জনতাক দেখুৱাইহে জনমুখী আঁচনি! বৃহৎ কেলেংকাৰীয়ে জোকাৰিছে শিৱৰাজৰ মধ্যপ্ৰদেশ

ৰাজ্যখন মধ্য প্ৰদেশ৷ মুখ্যমন্ত্ৰী শিৱৰাজ সিং চৌহান৷ এতিয়া নিৰ্বাচন দুৱাৰডলিত৷ এতিয়া নিৰ্বাচনেই সেই সুযোগ তুলি ধৰিছে জনতাৰ সন্মুখত৷ গণতন্ত্ৰৰ সৌন্দৰ্য নিৰ্বাচন৷ সমাগত নিৰ্বাচনতেই জনতাৰ আদালতত জবাবদিহি হ’ব লাগিব কেলেংকাৰীৰ অভিযোগ উঠা মধ্য প্ৰদেশৰ চৰকাৰখনো৷ 

কংগ্ৰেছে অভিযোগ কৰিছে যে মধ্যপ্ৰদেশত সংঘটিত হৈছে ৭,৩০০ কোটি টকাৰ বৃহৎ কেলেংকাৰী৷ ২,০০০ কোটি টকাৰ ব্যাপম কেলেংকাৰী সংঘটিত হৈছে ৰাজ্যখনত৷ ২,৫০০ কোটি টকাৰ কেলেংকাৰী সংঘটিত হৈছে পেৰা মেডিকেল ছাত্ৰবৃত্তি কেলেংকাৰী৷ নাৰ্চিং কেলেংকাৰী সংঘটিত হৈছে ২,০০০ কোটি টকাৰ কেলেংকাৰী৷ একেদৰে, ৮০০ কোটি টকাৰ কেলেংকাৰী সংঘটিত হৈছে ‘পাটোৱাৰী ভৰ্তি’ত৷ এই অভিযোগক লৈ উত্তাল হৈছে এতিয়া মধ্য প্ৰদেশৰ ৰাজনীতি৷

কংগ্ৰেছৰ সাধাৰণ সম্পাদক প্ৰিয়ংকা গান্ধীয়ে বৃহস্পতিবাৰে মধ্য প্ৰদেশৰ ভাৰতীয় জনতা পাৰ্টি চৰকাৰক ‘২২৫ মাহৰ শাসনকালত ২৫০তকৈও অধিক কেলেংকাৰীত জড়িত’ বুলি অভিযোগ কৰে। ৰাজ্যৰ ৰাজধানী ভূপালৰ পৰা ৪০০ কিলোমিটাৰ পূবত জনজাতীয় অধ্যুষিত মাণ্ডলা জিলাত এখন ৰাজহুৱা সভাত ভাষণ দি তেওঁ চৰকাৰক জনজাতীয় লোকসকলৰ বাবে নিৰ্ধাৰিত প্ৰতিটো আঁচনিত দুৰ্নীতিত জড়িত থকাৰ অভিযোগ তোলে।

তেওঁ কয়, জনজাতীয় লোকসকলক জোতা আৰু ছাতি দিয়া বন্ধ কৰক আৰু তেওঁলোকক তেওঁলোকৰ অধিকাৰ দিয়ক, যাৰ ভিতৰত আছে ‘টেণ্ডু’ পাত সংগ্ৰহৰ ওপৰত বোনাচ, যিটো প্ৰাক্তন প্ৰধানমন্ত্ৰী ইন্দিৰা গান্ধীয়ে গ্ৰহণ কৰা পদক্ষেপত আৰম্ভ কৰা হৈছিল।

মা নৰ্মদা আৰু ভগৱান শিৱক অভিবাদন জনাই ভাষণ আৰম্ভ কৰি তেওঁ অভিযোগ কৰে, প্ৰায় ১.৫ লাখ ছোৱালী আৰু মহিলা সন্ধানহীন হৈ আছে। দৈনিক ১৭টাকৈ ধৰ্ষণ হয় মধ্য প্ৰদেশত, জনজাতীয় লোকসকলৰ ওপৰত হোৱা অত্যাচাৰত মধ্য প্ৰদেশ ১ নম্বৰ। এমজি-এনৰেগাৰ দৰে জনজাতীয় আৰু দলিতসকলৰ বাবে নিৰ্ধাৰিত আঁচনিসমূহ বন্ধ কৰা হৈছে। পুষ্টিকৰ খাদ্য, বৃত্তি, নিযুক্তি পৰীক্ষা আদিত কেলেংকাৰী সংঘটিত হৈছে। কেৱল ইয়াত কমিছনৰ বাবেহে জনজাতীয় লোকসকলৰ মাজত জোতা বিতৰণ কৰা হৈছে। বিদ্ৰূপাত্মকভাৱে, ইয়াৰ লোকসকলে প্ৰতিবাদ কৰাৰ সময়ত গুলীৰ সন্মুখীন হয়।

কংগ্ৰেছশাসিত ছত্তীশগড় আৰু ৰাজস্থানৰ চৰকাৰৰ আঁচনিসমূহৰ কথা বাৰে বাৰে উল্লেখ কৰি তেওঁ কয় যে কংগ্ৰেছ ক্ষমতালৈ আহিলে টেণ্ডু পাত সংগ্ৰহৰ ক্ষেত্ৰত জনজাতীয় লোকসকলক ৪,০০০ টকাকৈ দিয়া হ’ব।

উল্লেখযোগ্য যে মধ্য প্ৰদেশ, ছত্তীশগড়, ৰাজস্থান, মিজোৰাম আৰু তেলেংগানা নৱেম্বৰত বিধানসভা নিৰ্বাচনৰ দিশে আগবাঢ়িছে আৰু ফলাফল ৩ ডিচেম্বৰত ঘোষণা কৰা হ'ব।