মুকালমুৱাত শোকৰ বন্যা! নাগাৰা নামৰ পাঠিকা প্ৰতীক্ষা বৰ্মনৰ চৰম সিদ্ধান্ত

ডিজিটেল ডেস্ক: মুকালমুৱাৰ খালিহাপাৰাত সংঘটিত এক চাঞ্চল্যকৰ ঘটনাই সমগ্ৰ অঞ্চলটোত শোকৰ ছাঁ পেলাইছে। খালিহাপাৰা ৰাধা-কৃষ্ণ ছোৱালী নাগাৰা নাম দলৰ পাঠিকা তথা প্ৰতিভাৱান ছাত্ৰী প্ৰতীক্ষা বৰ্মনে চৰম পন্থা অৱলম্বন কৰা ঘটনাই সৃষ্টি কৰিছে শোকাকুল পৰিৱেশ।

জানিব পৰা মতে, খালিহাপাৰা পানী যোগান আঁচনিৰ ৰেলিঙত প্ৰতীক্ষা বৰ্মনে চৰম পন্থা অৱলম্বন কৰে। ১৭ বছৰীয়া প্ৰতীক্ষা বৰ্মন ৰঘুনাথ চৌধুৰী উচ্চতৰ মাধ্যমিক বিদ্যালয়ৰ দ্বিতীয় বৰ্ষৰ ছাত্ৰী আছিল।

পৰিয়ালৰ লোকৰ অভিযোগ অনুসৰি, প্ৰেমজনিত কাৰণত প্ৰতীক্ষাই এনে চৰম সিদ্ধান্ত গ্ৰহণ কৰে। অৱশ্যে ঘটনাৰ প্ৰকৃত কাৰণ এতিয়াও স্পষ্ট নহয়। আৰক্ষীৰ তদন্তৰ পাছতহে ঘটনাৰ আঁৰৰ প্ৰকৃত তথ্য পোহৰলৈ অহাৰ সম্ভাৱনা আছে।

বনজিৎ বৰ্মনৰ ১৭ বছৰীয়া কন্যা প্ৰতীক্ষা কেৱল এগৰাকী নাগাৰা নামৰ পাঠিকাই নহয়, এগৰাকী প্ৰচুৰ সম্ভাৱনাপূৰ্ণ নৃত্যশিল্পীও আছিল। পঢ়া-শুনাতো আগবঢ়া প্ৰতীক্ষাৰ অকাল মৃত্যুত মুকালমুৱাত শোকৰ ছাঁ পৰিছে।

প্ৰতিভাৱান কিশোৰীগৰাকীৰ এনে অকাল বিয়োগে পৰিয়াল, আত্মীয়-স্বজনৰ লগতে অঞ্চলবাসীকো মৰ্মাহত কৰি তুলিছে।