বিজেপি নেতা কিৰিট সোমাইয়াৰ আপত্তিজনক ভিডিঅ’ ভাইৰেল

কংগ্ৰেছ আৰু উদ্ধৱ থাকৰে নেতৃত্বাধীন শিৱসেনাই সোমাইয়া আৰু শাসকীয় মিত্ৰজোঁটৰ ওপৰত তীব্ৰ সমালোচনা কৰি কয় যে এই ভিডিঅ’টোৱে তেওঁলোকৰ “চৰিত্ৰ আৰু প্ৰকৃত মুখ” উন্মোচন কৰিছে। এনেধৰণৰ আন কেইবাটাও ক্লিপও আছে বুলি দাবী কৰিছে।

ইপিনে সোমাইয়াই ভিডিঅ’টোৰ সত্যতাক লৈ প্ৰশ্ন উত্থাপন কৰি তদন্ত বিচাৰিছে।সোমাইয়া আৰু একনাথ সিন্দে নেতৃত্বাধীন চৰকাৰক আঘাত কৰি কংগ্ৰেছে কয় যে এই ভিডিঅ’টোৱে তেওঁলোকৰ প্ৰকৃত চৰিত্ৰৰ লগতে তেওঁলোকৰ ভণ্ডামিও উদঙাই দিছে।

কংগ্ৰেছৰ বিধায়ক যশোমতী ঠাকুৰে কয় যে “শাসকীয় মিত্ৰজোঁটৰ চৰিত্ৰ আৰু প্ৰকৃত মুখ আজি উন্মোচিত হৈছে। কিৰিট সোমাইয়াই বহু বিধায়ক আৰু সাংসদক ব্লেকমেইল কৰিছে। এতিয়া, আমি দেখিবলৈ পাইছোঁ যে তেওঁ আনকি কেইবাগৰাকীও মহিলাকো ব্লেকমেইল কৰিছে। মই শুনিছো যে আঠ ঘণ্টীয়া এটা ক্লিপ ওলাইছে৷ক্লিপটোৰ বাবে কিমান মহিলাক নিশ্চয় হাৰাশাস্তি আৰু অত্যাচাৰ কৰা হ’ল সেয়া মই কল্পনাও কৰিব নোৱাৰো।”মহিলাগৰাকীয়ে লগতে কয় যে, "সততে নৈতিকতা সম্পৰ্কে বক্তৃতা দিয়া বিজেপি নেতাসকলে কিৰিট সোমাইয়াক জবাবদিহি কৰি তেওঁৰ বিৰুদ্ধে ব্যৱস্থা লোৱাৰ সাহস থকা উচিত। তেওঁৰ বিৰুদ্ধে প্ৰতাৰণামূলক ৰাজহুৱা জীৱন যাপন কৰাৰ অভিযোগ উত্থাপন হৈছে।"

সোমাইয়াৰ নাম উল্লেখ নকৰাকৈয়ে শিৱসেনাৰ নেতা সঞ্জয় ৰাউটে বালাচাহেব থাকৰেৰ উদ্ধৃতি দি কয় যে "যিজনক নিজৰ কৰ্মৰ দ্বাৰা মৃত্যুবৰণ কৰিবলৈ গৈ আছে তেওঁক ধৰ্মৰে হত্যা নকৰিব৷আমাৰ ওচৰত শিৱসেনাৰ সন্মানীয় প্ৰতিষ্ঠাপক বালাচাহেব থাকৰেৰ মূল্যবোধ আছে।" 

ইপিনে সোমাইয়াই উপ-মুখ্যমন্ত্ৰী দেৱেন্দ্ৰ ফাড়নাবিছলৈ পত্ৰ লিখিছে যে তেওঁ কেতিয়াও কোনো মহিলাক নিৰ্যাতন চলোৱা নাই। তেওঁ "ভিডিঅ'"ৰ সত্যতাৰ তদন্তৰ দাবী জনাইছে।