লোকসভা ২০২৪ঃ নীতিশ,তেজস্বীৰ পাছত এইবাৰ ৰাহুল গান্ধীয়ে লগ কৰিব উদ্ধৱ থাকৰেক

নিৰ্ভৰযোগ্য সূত্ৰৰ পৰা পোৱা তথ্য অনুসৰি ৰাহুল গান্ধীয়ে উদ্ধৱ থাকৰেক মুম্বাইস্থিত তেওঁৰ বাসগৃহ মাতোশ্ৰীত সাক্ষাৎ কৰিব পাৰে। বিৰোধী দলৰ ঐক্য আৰু লোকসভা নিৰ্বাচনৰ প্ৰস্তুতি আৰু কৌশল সন্দৰ্ভত উদ্ধৱ থাকৰে আৰু ৰাহুল গান্ধীৰ মাজত আলোচনাৰ সম্ভাৱনা আছে।

উদ্ধৱ থাকৰেক সাক্ষাৎ কৰাৰ পূৰ্বে বৃহস্পতিবাৰে কংগ্ৰেছৰ সভাপতি মল্লিকাৰ্জুন খৰ্গেৰ সৈতে ৰাহুল গান্ধীয়ে এন চি পিৰ মুৰব্বী শাৰদ পাৱাৰক সাক্ষাৎ কৰে। শৰদ পাৱাৰেও এই বৈঠকত তৃণমূল কংগ্ৰেছ আৰু আম আদমী পাৰ্টিৰ দৰে দলক একত্ৰিত কৰাৰ ওপৰত জোৰ দিছিল। এই বৈঠকৰ অন্তত তিনিওজন নেতা খৰ্গে, পাৱাৰ আৰু ৰাহুলে কয় যে বিৰোধী দলসমূহক একত্ৰিত কৰাৰ প্ৰয়োজনীয়তা আছে আৰু সকলোৱে ইয়াৰ প্ৰতি দায়বদ্ধ।

ইয়াৰ পূৰ্বে বুধবাৰে নীতিশ কুমাৰে তেজস্বী যাদৱৰ সৈতে ৰাহুল গান্ধীক সাক্ষাৎ কৰিছিল। তেওঁক লগ পোৱাৰ পিছত খৰ্গে সংবাদ মাধ্যমক জনাইছিল, কালি নীতিশ জী, তেজস্বীয়ে আমাৰ সৈতে বিৰোধী ঐক্যৰ বিষয়ে আলোচনা কৰিছিল। আমি সকলোৱে মিলি গণতন্ত্ৰ, সংবিধান আৰু মত প্ৰকাশৰ স্বাধীনতা ৰক্ষাৰ বাবে কাম কৰিম।

এই বৈঠকটোও প্ৰয়োজনীয় কাৰণ শেহতীয়াকৈ শৰদ পাৱাৰে আদানী গোচৰৰ সন্দৰ্ভত কংগ্ৰেছৰ পৰা পৃথক মতামত দিছিল। শেহতীয়াকৈ প্ৰাক্তন কেন্দ্ৰীয় মন্ত্ৰী পাৱাৰে কৈছিল যে যদি আদানী বিষয়ত যুটীয়া সংসদীয় সমিতি গঠন কৰা হয়, তেন্তে কেন্দ্ৰত আৰু সংসদত এই তদন্তৰ ফলাফলত সন্দেহৰ সৃষ্টি হ'ব।