২৭ এপ্ৰিলত কোকৰাঝাৰত মাৰাথন দৌৰ প্ৰতিযোগিতা ; দেশৰ বিভিন্ন প্ৰান্তৰ এহেজাৰ প্ৰতিযোগীয়ে লব অংশ

শনিবাৰে কোকৰাঝাৰত এক সংবাদ মেল সম্বোধন কৰি ইউপিপিএলৰ যুৱ গোটৰ সাধাৰণ সম্পাদক (প্ৰশাসনিক) ড° ছাংগ্ৰাং ব্ৰহ্মই এই বিষয়ে সদৰী কৰি জানিবলৈ দিয়া মতে ২৭ এপ্ৰিলৰ পুৱা ছয় বজাত কোকৰাঝাৰ জিলাৰ বনৰগাঁৱৰ পৰা আৰম্ভ হ’বলগীয়া উক্ত মাৰাথন দৌৰ প্ৰতিযোগিতাৰ আনুষ্ঠানিকভাৱে পতাকা জোকাৰি শুভাৰম্ভ কৰিব বিটিআৰ প্ৰধান প্ৰমোদ বড়োৱে ৷

বনৰগাঁৱৰ পৰা আৰম্ভ হবলগীয়া মাৰাথন দৌৰ চন্দ্ৰপাৰা, ঘোষকাটা, দোতমা হৈ ত্ৰিশ কিলোমিটাৰ পথ পৰিভ্ৰমণ কৰি ছেৰফাংগুৰিত অন্ত পৰিব ৷

উক্ত মাৰাথন দৌৰ প্ৰতিযোগিতাত বিটিআৰ, অসম ,উত্তৰ-পূৱসহ বিহাৰ, উত্তৰ প্ৰদেশ আৰু হাৰিয়ানাৰ লগতে দেশৰ বিভিন্ন প্ৰান্তৰ এহেজাৰ প্ৰতিযোগীয়ে অংশ গ্ৰহণ কৰিব ৷

পুৰুষ আৰু মহিলা দুয়োটা শাখাতে অনুষ্ঠিত হবলগীয়া মাৰাথন দৌৰ প্ৰতিযোগিতাৰ প্ৰথম স্থান দখল কৰাক ৫০ হাজাৰ টকা ,দ্বিতীয় স্থান দখল কৰাক ২৫ হাজাৰ টকা , তৃতীয় স্থান দখল কৰাক ১৫ হাজাৰ টকা সহ ট্ৰফী প্ৰদান কৰা হব ৷ তদুপৰি প্ৰথম , দ্বিতীয় আৰু তৃতীয় স্থানৰ পিছত ১০ টা স্থান দখল কৰাক ১০ হাজাৰকৈ টকা আগবঢ়োৱা হব ৷ 

উল্লেখ্য যে এখন সুন্দৰ যুৱ সমাজ আৰু ভয়াৱহ ড্ৰাগছ মুক্ত বড়োলেণ্ড গঠনৰ বাবে সজাগতা সৃষ্টি কৰাটোৱেই মাৰাথন দৌৰৰ মুখ্য উদ্দেশ্য বুলিও সংবাদমেলত কয় ইউপিপিএলৰ যুৱ গোটৰ সাধাৰণ সম্পাদক ড° ছাংগ্ৰাং ব্ৰহ্মই ৷