বিহাৰৰ ৰাজনীতিয়ে সলালে সমীকৰণ; প্ৰধানমন্ত্ৰীৰ প্ৰাৰ্থী হোৱাৰ দিশে নীতিশ কুমাৰ

ডিজিটেল ডেস্ক: অৱধাৰিতভাৱেই বিহাৰৰ মুখ্যমন্ত্ৰী হিচাপে শপতগ্ৰহণ কৰিলে নীতিশ কুমাৰে৷ আজি অষ্টমবাৰৰ বাবে নীতিশ কুমাৰে বিহাৰৰ মুখ্যমন্ত্ৰী হিচাপে শপতগ্ৰহণ কৰে৷ এনডিএ মিত্ৰজোঁট চৰকাৰৰ মুখ্যমন্ত্ৰী পদ ত্যাগ কৰাৰ এদিন পাছত আৰু আৰজেডি, কংগ্ৰেছ আৰু অন্যান্য দলৰ সৈতে নতুন চৰকাৰ গঠনৰ দাবী জনোৱাৰ এদিন পছত আজি কুমাৰে শপতগ্ৰহণ কৰে৷ 

আৰজেডি নেতা তেজস্বী যাদৱে উপ-মুখ্যমন্ত্ৰী হিচাপে শপত গ্ৰহণ কৰে। নতুন চৰকাৰৰ কেবিনেট সম্প্ৰসাৰণ ১৫ আগষ্টৰ পাছতহে হ’ব বুলি জানিব পৰা গৈছে৷

বিহাৰৰ পৰিৱৰ্তিত ৰাজনীতিয়ে দেশৰ ৰাজনীতি সলনিৰ ইংগিত বহন কৰিছে৷ বিজেপিৰে মিত্ৰতাৰ অন্ত পেলাই বিহাৰৰ ৰাজনীতিত পুনৰ এবাৰ নিজৰ আধিপত্য ঘোষণা কৰিলে নীতিশ কুমাৰে৷  

অষ্টমবাৰৰ বাবে বিহাৰৰ মুখ্যমন্ত্ৰী হিচাপে শপতগ্ৰহণ কৰিয়েই নীতিশ কুমাৰে আক্ৰমণৰ লক্ষ্য কৰি লয় প্ৰধানমন্ত্ৰী মোদীক৷ বিহাৰৰ পৰাই নীতিশ কুমাৰৰ হুংকাৰ- ২০২৪ত প্ৰধানমন্ত্ৰী হ’ব নোৱাৰিব নৰেন্দ্ৰ মোদী৷ তেওঁ কয়, মোদীয়ে ২০১৪ চনত জিকিছিল, কিন্তু তেওঁ ২০২৪ চনত জিকিব নেকি?

যদিও নীতিশ কুমাৰে বাৰে বাৰে কেন্দ্ৰত বিজেপিক ক্ষমতাচ্যুত কৰিবলৈ বিৰোধী ঐক্যৰ দিশত কাম কৰাৰ কথা কৈছিল৷ পৰৱৰ্তী লোকসভা নিৰ্বাচনত তেওঁ প্ৰধানমন্ত্ৰী পদৰ প্ৰাৰ্থী হ’ব নেকি বুলি সোধাত তেওঁ কোনো পদৰ দাবীদাৰ নহয় বুলি উল্লেখ কৰে৷৷ তেওঁ কয়, প্ৰশ্নটো হ’ল, ২০১৪ চনত অহা ব্যক্তিজনে ২০২৪ চনত জিকিব নেকি?

লোকসভা নিৰ্বাচনৰ এবছৰ পাছত ২০২৫ত বিহাৰত নিৰ্বাচন অনুষ্ঠিত হ’ব। আৰু সেইবাবেই এতিয়া দেশৰ ৰাজনীতিত চলিছে নতুন সমীকৰণ৷ নীতিশ কুমাৰ ২০২৪ চনত প্ৰধানমন্ত্ৰী পদৰ প্ৰাৰ্থী হোৱাৰ পূৰ্ণ সম্ভাৱনা আছে৷ কিয়নো, বিজেপিক প্ৰত্যাহ্বান জনাব পৰাকৈ কংগ্ৰেছ দুৰ্বল হৈ পৰিছে আৰু বিৰোধী দল এতিয়াও ঐক্যবদ্ধ হোৱাৰ পৰা বহু দূৰত আছে। উপ-মুখ্যমন্ত্ৰী তেজস্বী যাদৱে কৈছে যে নীতিশ কুমাৰ হৈছে এই মুহূৰ্তত ভাৰতৰ আটাইতকৈ অভিজ্ঞ মুখ্যমন্ত্ৰী।

দেশৰ ৰাজনৈতিক বিশ্লেষকসকলে কেইবাবছৰধৰি এই তত্ত্বটো পোষণ কৰি আহিছে যে যদি কংগ্ৰেছে অগ্ৰণী ভূমিকা পালন কৰে তেন্তে নীতিশ কুমাৰ প্ৰধানমন্ত্ৰী মোদীৰ বিৰুদ্ধে বিৰোধী দলৰ প্ৰাৰ্থী হ’ব পাৰে। কালিলৈকে নীতিশ কুমাৰ জেডিইউ-বিজেপি মিত্ৰজোঁটত মুখ্যমন্ত্ৰী আছিল, যি ২০১৯ চনত একেলগে জয়ী হৈছিল। আৰু এতিয়া তেওঁ পুৰণি বন্ধু লালু যাদৱৰ আৰজেডিৰ সৈতে উভতি আহিছে, যাৰ পুত্ৰ নতুন চৰকাৰত তেওঁৰ উপ-মুখ্যমন্ত্ৰী৷ এয়া তেওঁলোকৰ ২০১৫ৰ মিত্ৰতাৰ এক নতুন সংস্কৰণ। কংগ্ৰেছ এই চৰকাৰত অন্যতম অংশীদাৰ হৈ আছে।

জেডিইউ-আৰজেডি-কংগ্ৰেছ চুক্তিৰ প্ৰথম সংস্কৰণ যাক ‘মহাগঠবন্ধন’ বা মহাজোঁট বুলি কোৱা হয়, তেওঁলোকে ২০১৫ চনত ক্ষমতা লাভ কৰিছিল। সেইটোও নীতিশ কুমাৰে বিজেপিৰ সৈতে সম্পৰ্ক ছিন্ন কৰাৰ পিছতহে আহিছিল, যাৰ ফলত দুই দশকৰ সম্পৰ্কৰ সমাপ্তি ঘটিছিল। তেওঁ দুবছৰৰ পিছত প্ৰধানমন্ত্ৰী মোদীৰ দলৰ সৈতে সম্পৰ্ক স্থাপন কৰে আৰু নতুনকৈ শপত লয়। জেডিইউ আৰু বিজেপি য়ে তেতিয়া ২০২০চনত একেলগে জয়ী হৈছিল। দুবছৰৰ পিছত আকৌ ঘটিল ৰাজনৈতিক অঘটন৷

নীতিশ কুমাৰে আজি কয় যে তেওঁ বিজেপিৰ সৈতে অংশীদাৰীত্বত ২০২০ চনৰ জয়ৰ পিছত মুখ্যমন্ত্ৰী হ’ব নিবিচাৰে। দলৰ (জেডিইউ) লোকসকলক সোধক, তেওঁলোকৰ কি হ্ৰাস কৰা হৈছে। মই মুখ্যমন্ত্ৰী হ’ব বিচৰা নাছিলোঁ৷ কিন্তু মোক চাপত ৰখা হৈছিল। মই আনকি দুমাহত সাংবাদিকৰ সৈতে কথা পতা নাই।

তেওঁ ২০১৫ চনৰ ফলাফল আৰু তেতিয়াৰ পৰা জেডিইউৰ আসন হ্ৰাসৰ কথা স্মৰণ কৰে। আৰু প্ৰধানমন্ত্ৰীক প্ৰত্যাহ্বান জনাই দেশৰ বিৰোধী ঐক্যক এক হ’বলৈ আহ্বান জনায়৷ এতিয়া পৰৱৰ্তী পদক্ষেপ হিচাপে ২০২৪ৰ লোকসভালৈ আৰজেডিক লগত লৈ আগুৱাব নীতিশ কুমাৰ৷ আৰু ৰথৰ সাৰথি হ’ব কংগ্ৰেছ৷ আৰু সেই অনুসৰি, পূৰ্বৰে পৰা মমতা বেনাৰ্জীয়ে চেষ্টা চলাই থকা বিৰোধী ঐক্য হয়তো শেষ মুহূৰ্তত সম্ভৱ হৈ উঠিবও পাৰে৷ আৰু বিৰোধীৰ প্ৰধানমন্ত্ৰীৰ প্ৰাৰ্থী হ’ব পাৰে নীতিশ কুমাৰ৷ যাৰ বাবে উপ-মুখ্যমন্ত্ৰী হিচাপে নিয়োগ কৰি বিহাৰৰ মুখ্যমন্ত্ৰীৰ আসনত তেজস্বীক বহুওৱাৰ গোপন পৰিকল্পনা ৰচি থৈছে নীতিশ কুমাৰে৷