পুনৰ বিতৰ্কত হাছিন, এইবাৰ সম্পত্তিৰ বিবাদত লিপ্ত মহম্মদ ছামীৰ স্ত্ৰী

ডিজিটেল ডেস্কঃ পুনৰ বিবাদত জড়িত হৈ পৰিছে মহম্মদ ছামীৰ পত্নী হাছিন জাহান। এইবাৰ হাছিনৰ বিৰুদ্ধে অভিযোগ উত্থাপন কৰিছে তেওঁৰ পিতৃ মহম্মদ হুছেইনে। ভায়েকৰ সম্পত্তি বলপূৰ্বক দখল কৰা বুলি হাছিনৰ পিতৃয়ে অভিযোগ কৰিছে। হাছিনৰ পিতৃয়ে তেওঁক সম্পত্তিৰ পৰা বহিষ্কাৰ কৰাৰ আৰু তেওঁৰ সৈতে সকলো সম্পৰ্ক ছিন্ন কৰাৰ ভাবুকি দিয়া বুলিও খবৰ ওলাইছে।

হুছেইনে কৈছিল যে তেওঁৰ একমাত্ৰ পুত্ৰ তাৰিক পাৰভেজ ওৰফে বাণ্টি বিগত বৰ্ষত কৰ’নাত মৃত্যু হৈছিল। তাৰপাছত হাছিনে অবৈধভাৱে তাৰিকৰ সকলো সম্পত্তি বলপূৰ্বক দখল কৰা বুলি অভিযোগ পিতৃৰ। হুছেইনৰ অভিযোগ তাৰিকৰ দুখন ট্ৰাক, এখন গাড়ী, এখন মটৰচাইকেল, এখন হোটেল, পেট্ৰ'ল পাম্প আৰু এটা কয়লা খনি দখল কৰিছিল জীয়ৰী হাছিনে। আনকি নিজৰ ভায়েকৰ জীৱন বীমা কাঢ়ি নিয়াৰো দাবী পিতৃৰ।

হুছেইনৰ অধিবক্তা অমিত কুমাৰে কয়, ‘মুছলমানসকলৰ ব্যক্তিগত আইন অনুসৰি,  পুত্ৰৰ মৃত্যুৰ পাছত  তেওঁৰ সকলো সম্পত্তিৰ গৰাকী হয় পিতৃ। কোনো প্ৰকাৰে তেওঁৰ সেই সম্পত্তি ভাই-ভনীয়ে লাভ নকৰে। কেৱল পিতৃয়েই নহয়, হাছিনৰ মাক নাজমা খাতুনেও ছোৱালীৰ বিৰুদ্ধে মাৰপিট কৰাৰ অভিযোগ উত্থাপন কৰিছে।

ইতিমধ্যে,হাছিনৰ পিতৃয়ে এই সন্দৰ্ভত কলিকতা উচ্চ ন্যায়ালয়ত এটা গোচৰ ৰুজু কৰিছে। এই গোচৰটোত হাছিনৰ উপৰি  তেওঁৰ এজন বন্ধু আৰু দুজন কৰ্মচাৰীৰ নামো উল্লেখ কৰা হৈছে। অৱশ্যে, পিতৃৰ অভিযোগৰ পাছত এতিয়ালৈকে হাছিনৰ পৰা কোনো মন্তব্য লাভ কৰিব পৰা হোৱা নাই।