ডিজিটেল ডেস্ক: শিৱসাগৰ জিলাৰ বেতবাৰী দিচাং মাজগাঁৱৰ ৩৭ নং ৰাষ্ট্ৰীয় ঘাইপথৰ কাষৰ নলাৰ পৰা শনিবাৰে পুৱা একেটা স্থানৰ পৰাই দুজন যুৱকৰ মৃতদেহ উদ্ধাৰ হোৱাক লৈ সৰ্বত্ৰে চাঞ্চল্যৰ সৃষ্টি হৈছে।
প্ৰথম অৱস্থাত পুৱা বলিয়াঘাটৰ অভয় হাজৰিকা (২১) নামৰ যুৱকজনৰ মৃতদেহ নলাৰ পৰা উদ্ধাৰ হৈছিল। ইয়াৰ মাত্ৰ ৫-৬ মিটাৰ দূৰত্বতে একেটা নলাৰ পৰা আন এজন যুৱকৰো মৃতদেহ উদ্ধাৰ কৰা হয়। দ্বিতীয়জন মৃত যুৱকক মানস দাস (২৩) বুলি চিনাক্ত কৰা হৈছে। বলিয়াঘাটৰ অনন্ত দাস আৰু জুলী দাসৰ পুত্ৰ আছিল মানস দাস।
প্ৰাথমিক অনুমান অনুসৰি, এ এছ ০৪ এ ডি ৩৫৫২ নম্বৰৰ FZ মটৰচাইকেলখনত একেলগে উঠি দুয়ো যাত্ৰা কৰিছিল। শুকুৰবাৰে দিনৰ ভাগতে অভয় হাজৰিকাৰ সৈতে মানস দাসে ঐতিহাসিক ঢেকীয়াখোৱা বৰনামঘৰলৈ বুলি ওলাই গৈছিল। কি পৰিস্থিতিত তেওঁলোকৰ মৃত্যু হ'ল সেয়া ৰহস্যৰ আৱৰ্তত।
ঘটনাৰ খবৰ পাই তাৎক্ষণিকভাৱে আৰক্ষী ঘটনাস্থলীত উপস্থিত হৈ সমগ্ৰ পৰিস্থিতিৰ তন্নতন্নকৈ তদন্ত আৰম্ভ কৰিছে। একেটা স্থানৰ পৰা দুজনকৈ যুৱকৰ মৃতদেহ উদ্ধাৰ হোৱা ঘটনাই অঞ্চলটোত গভীৰ শোকৰ ছাঁ পেলাইছে।
Continue Reading
