এতিয়াৰে পৰা চৰকাৰী কৰ্মচাৰীয়ে ব্যৱহাৰ কৰিব নোৱাৰিব গুগল ড্ৰাইভ, ভিপিএন; কেন্দ্ৰীয় চৰকাৰৰ কঠোৰ সিদ্ধান্ত

ডিজিটেল ডেস্ক: ভাৰত চৰকাৰে ভাৰত চৰকাৰৰ অধীনস্থ কৰ্মচাৰীসকলক গুগল ড্ৰাইভ, আৰু ড্ৰপবক্সৰ দৰে তৃতীয় পক্ষ আৰু বেচৰকাৰী ক্লাউড প্লেটফৰ্ম ব্যৱহাৰ কৰাত নিষেধাজ্ঞা আৰোপ কৰিছে। চৰকাৰী কৰ্মচাৰীসকলকো ভাৰ্চুৱেল প্ৰাইভেট নেটৱৰ্ক (ভিপিএন) সেৱা ব্যৱহাৰ কৰাত বাধা দিয়া হৈছে।

শেহতীয়াকৈ, নৰ্ডভিপিএন আৰু এক্সপ্ৰেছ ভিপিএনৰ দৰে কিছুমান জনপ্ৰিয় ভিপিএন সেৱা প্ৰদানকাৰীয়ে ভাৰতৰ পৰা নেটৱৰ্ক আঁতৰোৱাৰ কথা ঘোষণা কৰিছে। শেহতীয়াকৈ দেশৰ নতুন ভিপিএন নীতি ঘোষণাৰ পাছতে এই পদক্ষেপ লোৱা হৈছে।

কেইবাটাও সংবাদ মাধ্যমৰ প্ৰতিবেদন অনুসৰি, এই নিৰ্দেশটো ৰাষ্ট্ৰীয় তথ্য কেন্দ্ৰই (এনআইচি) সদৰী কৰিছে আৰু সকলো মন্ত্ৰণালয় আৰু বিভাগলৈ প্ৰচাৰৰ বাবে প্ৰেৰণ কৰিছে৷ এই নিৰ্দেশটো ভাৰত চৰকাৰৰ ইলেক্ট্ৰনিক্স আৰু তথ্য প্ৰযুক্তি মন্ত্ৰণালয়ে অনুমোদন জনাইছে৷ 

চৰকাৰে নতুন ভিপিএন নীতি ঘোষণা কৰাৰ কেইসপ্তাহমানৰ পাছতে এই পদক্ষেপটো কাৰ্যকৰী হৈছে, য’ত ভিপিএন সেৱা প্ৰদানকাৰী আৰু ডাটা কেন্দ্ৰ কোম্পানীবোৰে পাঁচ বছৰলৈকে ব্যৱহাৰকাৰীৰ তথ্য সংৰক্ষণ কৰিব লাগিব।

চৰকাৰী কৰ্মচাৰীসকলক চৰকাৰী যোগাযোগৰ বাবে কোনো বাহ্যিক ইমেইল সেৱা ব্যৱহাৰ নকৰিবলৈ আৰু অননুমোদিত তৃতীয় পক্ষৰ ভিডিঅ’ কনফাৰেন্সিং বা সহযোগিতা সঁজুলি ব্যৱহাৰ কৰিহে সংবেদনশীল আভ্যন্তৰীণ সভা আৰু আলোচনা কৰিবলৈ কোৱা হৈছে। ইয়াৰ উপৰিও, ভাৰত চৰকাৰে কৰ্মচাৰীসকলক আভ্যন্তৰীণ চৰকাৰী নথিপত্ৰ স্কেন কৰাৰ বাবে কোনো বাহ্যিক মোবাইল এপ-আধাৰিত স্কেনাৰ সেৱা ব্যৱহাৰ নকৰিবলৈ নিৰ্দেশ দিছে।

উল্লেখ্য যে, ২০২০ চনত টিকটক আৰু পাবজী গেমৰ সৈতে ভাৰতত আটাইতকৈ জনপ্ৰিয় ডকুমেণ্ট স্কেনাৰ এপ ‘কেমস্কেনাৰ’ নিষিদ্ধ কৰা হৈছিল।