দেশত ৯ মাহ ধৰি বৃদ্ধি মুদ্রাস্ফীতি; খাদ্য-সামগ্ৰীৰ আকাশলংঘী দামৰ পৰিণতি

ডিজিটেল ডেস্ক: ৯ মাহ ধৰি মুদ্রাস্ফীতিৰ ধাৰা অব্যাহত আছে দেশত। চৰকাৰী তথ্য মতে, জুলাইত মুদ্রাস্ফীতিৰ হাৰ ৪.৪৫%। ইয়াৰ আগতে জুন মাহত মুদ্রাস্ফীতিৰ হাৰ আছিল ৪.৩৮%। আনহাতে একেৰাহে দ্বিতীয় মাহত মুদ্রাস্ফীতিৰ হাৰে ভাৰতীয় ৰিজার্ভ বেংকে বান্ধি দিয়া সীমা অতিক্রম কৰে। উল্লেখযোগ্য যে ভাৰতীয় ৰিজার্ভ বেংকে খুচুৰা মুদ্রাস্ফীতিৰ হাৰ ৪% বা তাৰ তলত ৰখাৰ লক্ষ্য বান্ধি দিছিল।

জুলাই মাহত মুদ্রাস্ফীতিৰ হাৰ বৃদ্ধিৰ প্ৰধান কাৰণ খাদ্য সামগ্ৰীৰ আকাশলংঘী দাম। মন কৰিবলগীয়া যে খাদ্য সামগ্ৰীৰ দাম বৃদ্ধিয়ে পৰিয়ালৰ বাজেটত প্রত্যক্ষভাৱে প্ৰভাৱ পেলায়। যোৱা খাদ্য সামগ্ৰীৰ মুদ্রাস্ফীতিৰ হাৰ জুন মাহৰ ৫.৩২%ৰ পৰা বৃদ্ধি পাই ৫.৫২% হয়। যোৱা মাহত নগৰাঞ্চলৰ তুলনাত গ্রামাঞ্চলত খাদ্য সামগ্ৰীৰ দাম অধিক বৃদ্ধি পায়। 

জুলাইত খাদ্য সামগ্ৰীৰ মুদ্রাস্ফীতিৰ হাৰ গ্রামাঞ্চলত ৫.৭৯% হোৱাৰ বিপৰীতে নগৰাঞ্চলত আছিল ৫.০৫%। যোৱা মাহত পিয়াঁজৰ মুদ্রাস্ফীতিৰ হাৰ ৪.৭৩%ৰ পৰা ২২.৫৪%লৈ, নহৰুৰ ১৭.৯৩%ৰ পৰা ৩৫.৩৬%লৈ বৃদ্ধি পায়। জুলাইত আদাই সকলো অভিলেখ ভংগ কৰে আৰু মুদ্রাস্ফীতিৰ হাৰ ৫০.৪১%ৰ পৰা ৮৩.৬২%লৈ বৃদ্ধি পায়। ইয়াৰ বিপৰীতে আলুৰ দাম যোৱা বছৰৰ তুলনাত ১৬.৫৬% হ্রাস পায়। দাম বৃদ্ধিৰ মাধমাৰ কেৱল খাদ্য সামগ্ৰীয়েই শোধোৱা নাই। আন সামগ্রী তথা সেৱাৰ দামো জুলাইত বৃদ্ধি পায়। যোৱা মাহত ভ্ৰমণ কৰাটো সামান্য পৰিমাণে ব্যয় বহুল হৈ পৰে, কিয়নো পৰিবহণৰ মুদ্রাস্ফীতিৰ হাৰ ৪.৩১%ৰ পৰা ৪.৪৩%লৈ বৃদ্ধি পায়। আনহাতে সামগ্ৰীৰ পৰিবহণ ব্যয় ৭.৭৭শতাংশলৈ বৃদ্ধি পায়। আনহাতে প্রসাধন সামগ্ৰী, সামাজিক সুৰক্ষাৰ সৈতে জড়িত সামগ্ৰীসমূহৰ মুদ্রাস্ফীতিৰ হাৰ যোৱা মাহতো ১৪.৭৭% হৈ থাকে। স্বাস্থ্য সেৱা আৰু শিক্ষা সেৱাৰ মুদ্রাস্ফীতিৰ হাৰ আছিল ক্ৰমে ১.৩৪% আৰু ৩.৬৪%। উৎস: দৈনিক জনমভূমি