ডিজিটেল ডেস্ক: বৰপেটা চহৰত আইন-শৃংখলা পৰিস্থিতিক লৈ গুৰুতৰ প্ৰশ্ন উত্থাপিত হৈছে। আৰক্ষী অধীক্ষক (SP) কাৰ্যালয়ৰ একেবাৰে সন্মুখতে থকা এখন গেলামালৰ দোকানত চোৰে চলায় লুটপাট।
মুণিন্দ্ৰ নাথ তালুকদাৰ নামৰ ব্যক্তিজনৰ দোকানখনৰ চিলিং ভাঙি ভিতৰত প্ৰৱেশ কৰে চোৰে। চোৰে দোকানখনৰ পৰা প্ৰায় ২ হাজাৰ টকাৰ খুচুৰা পইচাৰ লগতে কেমেৰাৰ চিচিটিভি সামগ্ৰীসমূহো লৈ যায়।
ইয়াৰোপৰি টকা আৰু সামগ্ৰী থোৱা স্থানসমূহ সম্পূৰ্ণৰূপে লণ্ডভণ্ড কৰে। উল্লেখ্য যে একেৰাহে এইবাৰলৈ দোকানখনত তৃতীয়বাৰৰ বাবে চুৰিকাণ্ড সংঘটিত হৈছে।
এছ পি অফিচৰ দৰে অতি নিৰাপত্তাবেষ্টিত স্থানৰ ঠিক কাষতে বা সন্মুখতে থকা দোকানত এনে চুৰিকাণ্ড সংঘটিত হোৱাৰ ঘটনাই স্থানীয় ৰাইজৰ মাজত তীব্ৰ চাঞ্চল্যৰ সৃষ্টি কৰিছে। দোকানখনৰ গৰাকী মুণিন্দ্ৰ নাথ তালুকদাৰে প্ৰশ্ন উত্থাপন কৰি কয়— "আৰক্ষী অধীক্ষকৰ কাৰ্যালয়ৰ সন্মুখৰ দোকানৰেই যদি নিৰাপত্তা নাই, তেন্তে চহৰৰ অন্যান্য স্থানত সাধাৰণ নাগৰিকৰ নিৰাপত্তা ক'ত থাকিব?"
ঘটনা সন্দৰ্ভত বৰপেটা আৰক্ষীয়ে ইতিমধ্যে তদন্ত আৰম্ভ কৰিছে।
Continue Reading
