গৌৰৱ গগৈ হ’ব যোৰহাটৰ প্ৰাৰ্থী; ব্যাপক ৰূপত বিৰোধীৰ নিৰ্বাচনী তৎপৰতা

ডিজিটেল ডেস্ক: অসমত বিৰোধী ঐক্যমঞ্চই আৰম্ভ কৰিছে নিৰ্বাচনী তৎপৰতা৷ বিৰোধী ঐক্যমঞ্চই প্ৰথমবাৰৰ বাবে ৰাজহুৱা কৰিছে প্ৰাৰ্থীৰ নাম৷ 

বিৰোধী ঐক্যমঞ্চ, অসমৰ সভাপতি তথা প্ৰদেশ কংগ্ৰেছৰ সভাপতি ভূপেন বৰাই ঘোষণা কৰিছে যে যোৰহাট সমষ্টিত বিৰোধীৰ উমৈহতীয়া প্ৰাৰ্থী হ’ব গৌৰৱ গগৈ৷ বৰ্তমান কলিয়াবৰৰ সাংসদগৰাকী যোৰহাটৰ প্ৰাৰ্থী হ’ব বুলি ভূপেন বৰাই বৃহস্পতিবাৰে থাওৰাত ঘোষণা কৰিছে৷ 

ভূপেন বৰাই যোৰহাট লোকসভা সমষ্টিৰ সাংসদ তপন কুমাৰ গগৈক নিমাতী কন্যা আখ্যা দি কয় যে পাঁচ বছৰত ৫ মিনিটত ৫টা সমস্যা সংসদত উত্থাপন কৰাত ব্যৰ্থ হৈছে৷ ইয়াৰ বিপৰীতে কংগ্ৰেছ সাংসদ গৌৰৱ গগৈয়ে সংসদত কেইবাটাও প্ৰশ্ন উত্থাপন কৰি দেশবাসীৰ দৃষ্টি আকৰ্ষণ কৰিবলৈ সক্ষম হৈছে৷ পৰৱৰ্তী লোকসভা নিৰ্বাচনত যোৰহাট সমষ্টিত গৌৰৱ গগৈয়েই প্ৰাৰ্থী হ’ব বুলি ভূপেন বৰাই লগতে ঘোষণা কৰে৷

বিগত লোকসভা নিৰ্বাচনত যোৰহাট সমষ্টিটোৰ পৰা বিজয়ী হৈছিল সদৌ অসম ছাত্ৰ সন্থাৰ প্ৰাক্তন সাধাৰণ সম্পাদক তথা বিজেপি নেতা তপন কুমাৰ গগৈ৷ তপন গগৈয়ে লাভ কৰিছিল ৫,৪৩,২৮৮টা ভোট৷ তাৰ বিপৰীতে সেই সময়ৰ কংগ্ৰেছ প্ৰাৰ্থী সুশান্ত বৰগোহাঁয়ে লাভ কৰিছিল ৪,৬০,৬৩৫টা ভোট৷ 

চিপিআই (এম)ৰ প্ৰাৰ্থী কনক গগৈয়ে লাভ কৰিছিল ১৭,৮৪৯টা ভোট৷ তৃণমূল কংগ্ৰেছৰ প্ৰাৰ্থী ৰিবুলয়া গগৈয়ে লাভ কৰিছিল ৬,১২১টা ভোট৷ একেদৰে, কমলা ৰাজ কোঁৱৰে এন চি পিৰ পৰা লাভ কৰিছিল ৪,৯৯৬টা ভোট৷ নিৰ্দলীয় প্ৰাৰ্থী নন্দিতা নাগে লাভ কৰিছিল ৫,৪৮১টা ভোট৷ ইয়াৰ বিপৰীতে নোটাত পৰিছিল ১২,৫৬৯টা ভোট৷ যোৰহাট লোকসভা সমষ্টিৰ অধীনত থকা অন্যতম বিধানসভা সমষ্টি কেইটা হৈছে যোৰহাট, তিতাবৰ, মৰিয়নি, শিৱসাগৰ৷ 

তিতাবৰ সমষ্টিৰ পৰাই প্ৰতিনিধিত্ব কৰি প্ৰাক্তন মুখ্যমন্ত্ৰী তৰুণ গগৈয়ে কাৰ্যনিৰ্বাহ কৰিছিল মুখ্যমন্ত্ৰী হিচাপে৷ সেইসূত্ৰে সমষ্টিটোত কংগ্ৰেছৰ ভেটি মজবুত৷ শিৱসাগৰৰ বিধায়ক অখিল গগৈৰ জনপ্ৰিয়তায়ো যোৰহাট সমষ্টিত বিৰোধীৰ প্ৰাৰ্থী হিচাপে সহায় কৰিব গৌৰৱ গগৈক৷ অখিল গগৈৰ গৃহ সমষ্টি মৰিয়নিও যোৰহাট লোকসভা সমষ্টিৰ অন্তৰ্গত৷ এগৰাকী জনপ্ৰিয় যুৱনেতা হিচাপে গৌৰৱ গগৈয়ে যোৰহাটত অনায়াসে বিজয়ী হ’ব বুলি ধাৰণা কৰিছে বিৰোধী ঐক্যমঞ্চই৷ আৰু বিৰোধীৰ সমীকৰণ অনুসৰি যোৰহাটৰ পৰাই গৌৰৱ গগৈক সাংসদ হিচাপে নিৰ্বাচিত কৰাৰ বাবে আঁচনি যুগুতাইছে কংগ্ৰেছে৷