাদক লুৰীণজ্যোতি গগৈয়ে৷ দলটোৰ আৰম্ভণিৰ সময়ছোৱাত অজাযুছাপৰ সাধাৰণ সম্পাদক পলাশ চাংমাইয়ো সক্ৰিয়তাৰে ব্যস্ত হৈ পৰিছিল যদিও পৰৱৰ্তী সময়ত চাংমাইক অসম জাতীয় পৰিষদৰ মঞ্চত দেখা নগ’ল৷

২০২১ৰ নিৰ্বাচনত বলিষ্ঠ আত্মপ্ৰকাশেৰে অসম জাতীয় পৰিষদে অসমৰ ইমূৰৰ পৰা সিমূৰলৈ এক ঢৌ বোৱাবলৈ সক্ষম হৈছিল৷ যদিও, সেই ঢৌ অথবা জাতীয় আৱেগ পৰ্যবসিত নহ’ল ভোটৰ পৰিসংখ্যালৈ৷ দুটাকৈ সমষ্টিত পৰাজয়বৰণ কৰিলে দলটোৰ সভাপতি লুৰীণজ্যোতি গগৈয়ে৷ এখন আসনতো এগৰাকীও বিধায়ক নিৰ্বাচিত নোহোৱাত প্ৰথমটো নিৰ্বাচনতে বিমুখ হ’ল অসম জাতীয় পৰিষদ৷

পৰৱৰ্তী সময়ত সময়ে দলটোৰ সভাপতি লুৰীণজ্যোতি গগৈক অসমৰ এগৰাকী শক্তিশালী বিৰোধী নেতাৰূপে প্ৰতিষ্ঠা কৰিলে৷ ‘কা’ আন্দোলনৰ সময়ছোৱাতে নিজৰ আপোচবিহীন চৰিত্ৰক তুলি ধৰি চৰকাৰক চোকা সমালোচনা আৰু বাকপটুতাৰে অসমবাসীৰ দৃষ্টি আকৰ্ষণ কৰিছিল ছাত্ৰনেতা লুৰীণজ্যোতি গগৈয়ে৷

ছাত্ৰনেতাৰ পৰা ৰাজনৈতিক নেতালৈ লুৰীণজ্যোতি গগৈৰ যাত্ৰা আগবাঢ়়িছিল এক সন্ধিক্ষণৰ মাজেৰে৷ বিধায়কশূন্য দলটোৰ নেতৃত্ববহনকাৰী এইগৰাকী লুৰীণজ্যোতি গগৈৰ সন্মুখত এতিয়া পাহাৰসম প্ৰত্যাহ্বান৷ এফালে ৰাষ্ট্ৰীয়তাবাদৰ আগ্ৰাসন, আনফালে জাতীয় জীৱনৰ মৌলিক প্ৰশ্নবোৰৰে অসমবাসীক মুখামুখি কৰোৱাৰ৷ এটা কথা নিশ্চিত যে জাতীয়তাবাদী ধ্যান-ধাৰণা আৰু চিন্তা-চেতনাক কোনো ৰাষ্ট্ৰীয়তাবাদী শক্তিয়েই সমূলি শেষ কৰিব পৰা নাই৷ ভাৰতৰ ৰাজনৈতিক ইতিহাসে সেই কথাৰেই প্ৰতিফলন কৰি আহিছে৷ 

অসমৰ সমাজ জীৱনতো জাতীয়তাবাদ প্ৰতিষ্ঠা কৰিবলৈ হ’লে লুৰীণজ্যোতি গগৈয়ে ত্যাগ কৰিবলৈ সাজু থাকিব লাগিব বুলি একাংশ ৰাজনৈতিক বিশ্লেষকে মন্তব্য কৰিছে৷ সহজ পথ নলৈ নিজৰ স্থিতি দৃঢ়তাৰে অক্ষুণ্ণ ৰাখিলে লুৰীণজ্যোতি গগৈ অসমৰ ভৱিষ্যতৰ ৰাজনীতিৰ এগৰাকী বলিষ্ঠ নেতা হিচাপে আত্মপ্ৰকাশ কৰাৰ সম্ভাৱনা আছে৷ ক্ষমতা আৰু আদৰ্শৰ যুঁজত লক্ষ্যপ্ৰাপ্তিৰ বাট সহজ নহ’লেও অসম্ভৱ নহয়৷ ছাত্ৰ সন্থাৰ পূৰ্বজসকলৰ দৰে সহজ আৰু সুবিধাজনক বাট নলৈ লুৰীণজ্যোতি গগৈয়ে গ্ৰহণ কৰিছে এটি কঠিন বাট৷ এই কথা তেওঁ ইতিমধ্যে কেইবাবাৰো স্বীকাৰ কৰিছে৷ এনে পৰিপ্ৰেক্ষিতত এই টান বাটত তিষ্ঠি থাকিবলৈ লুৰীণজ্যোতি গগৈক প্ৰয়োজন হ’ব অদম্য সাহসৰ৷ আৰু প্ৰত্যাহ্বান নেওচি জাতীয়তাবাদ প্ৰতিষ্ঠা কৰিবলৈ হ’লে দলটোৱে এতিয়াৰ কিছু নীতি সলোৱাৰ প্ৰয়োজনীয়তা আছে বুলি চৰ্চা চলিছে৷

পৌৰসভা, পৌৰনিগমৰ নিৰ্বাচনত আশানুৰূপ নহ’লেও অসম জাতীয় পৰিষদৰ প্ৰাৰ্থীয়ে জয়লাভ কৰা বিষয়টো অসমৰ জাতীয়তাবাদী ৰাজনীতিৰ এক তাৎপৰ্যপূৰ্ণ ইংগিতকে বহন কৰিছে৷ পৌসভা আৰু পৌৰনিগমৰ নিৰ্বাচনৰ পাছত দলটোৰ সন্মুখত আছে ২০২৩ৰ শেষৰফালে অনুষ্ঠিত হ’বলগীয়া পঞ্চায়ত নিৰ্বাচন৷ পঞ্চায়ত নিৰ্বাচনৰ বাবে স্থিতি একে ৰাখি কৌশলী স্থিতিৰে অসম জাতীয় পৰিষদে এতিয়াৰ পৰাই কাম-কাজ আৰম্ভ নকৰিলে নিজৰ বাট নিজে ৰুদ্ধ কৰাৰ নিচিনাই হ’ব বুলি মন্তব্য কৰিছে ৰাজ্যখনৰ একাংশ সচেতন নাগৰিকে৷

বিজেপিৰ দৰে ৰাষ্ট্ৰীয় ৰাজনৈতিক শক্তিৰ আগ্ৰাসনৰ সময়তে অসম জাতীয় পৰিষদৰ বাবে অসমত তলসুঁতীয়াকৈ খোপনি পুতিবলৈ প্ৰয়াস কৰি থকা আম আদমী পাৰ্টীও অন্যতম প্ৰত্যাহ্বান হৈ পৰাৰ সম্ভাৱনাক নুই কৰিব নোৱাৰি৷ আম আদমী পাৰ্টীৰ প্ৰতি অসমৰ একাংশ নাগৰিক আকৃষ্ট হোৱা কথাটোৱেই প্ৰমাণ কৰে যে অসমত বিকল্প ৰাজনীতিয়ে মূৰ দাঙি উঠাৰ পূৰ্ণ সম্ভাৱনা আছে৷ এতিয়া সেই সম্ভাৱনাকে বাস্তৱায়িত কৰিবলৈ অসম জাতীয় পৰিষদে কেনে কৌশল গ্ৰহণ কৰে তাৰ ওপৰতেই নিৰ্ভৰ কৰিব অজাপৰ স্বাভিমানী জাতীয়তাবাদ প্ৰতিষ্ঠাৰ যুঁজখনৰো স্থায়িত্ব৷ এনে পৰিস্থিতিত অসমৰ যুৱ-প্ৰজন্ম আৰু বৌদ্ধিক সমাজক লগত লৈ দলটোৱে কি ধৰণৰ নীতিৰে অসমবাসীৰ কাষ চাপিবলৈ প্ৰয়াস কৰে, তাৰ ওপৰতে নিৰ্ভৰ কৰিব অসম জাতীয় পৰিষদৰ লগতে লুৰীণজ্যোতি গগৈৰো ৰাজনৈতিক ভৱিষ্যৎ৷