ইতিহাস ৰচনা কৰিলে ভাৰতে; প্ৰথমবাৰলৈ থমাছ কাপৰ ফাইনেলত ভাৰতীয় বাহিনী

চৈয়দ মোডী, প্ৰকাশ পাডুকন, পুল্লেলা গোপীচান্দ – তেওঁলোকৰ কেৰিয়াৰৰ শীৰ্ষত থাকোঁতেও তেওঁলোকৰ কোনেও সফল হোৱা নাছিল। কিন্তু কিদাম্বি শ্ৰীকান্ত, এইচ এছ প্ৰণয়ে সেই অসাধ্য সাধন কৰি দেখুৱালে। অৱশেষত ৭৩ বছৰৰ খৰাঙৰ অৱসান ঘটিল। থমাছ কাপৰ ইতিহাসত ভাৰতে প্ৰথমবাৰৰ বাবে ফাইনেলত উপনীত হৈছে। শেষবাৰৰ বাবে ৪৩ বছৰ আগতে ভাৰতে এটা পদক জয় কৰিছিল। শ্ৰীকান্ত বাহিনীয়ে বৃহস্পতিবাৰেই পদকটো নিশ্চিত কৰিছিল যদিও শুকুৰবাৰে, তেওঁলোকে ইয়াক আৰু এখোজ আগুৱাই নিলে। ভাৰতে শক্তিশালী ডেনমাৰ্কক পৰাস্ত কৰি ফাইনেললৈ অগ্ৰসৰ  হ’ল।

আজিৰ দিনটোতে ভাৰতে বেংককত মালয়েছিয়াৰ দৰে ডেনমাৰ্কক ৩-২ ব্যৱধানত পৰাস্ত কৰে। যিসকলে মালয়েছিয়াৰ বিৰুদ্ধে জয়ী হৈছিল, তেওঁলোকে ডেনমাৰ্কৰ বিৰুদ্ধেও ভাৰতক বিজয় প্ৰদান কৰিছিল। লক্ষ্য সেন প্ৰথম খন খেলত নামিছিল যদিও তেওঁ এই খেলত পৰাজিত হয়। তেওঁ ভিক্টৰ এক্সেলচেনৰ হাতত ১৩-২১, ১৩-২১ ব্যৱধানত পৰাজিত হয়। ইয়াৰ পাছত সাত্বিক ছাইৰাজ ৰানকিৰেড্ডী আৰু চিৰাগ চেট্টীৰ যুটিয়ে কিম অষ্ট্ৰুপ আৰু মেথিয়াছ ক্ৰিষ্টিয়ানছেনৰ যুটিক ২২-২০, ২১-২৩, ২২-২০ ব্যৱধানত পৰাস্ত কৰে।

শ্ৰীকান্ত তৃতীয়খন খেলত অৱতীৰ্ণ গৈ এণ্ডাৰ্ছ এণ্টনছেনক ২১-১৮, ১২-২১, ২১-১৫ ত পৰাস্ত কৰি ভাৰতক আগুৱাই নিছিল। চতুৰ্থখন খেলত, স্কোৰ পুনৰ সমান হৈ পৰে। কৃষ্ণ প্ৰসাদ গাৰ্গ আৰু বিষ্ণুবৰ্ধন গৌড় ১৪-২১, ১৩-২১ ব্যৱধানত এণ্ডাৰ্ছ ৰাছমাচেন আৰু ফ্ৰেডৰিক চোগাৰ্ডৰ যুটিৰ হাতত পৰাজিত হয়। ভাৰতক ৰক্ষা কৰাৰ দায়িত্ব এইচ এছ প্ৰণয়লৈ ঘূৰি আহিল। তেওঁ যোৱা মেচখনত ৰাচমুছ জেমকেক ১৩-২১, ২১-৯, ২১-১২ ত পৰাস্ত কৰি ভাৰতক ফাইনেললৈ লৈ যায়। যাৰ জৰিয়তে ভাৰতীয় দলটোৱে এক নতুন ইতিহাস ৰচনা কৰিবলৈ সক্ষম হয়।

উল্লেখ্য যে, টেনিছৰ ডেভিছ কাপ আৰু ফুটবল বিশ্বকাপৰ দ্বাৰা অনুপ্ৰাণিত হৈ থমাছ কাপ প্ৰতিযোগিতাখন ১৯৩৯ চনত ব্ৰিটেইনৰ বেডমিণ্টন খেলুৱৈ ছাৰ জৰ্জ এলান থমাছে আৰম্ভ কৰিছিল। আৰম্ভণিতে, ই কেৱল কেইখনমান দেশৰ সৈতে আৰম্ভ হৈছিল, কিন্তু লাহে লাহে দেশৰ সংখ্যা বৃদ্ধি পাইছিল। আৰম্ভণিতে, এয়া কেৱল পুৰুষৰ প্ৰতিযোগিতা আছিল, কিন্তু ১৯৮৪ চনৰ পৰা, মহিলাৰ প্ৰতিযোগিতা একেধৰণে আৰম্ভ হৈছিল। ইয়াক উবেৰ কাপ বুলি কোৱা হয়। প্ৰথমতে, প্ৰতিযোগিতাখন প্ৰতি তিনি বছৰৰ অন্তৰালত অনুষ্ঠিত হৈছিল, কিন্তু ১৯৮৪ চনৰ পৰা, ই প্ৰতি দুবছৰত অনুষ্ঠিত হৈ আহিছে।

থমাছ কাপৰ আটাইতকৈ সফল দেশ ইণ্ডোনেছিয়া। তেওঁলোকে ২৯ বাৰ খেলিছে আৰু ১৪ বাৰ জিকিছে। ৬ বাৰ ৰানাৰ্ছ আপ হৈছে। ঘটনাক্ৰমে, শ্ৰীকান্ত বাহিনীয়ে তেওঁলোকৰ বিৰুদ্ধে ফাইনেল খেলিব। ভাৰতে আগতে কেতিয়াও থমাছ কাপৰ ফাইনেলত উপনীত হোৱা নাছিল। প্ৰতিযোগিতাৰ ৭৩সংখ্যক বছৰত, অৱশেষত খৰাং দূৰ হ’ল। ইতিহাস ৰচনা হ’ল। এইবাৰ, শ্ৰীকান্তবাহিনীৰ ওচৰত সেই ইতিহাসক আৰু অধিক গৌৰৱময় কৰাৰ সুযোগ আছে।