তিব্বতত বানৰ ধ্বংসলীলা! ভয়াবহ দুৰ্যোগৰ এই খবৰ লুকুৱাই ৰাখি চীনৰ ৰহস্যজনক নিস্তব্ধতা

ডিজিটেল ডেস্ক: আগষ্ট মাহৰ শেষৰ ফালে নেপাল আৰু তিব্বতৰ সীমান্তৱৰ্তী অঞ্চলত এক ভয়ংকৰ হিমস্খলন আৰু হঠাতে অহা ভয়ংকৰ বানপানীয়ে প্ৰচণ্ড ধ্বংসলীলা চলালে। এই দুৰ্যোগৰ ফলত নেপালত শ শ লোকৰ প্ৰাণহানি হৈছে। কিন্তু, ইয়াৰ বিপৰীতে তিব্বতৰ ফালৰ পৰা ক্ষতিগ্ৰস্ত লোক বা মৃত্যুৰ সঠিক খবৰ পোহৰলৈ অহা নাই। সমগ্ৰ তিব্বত জুৰি এক ৰহস্যজনক নিস্তব্ধতা বিৰাজ কৰিছে। 

নেপাল আৰু তিব্বতৰ মূল সীমান্ত চকীসমূহৰ অন্যতম গ্যিৰং প’ৰ্টৰ মাজেৰে বৈ যোৱা পানীৰ প্ৰবল সোঁতে তচনচ কৰি সকলোবোৰ উটুৱাই লৈ গৈছিল। প্ৰাণ বচাবলৈ দৌৰি ফুৰিছিল শ শ লোকে। চিচি কেমেৰাত বন্দী এই দৃশ্যসমূহ দ্ৰুতগতিত ছ’চিয়েল মিডিয়াত বিয়পি পৰিছিল আৰু সমগ্ৰ বিশ্বৰ দৃষ্টি সেই ভয়ংকৰ দৃশ্যত নিৱদ্ধ হৈছিল। কিন্তু চীনৰ ফালৰ পৰা কোনো ভিডিঅ’ বা ছবি প্ৰচাৰ কৰা হোৱা নাই। এতিয়ালৈকে দেশখনৰ চৰকাৰী মুখ্য সংবাদ বুলেটিনত এই দৃশ্যসমূহৰ মাত্ৰ এখন ছবিহে প্ৰচাৰ কৰা হৈছে।

চীনৰ কঠোৰ নিয়ন্ত্ৰণাধীন ইণ্টাৰনেটতো এই ভিডিঅ’টো বিচাৰি পোৱাটো কঠিন হৈ পৰিছে। বুধবাৰৰ পৰা অহা হঠাৎ অহা এই বানপানীয়ে শ শ লোকৰ প্ৰাণ কাঢ়ি লৈছে আৰু অগণন লোক এতিয়াও নিৰুদ্দেশ হৈ আছে, কিন্তু এই বানপানীৰ বিষয়ে উল্লেখ থকা কোনো প’ষ্ট বিচাৰি পোৱাটোও এতিয়া অসম্ভৱ হৈ পৰিছে।

চীনে এই খবৰ লুকুৱাই ৰখাৰ মূল কাৰণসমূহ-

চীনৰ কঠোৰ চেন্সৰশ্বিপ: চীন চৰকাৰৰ কঠোৰ সংবাদ নীতিৰ বাবে তিব্বতৰ দৰে সংবেদনশীল অঞ্চলৰ পৰা দুৰ্যোগৰ কোনো ভয়াবহ ছবি বা ভিডিঅ’ ছ’চিয়েল মিডিয়াত প্ৰকাশ কৰিবলৈ দিয়া নহয়। তেনে কোনো প’ষ্ট পোহৰলৈ আহিলে লগে লগে আঁতৰাই দিয়া হয়।

স্বতন্ত্ৰ খবৰ সংগ্ৰহৰ ওপৰত নিষেধাজ্ঞা: বিদেশী সাংবাদিক, গৱেষক বা সাধাৰণ নাগৰিকৰ দুৰ্যোগস্থলীলৈ যোৱাৰ কোনো অধিকাৰ নাই। ফলত প্ৰকৃততে কিমান ক্ষতি হ’ল, সেই সত্যটো বিশ্ববাসীৰ পৰা লুকুৱাই ৰখা হয়।

ৰাজনৈতিক ভয় আৰু ছত্ৰভংগৰ আশংকা: তিব্বত দীৰ্ঘদিন ধৰি চীনৰ শাসনৰ বিৰোধী হৈ আহিছে। চৰকাৰৰ ভয় যে এনে দুৰ্যোগৰ খবৰে মানুহৰ মাজত চৰকাৰৰ বিৰুদ্ধে অসন্তুষ্টি আৰু ক্ষোভ জগাই তুলিব পাৰে।

আন্তঃৰাষ্ট্ৰীয় প্ৰতিচ্ছবি ৰক্ষাৰ হেঁচা: বিশ্বৰ চকুত নিজকে এক শক্তিশালী আৰু দুৰ্যোগ ব্যৱস্থাপনাত পাকৈত দেশ হিচাপে দেখুৱাবলৈ চীনখনে নিজৰ দেশৰ দুৰ্বলতা বা বিফলতাৰ খবৰবোৰ সদায় লুকুৱাই ৰাখিব বিচাৰে।

তিব্বতত জীয়াই থকা লোকসকলৰ অভিজ্ঞতা পোহৰলৈ অহা নাই আৰু বানপানীৰ ভয়াৱহ মুহূৰ্তসমূহ দেখুওৱা ভিডিঅ’সমূহো দেখিবলৈ পোৱা নাই। নিৰুদ্দেশ হোৱা লোকসকলৰ চিন্তিত পৰিয়ালৰ মাতো এতিয়ালৈকে শুনা পোৱা নাই। স্বাভাৱিক সময়তো তাত মানুহৰ সৈতে যোগাযোগ কৰাটো প্ৰায় অসম্ভব।

বৃহস্পতিবাৰে নিশা, যেতিয়া বিশ্বজুৰি হিমালয়ৰ এটা উপত্যকাত ঘটা ধ্বংসলীলাই শিৰোনাম দখল কৰিছিল, চীনৰ চৰকাৰী সম্প্ৰচাৰে তেওঁলোকৰ মুখ্য বুলেটিনৰ পাতনি মেলিছিল চিন জিংপিঙৰ নতুন গ্ৰন্থখনৰ মুকলিৰে। 

সংক্ষেপে ক’বলৈ গ’লে, প্ৰকৃতিৰ কোপত তিব্বততো যে এক ডাঙৰ বিপৰ্যয় আহি পৰিছে, সেই সত্যটো লুকুৱাবলৈকে চীনা প্ৰশাসনে সম্পূৰ্ণ খবৰ বন্ধ কৰি এক গভীৰ নিস্তব্ধতা বৰ্তাই ৰাখিছে।