ত্ৰিপুৰাত পুনৰ শাসনলৈ আহিবলৈ চেষ্টা বিজেপিৰ; তিপ্ৰাই ল’ব পাৰে নিৰ্ণায়ক ভূমিকা

এনে সময়তে ৰাজ্যখনৰ ৰাজনীতিত তিকি থাকিবলৈ বিজেপিয়ে পুনৰ আৰম্ভ কৰিছে ৰাজনৈতিক কলা-কৌশল৷ বিজেপি পুনৰ ক্ষমতালৈ আহিলে ৰাজ্যখনৰ অৰ্থনৈতিক বিকাশে নতুন উচ্চতা স্পৰ্শ কৰিব বুলি আজি বিজেপিৰ জেপি নাড্ডাই ঘোষণা কৰিছে৷৷

ত্ৰিপুৰাত বিধানসভাৰ প্ৰচাৰ অভিযানৰ আৰম্ভ কৰি বিজেপিৰ ৰাষ্ট্ৰীয় সভাপতি জেপি নাড্ডাই আজি কয় যে দলটোৰ শাসনত বিগত চাৰি বছৰত ৰাজ্যখনত সৰ্বাত্মক উন্নয়ন ঘটিছে আৰু যদি ২০২৩ চনত পুনৰ বিজেপিক ক্ষমতালৈ আনিবলৈ ভোট দিয়া হয়, তেন্তে ৰাজ্যখনৰ অৰ্থনৈতিক বিকাশে নতুন উচ্চতা স্পৰ্শ কৰিব। 

বিজেপিৰ শাসনকালত ত্ৰিপুৰাই বৃহৎ আন্তঃগাঁথনি বিনিয়োগ আকৰ্ষিত কৰিছিল আৰু বিজেপি শাসনৰ অধীনত ঔদ্যোগিকৰণে গতি লাভ কৰিছিল বুলিও মন্তব্য কৰে জেপি নাড্ডাই৷

ৰাজ্য আৰু কেন্দ্ৰ, শাসনৰ দুয়োটা মেৰুতে বিজেপিৰ দ্বৈত ইঞ্জিন চৰকাৰে ত্ৰিপুৰাত দুগুণ বিকাশত উদগনি দিব বুলি তেওঁ আশাপ্ৰকাশ কৰে৷ ৬০ জনীয়া ত্ৰিপুৰা বিধানসভাত অহা বছৰৰ আৰম্ভণিতে নিৰ্বাচন অনুষ্ঠিত হ’ব। ২০১৮ চনৰ নিৰ্বাচনত বিজেপিয়ে ৩৬ খন আসন লাভ কৰিছিল। নাড্ডাই দাবী কৰিছে যে তেতিয়াৰ পৰাই ৰাজ্যখনত ৰাজনৈতিক হিংসাৰ সমাপ্তি ঘটিছে। 

ত্ৰিপুৰালৈ দুদিনীয়া ভ্ৰমণসূচীৰে যোৱা বিজেপি সভাপতিগৰাকীয়ে কয় যে ৰাজ্যখনৰ জনমূৰি উপাৰ্জন ৩০ শতাংশ বৃদ্ধি হৈ বছৰি ১,৩০,০০০ টকাত উপণীত হৈছে, যিটো ৰাজ্যখন আগবাঢ়ি যোৱাৰ এক সূচক৷ ৰাজ্যখনৰ বাৰ্ষিক বাজেট ১২,৬০০ কোটি টকাৰ পৰা ২৭,০০০ কোটি টকালৈ বৃদ্ধি পাইছে বুলিও তেওঁ উল্লেখ কৰে৷

ৰাজ্যখনত বিজেপি নেতৃত্বাধীন চৰকাৰৰ প্ৰদৰ্শনৰ কথা উল্লেখ কৰি নাড্ডাই কয় যে ৰাজসাহায্যপ্ৰাপ্ত হাৰত ধান সংগ্ৰহ আৰু প্ৰধানমন্ত্ৰী কিষাণ সন্মান নিধি আঁচনিৰ সফল ৰূপায়ণৰ ফলত কৃষকসকলৰ উপাৰ্জন প্ৰতি মাহে ৬৫০০ টকাৰ পৰা ১১,০০০ টকালৈ বৃদ্ধি পাইছে।

ৰাজ্যখনৰ ৩৫ বছৰীয়া বাঁওপন্থী শাসনক ত্ৰিপুৰাৰ অন্ধকাৰ দিন বুলি অভিহিত কৰি তেওঁ কয় যে সেইসময়ত জনজাতীয় লোকসকলক উপেক্ষা কৰা হৈছিল, যুৱক-যুৱতীসকলক শোষণ কৰা হৈছিল আৰু মহিলাৰ সৱলীকৰণৰ বাবে কোনো কল্যাণমূলক পদক্ষেপ আৰম্ভ কৰা হোৱা নাছিল৷ ৰাজ্যখনত কংগ্ৰেছৰ পূৰ্বৰ চৰকাৰে উত্তৰ-পূবৰ ৰাজ্যখনত সন্ত্ৰাসবাদ, অনুপ্ৰৱেশ আৰু দুৰ্নীতিৰ অনুমতি দিছিল বুলি নাড্ডাই মন্তব্য কৰে৷