নদুৱাৰৰ দক্ষিণ বালিজুৰিত সম্প্ৰীতিৰ নিদৰ্শন দাঙি ধৰিলে এখন বিবাহে

উল্লেখযোগ্য যে যিটো সময়ত চৰকাৰে গোৰ্খা জনগোষ্ঠীক অসমীয়া জাতিৰ অবিচ্ছেদ্য অংগ বুলি কৈ আহিছে তেনে সময়তে কৃষ্ণ বৰা নামৰ যুৱকজনে গোৰ্খা জনগোষ্ঠীৰ কল্পনা নেৱাৰ নামৰ কন্যাগৰাকীৰ সৈতে সম্পূৰ্ণ সামাজিক নীতি-নিয়মেৰে বিবাহ পাশত আবদ্ধ হয় । 

বৃহত্তৰ দক্ষিণ বালিজুৰি অঞ্চলৰ বালিজুৰি ‘ক’ শাখা আৰু বালিজুৰি ‘খ’ শাখা নামৰ এই দুইখন গাঁৱৰ দুটাকৈ পৰিয়ালৰ দুই যুৱক-যুৱতীয়ে এনেদৰে সমাজৰ বাবে কঢ়িয়াই আনিলে ঐক্য- সম্প্ৰীতি আৰু সমন্বয়ৰ এক বিশেষ বাৰ্তা । প্ৰায় পাঁচ কিলোমিটাৰ পথ খোজকাঢ়ি দৰা আহিল কইনাৰ ঘৰলৈ৷ কইনা নিবলৈ দৰাৰ সৈতে অহা সকলো পুৰুষ-মহিলা, যুৱক-যুৱতীয়ে নাচি-বাগি আহি কইনাৰ বাসগৃহৰ পদূলিত উপস্থিত হোৱা দেখি কইনাৰ পিতৃ-মাতৃ আৰু পৰিয়ালৰ লোকসকলৰ লগতে গাঁওবাসী ৰাইজে ধৰ্মীয় ৰীতি-নীতিৰ মাজেৰেই জনালে বিপুল আদৰণি।

গাঁও দুখনৰ অসমীয়া পৰিয়ালৰ নাৰায়ণ বৰাৰ পুত্ৰ  কৃষ্ণ বৰা আৰু গোৰ্খা জনগোষ্ঠীয় পৰিয়ালৰ শ্যাম নেৱাৰৰ কন্যা কল্পনা নেৱাৰ এই দুই যুৱক- যুৱতীয়ে আজি হিন্দু ধৰ্মৰ সম্পূৰ্ণ ৰীতি-নীতি আৰু পৰম্পৰা অনুসৰি হোমাগ্নিক সাক্ষী কৰি বিবাহপাশত আবদ্ধ হৈ যুগ্ম জীৱনৰ পাতনি মেলা বিষয়টো বৰ্তমান চৰ্চাৰ কেন্দ্ৰবিন্দু হৈ পৰিছে৷ ৰভাতলীত সকলো ৰাইজে মিলি দৰা আৰু কইনা দুয়োকে আশীৰ্বাদ দিয়া পৰিলক্ষিত হয়।

উৎসঃ দৈনিক জনমভূমি