ইণ্ডিয়া শব্দৰ হ’ব বিলুপ্তি,ব্যৱহাৰ হ’ব 'ভাৰত'; ইয়াৰ মাজতে চৰ্চা দেশত হ’ব নেকি পুনৰ বিমুদ্ৰাকৰণ!

বিৰোধী ২৬ টা দলে লোকসভা '২৪ৰ প্ৰস্তুতিৰ মাজতে নিজৰ মিত্ৰজোঁটৰ নাম I.N.D.I.A- Indian National Democratic Inclusive Alliance হিচাপে নামকৰণ কৰে৷ইয়াৰ পাছতেই দেশৰ ৰাজনীতিত ধুমুহাৰ সৃষ্টি হয়৷শাসকীয় বিজেপিয়ে 'ইণ্ডিয়া' শব্দটো উপনিৱেশিক দাসত্বৰ চিহ্ন বুলি সমালোচনা কৰে৷কিন্তু ৰাহুল গান্ধীৰ নেতৃত্বত ভাৰত জোড়া যাত্ৰা আৰু মোদী উপাধি গোচৰৰ পাছত হেৰুৱা সাংসদ পদ লাভ কৰি এই ইণ্ডিয়া মিত্ৰজোঁটৰ নেতৃত্বত যথেষ্ট সক্ৰিয়তা দেখা যায়৷

ইণ্ডিয়া মিত্ৰজোঁটৰ এই উত্থানত শংকিত  হৈছে বিজেপি৷যাৰ বাবে ১৮-২২ ছেপ্তেম্বৰত অনুষ্ঠিতব্য সংসদৰ বিশেষ অধিবেশনত ইণ্ডিয়া নামটো সাংবিধানিকভাৱে আঁতৰাই 'ভাৰত' নামটো প্ৰণয়ন কৰাৰ কথা চিন্তা-চৰ্চা কৰিছে৷কিন্তু ইণ্ডিয়া নামটোক লৈ কিয় শংকিত হৈ পৰিছে তাক লৈ নাগৰিক সমাজৰ মাজত নানান প্ৰশ্নৰ অৱতাৰণা হৈছে৷২০১৪ত বিজেপি শাসনলৈ অহাৰ পাছৰে পৰা প্ৰধানমন্ত্ৰীয়ে 'ডিজিটেল ইণ্ডিয়া', 'মেক্ ইন ইণ্ডিয়া', 'স্কিল ইণ্ডিয়া' আদি বহু অভিলাষী আঁচনি অথবা কাৰ্যসূচীৰ কথা উল্লেখ কৰিছিল৷এতিয়া প্ৰশ্ন উত্থাপন হৈছে যে সেই সময়ত মোদীৰ দৃষ্টিত 'ইণ্ডিয়া' শব্দটি উপনিৱেশিক দাসত্বৰ চিহ্ন নাছিল নেকি? নে এই কথা উপলব্ধি কৰিবলৈ মোদীক ৯ বছৰৰ প্ৰয়োজন হ’ল সেই কথাও বহুতৰ মনত উদয় হৈছে৷

এইসমূহ প্ৰশ্নৰ অৱতাৰণা হোৱাৰ সমান্তৰালভাৱে এই কথাৰো আলোচনা হৈছে যে এতিয়া দেশত পুনৰ বিমুদ্ৰাকৰণ হ’ব নেকি?আকৌ জনতাই নোট বিচাৰি এটিএম আৰু বেংকত শাৰী পাতি যন্ত্ৰণা ভুগিবলগীয়া হ’ব নেকি সেই কথা আলোচিত হৈছে৷কাৰণ ভাৰতত প্ৰচলিত নোটসমূহত 'ৰিজাৰ্ভ বেংক অৱ্ ইণ্ডিয়া' নামটো উল্লেখ আছে৷যদি  ইণ্ডিয়া নামটিৰ ঠাইত ভাৰতৰ প্ৰয়োগ হয় তেন্তে পূৰ্বৰ নোটসমূহক নিষিদ্ধ ঘোষণা কৰি নতুন নোট প্ৰচলন কৰাবলৈ বিমুদ্ৰাকৰণৰ সহায় ল’বলগীয়া হ’ব৷এই আশংকাতে এতিয়া চিন্তা আৰু ত্ৰাসত দেশবাসীয়ে দিকবিদিক হেৰুৱাইছে ৷