টেবুল টেনিছৰ গ্ৰুপ মেচত অসমৰ জয়; ৰাষ্ট্ৰীয় ক্ৰীড়াত সৰ্বাধিক অংশ লোৱাৰ অভিলেখ বনগীতাৰ

উল্লেখ্য যে উত্তৰাখণ্ড ৰাষ্ট্ৰীয় ক্ৰীড়া বনগীতাৰ কেৰিয়াৰৰ ষষ্ঠখন গেমছ৷ ২০০৭ ত গুৱাহাটীত অনুষ্ঠিত ৩৩ সংখ্যক ৰাষ্ট্ৰীয় ক্ৰীড়াৰ লনবলত অংশ লৈ বৰ্ণিল কেৰিয়াৰৰ আৰম্ভনি কৰা বনগীতাই ক্ৰমাগত ছখন ৰাষ্ট্ৰীয় ক্ৰীড়াত অসমক প্ৰতিনিধিত্ব কৰাৰ সমান্তৰালকৈ প্ৰতিখন গেমছতে পদক অৰ্জনো কৰিবলৈও সক্ষম হৈছে৷

২০০৭ ৰ পৰা ২০২৫ লৈ ১৮ বছৰীয়া বিৰামহীন ক্ৰীড়া যাত্ৰাত বনগীতাই ৰাষ্ট্ৰীয় ক্ৰীড়াত চাৰিটা সোণৰ লগতে তিনিটা ৰূপৰ পদক জয় কৰিবলৈ সক্ষম হৈছে৷ গুৱাহাটীৰ অভিষেক ৩৩ সংখ্যক ৰাষ্ট্ৰীয় ক্ৰীড়াত সোণ জয়ৰে কেৰিয়াৰৰ আৰম্ভনি কৰা অসম কন্যাই উত্তৰাখণ্ডতো ৰাজ্যক সোণ দিবলৈ সক্ষম হয়৷ ইয়াৰপূৰ্বে ২০১১ ৰ ঝাৰখণ্ড আৰু ২০২৩ ৰ গোৱা ৰাষ্ট্ৰীয় ক্ৰীড়াতো তেওঁ সোণ লাভ কৰিছিল৷ বিপৰীতে ২০১৫ ৰ কেৰালা তথা ২০২২ ৰ গুজৰাট ৰাষ্ট্ৰীয় ক্ৰীড়াত ৰূপ জয় কৰে৷ গুৱাহাটীৰ ৩৩ সংখ্যক ৰাষ্ট্ৰীয় ক্ৰীড়াত অংশ লোৱা দুজন খেলুৱৈয়ে এইবাৰ উত্তৰাখণ্ডৰ অসম দলত আছে৷ এগৰাকী বনগীতা আৰু আনগৰাকী অসম দলৰ চিফ দ্য মিছন অভিজিত ভট্টাচাৰ্য৷

ইফালে, চলিত ৩৮ সংখ্যক ৰাষ্ট্ৰীয় ক্ৰীড়াত আজি অসমৰ পুৰুষ দলে টেবুল টেনিছৰ গ্ৰুপ মেচত অংশ লৈ প্ৰথমখন খেলত উত্তৰ প্ৰদেশক ৩-০ ৰ ব্যৱধানত পৰাস্ত কৰে৷ শাংকব গৌতম বৰুৱাই ১১-৭, ৭-১১, ১১-২, ১১-৩ ত জয়লাভ কৰি অসমক আৰম্ভনি দিয়াৰ পাছত অগ্নিৱ ভাস্কৰ গোঁহায়ে ১১-৩, ১১- ৯, ১৩-১১ ৰ পোনপটীয়া ব্যাৱধানত জয়ৰে অগ্ৰগতি ২-০ কৰে৷ আনহাতে, প্ৰিয়ানুজ ভট্টাচাৰ্যই পাঁচটা ছেটৰ মাৰাথন মেচত ১১- ৯, ৮-১১,  ৯-১১, ১২-১০, ১১-৮ ত জয়লাভ কৰি অসমক গুৰুত্বপূৰ্ণ জয় দিয়ে৷ গ্ৰুপৰ বাকী দুখন মেচ অসমে তেলেংগনা আৰু তামিলনাডুৰ বিৰুদ্ধে খেলিব৷ ইফালে, মহিলাৰ লং জাম্পত অসমৰ অম্বিকা নাৰ্জাৰীয়ে ৬.০৩ মিটাৰৰ প্ৰদৰ্শনৰে চতুৰ্থ স্থানত থাকে৷