ভাৰতীয় দবা দলৰ ঐতিহাসিক জয়ত জপিয়াই পৰিল অমিতাভ বচ্চন ; ছ’চিয়েল মিডিয়াৰ জৰিয়তে জনাই অভিনন্দন

বচ্চনে এটা আৱেগিক পোষ্ট লিখি নিজৰ গৌৰৱ আৰু আনন্দ প্ৰকাশ কৰি দলৰ জয়ৰ ফটো শ্বেয়াৰ কৰে ৷ তাত তেওঁ কেপচন দি এটা সুন্দৰ বাৰ্তা লিখি দিয়ে। তেওঁ লিখিছে, ‘দবা অলিম্পিয়াডত ভাৰতৰ বাবে এক মহান সফলতা। দবা খেলুৱৈসকললৈ সমগ্ৰ ভাৰতবৰ্ষই কৃতজ্ঞ। তিৰংগা উত্তোলন কৰি থাকোঁতে আমাৰ বুকুখন গৌৰৱেৰে ফুলি উঠিছিল।’ ৮১ বছৰীয়া ছুপাৰষ্টাৰগৰাকীৰ এই পোষ্টত ৰাষ্ট্ৰীয় গৌৰৱৰ প্ৰতিফলন ঘটিছে।

সদ্য সমাপ্ত হোৱা দবা অলিম্পিয়াডত ভাৰতৰ পুৰুষ আৰু মহিলা দলে ইতিহাস ৰচনা কৰে ৷ নিজ নিজ শাখাত প্ৰথমবাৰৰ বাবে স্বৰ্ণ পদক লাভ কৰি দেশৰ একেটা সংস্কৰণৰ প্ৰতিযোগিতাতে দুটাকৈ স্বৰ্ণ পদক লাভ কৰে। প্ৰতিযোগিতাখনৰ অন্তিম ৰাউণ্ডত ডি গুকেশ, আৰ প্ৰাগ্নানন্দ, অৰ্জুন এৰিগাইছি, বিদিত গুজৰাটি আৰু পন্তলা হৰিকৃষ্ণক লৈ গঠিত ভাৰতীয় পুৰুষৰ দলটোৱে স্লোভেনিয়াক পৰাস্ত কৰি স্বৰ্ণ পদক অৰ্জন কৰে।

ডি গুকেশ আৰু অৰ্জুন এৰিগাছিৰ এই জয়েৰে ভাৰতে ২-০ ত অগ্ৰগতি লাভ কৰি স্বৰ্ণ পদক লাভৰ আশ্বাস দিয়ে। পিছত ফাইনেল ৰাউণ্ডত প্ৰাগ্নানন্দেও নিজৰ খেলত জয়লাভ কৰে আৰু বিদিতে ড্ৰ’ত খেলখন সমাপ্ত কৰে। ভাৰতে স্লোভেনিয়াক ৩.৫-০.৫ ত পৰাস্ত কৰি স্বৰ্ণ পদক লাভ কৰে। ইফালে হৰিকা দ্ৰোণাৱল্লী, আৰ বৈশালী, দিব্যা দেশমুখ, ভান্টিকা আগৰৱাল আৰু তানিয়া সচদেৱে গঠিত ভাৰতীয় মহিলা দবা দলটোৱেও আজাৰবাইজানক ৩.৫-০.৫ ত পৰাস্ত কৰি স্বৰ্ণ পদক লাভ কৰে। চূড়ান্ত ৰাউণ্ডত নিজ নিজ মেচত জয়লাভ কৰে হৰিকা দ্ৰোণৱল্লী, দিব্য দেশমুখ আৰু বন্তিকা আগৰৱালে। আনহাতে, আৰ বৈশালীয়ে উলভিয়া ফাটালিয়েভাৰ বিৰুদ্ধে নিজৰ মেচখন ড্ৰ’ কৰে।