ডিজিটেল ডেস্কঃ ইছলাম ধৰ্মাৱলম্বী লোকসকলৰ পৱিত্ৰ ঈদলৈ মাজত মাত্ৰ আৰু কেইটামান দিন। ৰমজান মাহৰ ৰোজাৰ অন্তত ঈদ পালন কৰিবৰ বাবে এতিয়া ব্যস্ততামুখৰ পৰিৱেশৰ সৃষ্টি হৈছে। ঈদৰ প্ৰাক্ষণত মহানগৰৰ প্ৰতিখন বজাৰত এতিয়া গ্রাহকসকলে ব্যাপক ভিৰ কৰাটো পৰিলক্ষিত হৈছে।
ফাঁচিবজাৰ, পল্টনবজাৰ, গণেশগুৰি, বেলতলা আদিকে ধৰি প্ৰতিখন বজাৰত গ্ৰাহকৰ ভিৰৰ বিপৰীতে ব্যৱসায়ীসকলো অত্যধিক ব্যস্ত হৈ পৰিছে। মহানগৰৰ শ্বপিং মলসমূহতো ঈদৰ প্ৰাক মুূূূহূৰ্তত গ্ৰাহকক আকৃষ্ট কৰিবৰ বাবে বিশেষ ৰেহাই মূল্যত সামগ্রী বিক্ৰী কৰা দেখিবলৈ পোৱা গৈছে।
ঈদ উপলক্ষে মহানগৰৰ বজাৰত ব্যৱসায়ীসকলে বিভিন্ন ধৰণৰ খাদ্য-সামগ্রী বিক্রী কৰিছে। চেৱৈ, খেজুৰ আদিকে ধৰি বিভিন্ন প্ৰকাৰৰ সুস্বাদু খাদ্যৰে উভৈনদী হৈ পৰিছে মহানগৰৰ প্ৰতিখন বজাৰ। বিশেষকৈ স্থানীয় ব্যৱসায়ীৰ লগতে বহিঃৰাজ্যৰ পৰা একাংশ ব্যৱসায়ীয়ে প্ৰতিবছৰেই ঈদৰ সময়ছোৱাত এনেদৰে খাদ্য-সামগ্ৰীৰ দোকান দি এক লাভজনক ব্যৱসায় কৰি আহিছে।
খাদ্য-সামগ্ৰীৰ ভিতৰত অধিকাংশ গ্রাহকেই বজাৰত উপলব্ধ ৰং-বিৰঙৰ চেৱৈ অধিক ক্ৰয় কৰা বুলি ব্যৱসায়ীসকলে জানিবলৈ দিছে। ইয়াৰ লগতে ঈদৰ সময়ছোৱাত মহানগৰৰ বজাৰত আঁতৰ আৰু অন্যান্য সুগন্ধযুক্ত সামগ্ৰীৰ চাহিদাও বৃদ্ধি পোৱাৰ কথা ব্যৱসায়ীসকলে সদৰী কৰিছে।
কিন্তু ঈদৰ সময়ছোৱাত প্রতি বছৰৰ দৰে এইবাৰো মহানগৰৰ বজাৰত সৃষ্টি হোৱা খাদ্য-সামগ্ৰীৰ মূল্যবৃদ্ধিয়ে সাধাৰণ গ্রাহকসকলক অসুবিধাৰ সম্মুখীন কৰিছে। তথাপি ঈদ উদ্যাপনৰ বাবে অধিক দাম দি হ'লেও গ্রাহকসকলে সামগ্রী ক্রয় কৰিবলৈ বাধ্য হৈ পৰিছে।
উৎসঃ দৈনিক জনমভূমি
Leave A Comment