কামাখ্যা মন্দিৰৰ পুঁজিত ৭.৬২ কোটি টকাৰ জালিয়াতি! ইডিৰ তদন্তত ভয়ংকৰ সত্য পোহৰলৈ

১৮৬০ চনৰ ভাৰতীয় দণ্ডবিধিৰ বিভিন্ন ধাৰাত গুৱাহাটীৰ ফৌজদাৰী তদন্ত বিভাগে দাখিল কৰা এফআইআৰৰ পৰাই এই তদন্তৰ সূত্ৰপাত ঘটিছে।

ইডিৰ পৰা প্ৰকাশিত এক বিবৃতিত কোৱা হৈছে যে মা কামাখ্যা মন্দিৰৰ ধন লুটিবলৈ এই প্ৰাক্তন বিষয়াসকলে বৈদ্যুতিক সামগ্ৰী, চিমেণ্ট, চাফাই ৰাসায়নিক পদাৰ্থ, জনশক্তি আৰু অন্যান্য সেৱাৰ দৰে সামগ্ৰী যোগানৰ আশ্ৰয় লৈছিল।

বৰ্তমান বন্ধ হৈ থকা কামাখ্যা দেৱোত্তৰ বৰ্ডৰ প্ৰাক্তন প্ৰশাসক ৰিজু প্ৰসাদ শৰ্মা, প্ৰয়াত ধীৰাজ শৰ্মা, নৱকান্ত শৰ্মা আৰু ব’ৰ্ডৰ একাংশ প্ৰাক্তন বিষয়াৰ আৱাসিক চৌহদত বুধবাৰে ইডিয়ে অভিযান চলায়। ইডিয়ে জনোৱা মতে, অভিযানৰ সময়ত পূৰ্বৰ ব’ৰ্ডৰ বিষয়া আৰু তেওঁলোকৰ পৰিয়ালৰ সদস্যৰ নামত ১.৮২ কোটি টকাৰ বীমা পলিচি জব্দ কৰা হৈছে। 

ব’ৰ্ডৰ বিষয়া আৰু তেওঁলোকৰ পৰিয়ালৰ সদস্যৰ স্থাৱৰ সম্পত্তি আৰু ব্যৱসায়িক সত্তা সম্পৰ্কীয় নথি-পত্ৰও উদ্ধাৰ কৰা হয়। সংশ্লিষ্ট ব্যক্তিসকলৰ ২৭টা বেংক একাউণ্টো ধৰা পৰে। ধন সৰবৰাহৰ গোচৰটো অসম আৰক্ষী চি আই ডিৰ এফ আই আৰৰ সৈতে জড়িত, য’ত অভিযোগ কৰা হৈছে যে ২০০৩ চনৰ পৰা ২০১৯ চনৰ ভিতৰত ব’ৰ্ডৰ বিষয়াসকলে ৭.৬২ কোটি টকাৰ ধন ‘অপব্যৱহাৰ’ কৰিছিল।

ইডিৰ অভিযানক লৈ কামাখ্যা দেৱালয় পৰিচালনা সমিতিৰ দলৈ  কবিন্দ্ৰ প্ৰসাদ শৰ্মাই প্ৰতিক্ৰিয়া প্ৰকাশ কৰি কয় যে ‘‘শক্তিপীঠ মা কামাখ্যাৰ নামত অহা প্ৰতিটো ধন ঘূৰাই পাব লাগিব। মাৰ ধন আত্মসাৎ কৰি কোনেও ৰেহাই নাপাব। প্ৰতিটো টকা উভতাই লাগিব। ইডিৰ অভিযানক লৈ আমি সুখী।’’ 

উল্লেখ্য যে বলপূৰ্বকভাৱে ২০০৩ চনত দেৱোত্তৰ বৰ্ডে লৈছিল পৰিচালনাৰ ভাৰ। ৰজাদিনৰ পৰা চলি অহা বৰদেউৰী সমাজক উৎখাত কৰিছিল দেৱোত্তৰ ব’ৰ্ডে।

এই কাৰ্যৰ নেতৃত্বত আছিল ৰিজু প্ৰসাদ শৰ্মাসহ ৬ জনীয়া দল। এইদলটোৱে য'ধে ম'ধে ধন আত্মসাৎ কৰিছিল শক্তিপীঠৰ।

নিজৰ লাভালাভৰ স্বাৰ্থত গঠন হৈছিল দেৱোত্তৰ ব’ৰ্ড।

তদন্তকাৰী সংস্থাক ঘটনাত জড়িত সকলোকে উৎখাত কৰিবলৈ আহ্বান দলৈ কবিন্দ্ৰ প্ৰসাদ শৰ্মাৰ।