গোলাঘাটত মৰ্মান্তিক ঘটনা! নিঃসংগ মাতৃৰ শোৱাপাটীতে অগ্নিদগ্ধ হৈ মৃত্যু

জানিব পৰা মতে, মঙলবাৰে পুৱা বৃদ্ধাগৰাকীৰ বাসগৃহত ধোঁৱাৰ উৎস দেখি স্থানীয় লোকে ঘৰৰ ভিতৰত প্ৰৱেশ কৰি বৃদ্ধাগৰাকী শুই থকা অবস্থাতে বিছনাত অগ্নিদগ্ধ হোৱা প্রত্যক্ষ কৰে। লগে লগে ৰাইজে পানী ঢালি জুই নুমুৱাবলৈ চেষ্টা কৰে যদিও ইতিমধ্যে বৃদ্ধাগৰাকী শোৱাপাটীতে মৃত অৱস্থাত উদ্ধাৰ হয়। বৃদ্ধাগৰাকী অগ্নিদগ্ধ হৈ থকাৰ সময়ত ঘৰৰ দৰ্জা-খিৰিকী খোলা অৱস্থাত আছিল বুলি প্রত্যক্ষদর্শীয়ে প্ৰকাশ কৰিছে। পাছত ঘটনাস্থলীত গোলাঘাট আৰক্ষী আৰু দণ্ডাধীশৰ এটা দল উপস্থিত হৈ মৃতদেহ মৰণোত্তৰ পৰীক্ষাৰ বাবে গোলাঘাটৰ শ্বহীদ কুশল কোঁৱৰ অসামৰিক চিকিৎসালয়লৈ প্ৰেৰণ কৰি তদন্ত প্ৰক্ৰিয়া আৰম্ভ কৰিছে। 

উল্লেখযোগ্য যে বৃদ্ধাগৰাকীৰ এজন পুত্ৰ যোৰহাটত মুকলি কাৰাগাৰত কাৰাধ্যক্ষ হিচাপে কৰ্মৰত, এগৰাকী কন্যা দেৱৰাজ ৰয় মহাবিদ্যালয়ৰ প্ৰবক্তা আৰু তেওঁ গোলাঘাট নগৰতে বেলেগকৈ বসবাস কৰে। আন এজন অভিযন্তা পুত্র গুৱাহাটীত থাকে। এগৰাকী কন্যা বিবাহ সূত্রে বোকাখাতত থকাত বৃদ্ধাগৰাকীয়ে একেবাৰে অকলশৰীয়াভাৱে জানপাৰৰ নিজাঘৰত কটাবলগীয়া হয়। কি পৰিস্থিতিত কেনেদৰে বৃদ্ধাগৰাকী এনেদৰে শোৱাপাটীত অগ্নিদগ্ধ হৈ মৃত্যুক আঁকোৱালি ল'বলগীয়া হ'ল সেয়া গভীৰ ৰহস্যৰ আৱৰ্তত। 

বিশেষকৈ বৃদ্ধাগৰাকীৰ শোৱাকোঠাত চিগাৰেটৰ টুকুৰা, চাধাৰ টেমা আদি উদ্ধাৰ হোৱা ঘটনাই এই মৃত্যুত অধিক ৰহস্যৰ সৃষ্টি কৰিছে। আনহাতে, মুখ্যমন্ত্রী হিমন্ত বিশ্ব শর্মাই চৰকাৰী চাকৰিত নিয়োজিত বিষয়া-কর্মচাৰীসকলৰ পিতৃ-মাতৃক অৱহেলা নকৰিবলৈ বাৰে বাৰে নিৰ্দেশ দি অহাৰ পাছতো মৃত্যু হোৱা দুৰ্ভগীয়া বৃদ্ধা মহিলাগৰাকীৰ এগৰাকী প্রবক্তা কন্যা আৰু এজন কাৰাধ্যক্ষ পুত্ৰ আৰু এজন অভিযন্তা পুত্রই মুখ্যমন্ত্ৰীৰ নিৰ্দেশনাক বুঢ়া আঙুলি দেখুৱাইছে বুলি সন্দেহ আৰু ক্ষোভ প্রকাশ কৰে স্থানীয় ৰাইজে। 

ইতিমধ্যে গুৱাহাটীৰ পৰা ফৰেনচিক পৰীক্ষাৰ বাবে এটা দল গোলাঘাটত উপস্থিত হৈছে আৰক্ষীৰ তদন্তৰ পাছতহে প্রকৃত ৰহস্য অৱশ্যে উন্মোচিত হ'ব।

উৎস- দৈনিক জনমভূমি