মুখ্যমন্ত্ৰী ড° হিমন্ত বিশ্ব শৰ্মাৰ নিৰ্দেশত মানসজ্যোতি চেতিয়াৰ মৃত্যুৰ ঘটনাক লৈ তীব্ৰ তদন্ত অসম আৰক্ষীৰ

ডিজিটেল ডেস্ক: শিৱসাগৰৰ বিহুবৰত মানসজ্যোতি চেতিয়াৰ দুৰ্ভাগ্যজনক মৃত্যুৰ ঘটনাৰ সত্য উদ্ঘাটনৰ বাবে মুখ্যমন্ত্ৰী ড° হিমন্ত বিশ্ব শৰ্মাৰ নিৰ্দেশত অসম আৰক্ষীয়ে তদন্ত তীব্ৰতৰ কৰি তুলিছে।

ঘটনাক কেন্দ্ৰ কৰি বিহুবৰ থানাত Case No. 10/26, ধাৰা 103(1)/3(5) BNS-ৰ অধীনত ইতিমধ্যে গোচৰ ৰুজু কৰা হৈছে।

শিৱসাগৰৰ SSP পাপৰি চেতিয়া, APS-ৰ নেতৃত্বত আৰম্ভ হৈছে সমগ্ৰ ঘটনাৰ গভীৰ তদন্ত। SSPগৰাকীয়ে নিজে ঘটনাস্থলীত উপস্থিত থাকি তদন্তৰ তদাৰক কৰিছে।

কে জে শইকীয়া, IPS, IG (ER) ইতিমধ্যে বিহুবৰৰ অভিমুখে ৰাওনা হৈছে। আনহাতে, ড° ৰবীন কুমাৰ, IPS, DIG, অসম আৰক্ষী হেডকোৱাৰ্টাৰ আৰু এটা ফৰেনছিক দল গুৱাহাটীৰ পৰা শিৱসাগৰলৈ ৰাওনা হৈছে।

মানসজ্যোতি চেতিয়াৰ মৃত্যুৰ আঁৰৰ প্ৰকৃত সত্য উদ্ঘাটন কৰিবলৈ আৰক্ষীয়ে সকলো দিশ সামৰি তদন্ত অব্যাহত ৰাখিছে।

উল্লেখ্য যে বানপীড়িত ৰাইজৰ সেৱাত অহৰহ নিয়োজিত হৈ থকা বীৰ লাচিত সেনাৰ নিষ্ঠাৱান কৰ্মী মানসজ্যোতি চেতিয়াৰ নশ্বৰ দেহ মঙলবাৰে নিশা শিমলুগুৰিত উপস্থিত হয়। দেওবাৰে নিশা এক ৰহস্যজনক পথ দুৰ্ঘটনাত গুৰুতৰভাৱে আঘাতপ্ৰাপ্ত হৈ চিকিৎসাধীন অৱস্থাতে ডিব্ৰুগড় চিকিৎসা মহাবিদ্যালয়ত শেষ নিঃশ্বাস ত্যাগ কৰে যুৱকজনে। এই মৃত্যুক সহজভাৱে ল’ব পৰা নাই বুলি মন্তব্য কাৰে বীৰ লাচিত সেনাই। বীৰ লাচিত সেনাৰ মুখ্য প্ৰশাসনিক সচিব শৃংখল চলিহাই মানসজ্যোতিক ‘জাতীয় শ্বহীদ’ ঘোষণা কৰাৰ লগতে এয়া এক পৰিকল্পিত হত্যা বুলি সন্দেহ প্ৰকাশ কৰিছে।

দেওবাৰে নিশা প্ৰায় ১০ বজাত প্ৰজাবস্তিত পথৰ কাষত সংজ্ঞাহীন অৱস্থাত উদ্ধাৰ কৰা হৈছিল সংগ্ৰামী যুৱক মানসজ্যোতি চেতিয়াক। মঙলবাৰে পুৱা ডিব্ৰুগড় চিকিৎসা মহাবিদ্যালয়ত চিকিৎসাধীন অৱস্থাতে অকাল বিয়োগ ঘটে মানসৰ। কিন্তু মানসৰ আকস্মিক মৃত্যুক লৈ এতিয়া সৃষ্টি হৈছে তীব্ৰ ৰহস্যৰ। শনিবাৰে বিহুবৰৰ এটা গৃহহীন পৰিয়ালক সহায় কৰিবলৈ গৈ স্থানীয় আবিদুৰ ৰহমান নামৰ লোকজনৰ পৰিয়ালৰ সৈতে বাক-বিতণ্ডা হৈছিল মানসজ্যোতিৰ। কিন্তু তাৰ এদিন পাছতেই দেওবাৰে নিশা ৰহস্যজনকভাৱে দুৰ্ঘটনাত পতিত হয় মানসজ্যোতি চেতিয়া৷ 

এয়া এক দুৰ্ঘটনা নহয় পৰিকল্পিত হত্যাকাণ্ড বুলি ৰাইজে উচিত তদন্তৰ দাবী কৰে। অৱশেষত এই বিষয়টোক গুৰুত্বসহকাৰে লৈ মুখ্যমন্ত্ৰী ড° হিমন্ত বিশ্ব শৰ্মাই ক্ষীপ্ৰ তদন্ত কৰিবলৈ অসম আৰক্ষীক নিৰ্দেশ দিয়ে।