বিকল্প কেৱল ৰাহুল! কংগ্ৰেছৰ চিন্তন শিবিৰত পুনৰ গান্ধী তনয়ক নেতৃত্ব দিয়াৰ প্ৰস্তাৱ

উদয়পুৰত চলি থকা কংগ্ৰেছ চিন্তন শিবিৰত ৰাহুল গান্ধীক দলৰ পূৰ্ণকালীন সভাপতি নিযু্ক্তি দিয়াৰ প্ৰস্তাৱ উত্থাপন হোৱাক লৈ সৃষ্টি হৈছে চৰ্চাৰ। এই দাবী কৰি কেৰালাৰ লোকসভাৰ সাংসদ তথা কংগ্ৰেছ নেতা টি এন প্ৰতাপনে কয় যে মূল কথাটো হ'ল কংগ্ৰেছ সভাপতি এজন পূৰ্ণকালীন ৰাজনীতিবিদ হ'ব লাগে। যিহেতু কংগ্ৰেছত সাংগঠনিক নিৰ্বাচনৰ প্ৰক্ৰিয়া চলি আছে, উদয়পুৰ চিন্তন শিবিৰত কংগ্ৰেছ সভাপতিৰ ওপৰত কোনো আনুষ্ঠানিক আলোচনা হোৱা নাই, কিন্তু নেতাসকলে দলৰ নেতৃত্বত স্পষ্টতা দাবী কৰিছে। একেটা খণ্ডতে, কেৰালাৰ লোকসভাৰ সাংসদজনে ৰাহুলক পুনৰ শাসনভাৰ প্ৰস্তাৱ দিয়ে। 

ইয়াৰ পূৰ্বে, কংগ্ৰেছ ৱৰ্কিং কমিটীৰ সকলো বৈঠকতে জ্যেষ্ঠ নেতাসকলে ৰাহুল গান্ধীক পুনৰ সভাপতি হিচাপে নিযুক্তি দিয়াৰ পোষকতা কৰিছিল। সূত্ৰ অনুসৰি, মাৰ্চত অনুষ্ঠিত এখন বৈঠকত ৰাহুলে নেতাসকলক আশ্বাস দিছিল যে তেওঁ এই প্ৰস্তাৱক গুৰুত্বসহকাৰে বিবেচনা কৰি আছে। ৰাহুল গান্ধীয়ে ২০১৯ ৰ লোকসভা নিৰ্বাচনত পৰাজয়ৰ পাছত দলৰ সভাপতি পদৰ পৰা পদত্যাগ কৰিছিল। ইয়াৰ পাছত, ছোনিয়া গান্ধীয়ে পুনৰ দলৰ সভাপতিৰ দায়িত্ব গ্ৰহণ কৰিছিল। 

ৰাহুল গান্ধী এতিয়া দলৰ কোনো পদতে নাই, তেওঁ এগৰাকী সাংসদহে। কিন্তু দলীয় পদৱীত নাথাকিলেও ৰাহুল গান্ধীয়ে দলৰ সকলো গুৰুত্বপূৰ্ণ সিদ্ধান্ততে নিৰ্ণায়ক ভূমিকা গ্ৰহণ কৰি আহিছে। তেওঁৰ নিৰ্দেশ তথা আঙুলিৰ ঠাৰতে যেন কংগ্ৰেছ দল পৰিচালিত হৈ আহিছে। মোডী চৰকাৰৰ টুইটাৰত ব্যাপক সক্ৰিয়তা দেখুওৱা ৰাহুলে কিন্তু দল পৰিচালনাত সমান দক্ষতা আৰু যোগ্যতা প্ৰতিপন্ন কৰিব নোৱৰাৰ অভিযোগ আছে। এই বিষয়টো সন্দৰ্ভত এক তীক্ষ্ণ খোঁচা মাৰি টি প্ৰতাপনে কয় যে, দলৰ সভাপতিজন নিয়মীয়াকৈ সক্ৰিয় হোৱা উচিত।

ৰাহুল গান্ধীয়ে দলৰ সংস্কাৰ সম্পৰ্কীয় গুৰুত্বপূ্ৰ্ণ আলোচনা চলি থকাৰ সময়তে বিদেশ ভ্ৰমণলৈ যোৱাৰ বাবে সমালোচনাৰ সন্মুখীন হৈছিল। শেহতীয়াকৈ নেপাল ভ্ৰমণৰ সময়ত,নাইট ক্লাবত তেওঁৰ উপস্থিতিক লৈও তীব্ৰ বিতৰ্ক সূত্ৰপাত ঘটাইছিল বিজেপি। ৰাহুল গান্ধী সন্মুখত থকাটো বিজেপিৰ বাবে এক সুবিধাজনক অৱস্থান হিচাপে চিহ্নিত হৈছে। এতিয়া সংস্কাৰৰ নামত পুনৰ ৰাহুলকে দলৰ দায়িত্ব চমজাই দিলে কংগ্ৰেছৰ স্থিতি সলনি হোৱাৰ সম্ভাৱনা ক্ষীণ বুলিবই পাৰি!