ডিজিটেল ডেস্ক: লামডিঙত কৰ্মৰত অৱস্থাত বিদ্যুৎস্পৃষ্ট হৈ প্ৰসেনজিত দাস ওৰফে লকাই (৩২) নামৰ এজন অস্থায়ী বিদ্যুৎ কৰ্মচাৰী গুৰুতৰভাৱে আহত হয়। শুকুৰবাৰে সন্ধিয়া লামডিঙৰ ফটোপথাৰ অঞ্চলত এই দুৰ্ঘটনা সংঘটিত হয়।
প্ৰাপ্ত তথ্য অনুসৰি, বিদ্যুৎ সংযোগ বিচ্ছিন্ন কৰি নিজৰ দায়িত্ব পালন কৰি থকাৰ সময়তে হঠাতে বিদ্যুৎ সংযোগ পুনৰ সক্ৰিয় হৈ পৰাত কৰ্মচাৰীজন দুৰ্ঘটনাৰ সন্মুখীন হয়। ইয়াৰ ফলত তেওঁ গুৰুতৰভাৱে আহত হয়।
ঘটনাৰ পিছতে স্থানীয় লোক আৰু সহকৰ্মীসকলৰ সহযোগত তেওঁক ততাতৈয়াকৈ লামডিং অসামৰিক চিকিৎসালয়লৈ লৈ যোৱা হয়। অৱশ্যে আঘাত অতি গুৰুতৰ হোৱাত চিকিৎসকে উন্নত চিকিৎসাৰ বাবে তেওঁক গুৱাহাটী চিকিৎসা মহাবিদ্যালয় হাস্পতাললৈ (GMCH) প্ৰেৰণ কৰে।
কৰ্মৰত অৱস্থাত সংঘটিত এই দুৰ্ঘটনাটোৱে সমগ্ৰ লামডিং অঞ্চলতে তীব্ৰ উদ্বেগ আৰু চাঞ্চল্যৰ সৃষ্টি কৰিছে। কাম চলি থকা অৱস্থাত কেনেদৰে হঠাতে বিদ্যুৎ সংযোগ সক্ৰিয় হ’ল, সেই লৈ এতিয়া গুৰুত্বপূৰ্ণ প্ৰশ্ন উত্থাপন হৈছে।
সমগ্ৰ ঘটনাৰ প্ৰকৃত কাৰণ আৰু ইয়াৰ আঁৰত কোনো বিভাগীয় গাফিলতি আছিল নেকি, সেয়া সঠিক তদন্তৰ পিছতহে স্পষ্ট হৈ উঠিব।
Continue Reading
