পাহাৰৰ মাটি কটাৰ ভয়ংকৰ পৰিণতি! ৰঙা মাটি-পানীয়ে বুৰালে হাতীশিলা গণেশ মন্দিৰ

ডিজিটেল ডেস্ক: শনিবাৰে নিশা নামি অহা ধাৰাসাৰ বৰষুণৰ ফলত পানীখাইতিৰ ঐতিহাসিক হাতীশিলা গণেশ মন্দিৰলৈ দুৰ্যোগ নামি আহিছে। পাহাৰত নিৰ্মাণকাৰ্যৰ বাবে মাটি কাটি পেলোৱাৰ ফলত বৰষুণৰ পানীৰ সৈতে পাহাৰৰ ৰঙা মাটি নামি আহি মন্দিৰৰ চৌহদত প্ৰৱেশ কৰে।

ফলত পাহাৰৰ পৰা বৈ অহা ৰঙা মাটি আৰু পানীৰে ভৰি পৰে ঐতিহাসিক হাতীশিলা গণেশ মন্দিৰৰ ভিতৰভাগ। মন্দিৰৰ পূজাৰী আৰু ভক্তসকলৰ মাজত এই ঘটনাই সৃষ্টি কৰিছে উদ্বেগৰ পৰিৱেশ।

মন্দিৰৰ পূজাৰীৰ অভিযোগ অনুসৰি, মন্দিৰৰ ওপৰৰ পাহাৰত ইছমাইলুৰ ৰহমান নামৰ এজন ব্যক্তিয়ে পাহাৰৰ মাটি কাটি বৃহৎ অট্টালিকা নিৰ্মাণ কৰাৰ ফলতেই বৰষুণৰ পানীৰ সৈতে পাহাৰৰ ৰঙা মাটি মন্দিৰৰ ভিতৰলৈ বৈ আহিছে।

ইফালে, মন্দিৰৰ ভিতৰত মাটি-পানী জমা হোৱাৰ ফলত পূজা-অৰ্চনা কৰাত অসুবিধাৰ সন্মুখীন হৈছে পূজাৰী আৰু ভক্তসকল। ঐতিহাসিক মন্দিৰটোৰ সুৰক্ষা আৰু এনে ঘটনা পুনৰাবৃত্তি ৰোধৰ বাবে সংশ্লিষ্ট কৰ্তৃপক্ষই শীঘ্ৰে ব্যৱস্থা গ্ৰহণ কৰাৰ দাবী উত্থাপন হৈছে।