লখিমপুৰৰ ছাত্ৰ নিৰুদ্দেশ; পৰিয়ালত হাহাকাৰ

ডিজিটেল ডেস্ক: লখিমপুৰৰ চাবতি চৌখাম গাঁৱৰ এজন দশম শ্ৰেণীৰ ছাত্ৰ নিৰুদ্দেশ। নিৰুদ্দিষ্ট ছাত্ৰজনৰ নাম কৰুণা চুতীয়া। ১৫ বছৰীয়া ছাত্ৰজন নিৰুদ্দেশ হোৱা ঘটনাই অঞ্চলটোত চাঞ্চল্যৰ সৃষ্টি কৰিছে। পৰিয়ালৰ মতে, যোৱা ১৫ আগষ্ট, শনিবাৰে সন্ধিয়া প্ৰায় ৭ বজাৰ পৰা ঘৰৰ পৰাই ছাত্ৰজন নিৰুদ্দেশ হোৱা বুলি সন্দেহ কৰা হৈছে।

নিৰুদ্দেশৰ পিছত পৰিয়ালৰ লোকে বিভিন্ন স্থানত বিচাৰ-খোচাৰ চলাই যদিও এই পৰ্যন্ত কৰুণা চুতীয়াৰ কোনো সন্ধান লাভ কৰিবলৈ সক্ষম হোৱা নাই। ইতিমধ্যে নিৰুদ্দেশ হোৱা ছাত্ৰজনৰ চাইকেলখন লখিমপুৰ ৰে’লৱে ষ্টেচনৰ পৰা উদ্ধাৰ কৰা হৈছে।

ঘটনা সন্দৰ্ভত দুৰ্ভগীয়া পিতৃয়ে লখিমপুৰ আৰক্ষী থানাত এজাহাৰ দাখিল কৰিছে। আৰক্ষীয়েও ছাত্ৰজনৰ সন্ধানত তদন্ত অব্যাহত ৰাখিছে।

কোনো লোকে কৰুণা চুতীয়াৰ সন্ধান লাভ কৰিলে থানাত যোগাযোগ কৰিবলৈ আহ্বান পৰিয়ালৰ লোকৰ।