কাকপথৰাত চুৰি কাঁহী-বাতি বিক্ৰী কৰি ধৰা পৰিল দুই চোৰ; ব্যৱসায়ীৰ সন্ধানত আৰক্ষী

ডিজিটেল ডেস্ক: কাঁহ, পিতল বা অন্য সামগ্ৰী ক্ৰয় কৰোতে হওক সাৱধান। আনৰ ঘৰৰ চুৰি সামগ্ৰী হ’ব পাৰে আপুনি ক্ৰয় কৰা কাঁহী, বাতি বা অন্য বস্তু ৷

ভগা-চিগা সামগ্ৰী ক্ৰয় কৰা লোকৰ পৰা সাৱধান হওক৷ ক্ষন্তেকতে চুৰি কৰি লৈ যাব পাৰে আপোনাৰ ঘৰৰ যিকোনো মূল্যৱান সামগ্ৰী। 

কাকপথাৰত নুৰ ইছলাম আৰু বাদুছ হুছেইন নামৰ দুটা গভাইত চোৰ আটক। নুৰ ইছলামৰ ঘৰ নগাঁও বৰদোৱা চমকা গাঁৱত আৰু বাদুছ হুছেইনৰ ঘৰ মৰিগাঁও মিকিৰভেটা বালিজান গাঁৱত বুলি জানিব পৰা গৈছে৷

দুইটা চোৰ ভগা-চিগা সামগ্ৰী ক্ৰয় কৰা ব্যৱসায়ৰ বাবে কাকপথাৰত আছিল। কাকপথাৰ চহৰৰে এজন লোকৰ ঘৰৰ পৰা চুৰি কৰিছিল কাঁহৰ কাঁহী, চৰীয়া আদি৷

কাকপথাৰ চহৰৰে পাটোৱাৰী উপাধিৰ বাচন-বৰ্তন ব্যৱসায়ৰ প্ৰতিষ্ঠানৰ এজন ব্যৱসায়ীক চুৰি সামগ্ৰীখিনি বিক্ৰী কৰিছিল দুই চোৰে৷

পূৰ্বতেও এই ব্যৱসায়ীজনৰ ওপৰত চুৰি সামগ্ৰী ক্ৰয় কৰাৰ অভিযোগ আছে। অৱশেষত চোৰ দুটা ধৰা পৰে যদিও পাটোৱাৰী নামৰ ব্যৱসায়ীটোক আৰক্ষীয়ে আটক কৰিব পৰা নাই৷

আৰক্ষীয়ে ইতিমধ্যে তদন্ত অব্যাহত ৰাখিছে। অঞ্চলটোত দিনক দিনে বৃদ্ধি পাবলৈ ধৰা চুৰিকাণ্ডৰ সন্দৰ্ভত অধিক তথ্য পোহৰলৈ অহাৰ সম্ভাৱনা আছে৷