নুমলীগড়ত চাঞ্চল্য! ভাড়াতীয়াৰ অত্যাচাৰত আনৰ ঘৰত লৈছে আশ্ৰয় লৈছে বৃদ্ধা মালিকে

ডিজিটেল ডেস্ক: নুমলীগড়ৰ এগৰাকী বিশেষভাৱে সক্ষম বৃদ্ধাৰ কৰুণ কাহিনী। প্ৰাণৰ ভয়ত নিজৰ ঘৰ, মাটি থাকিও আনৰ ঘৰত আশ্ৰয় লব লগা হৈছে অসহায় বৃদ্ধাগৰাকীয়ে। নুমলীগড়ৰ ১ নং পংকা গ্ৰাণ্টৰ ডালিমী গোহাঁই নামৰ মহিলাগৰাকীয়ে এতিয়া অঘৰীৰ দৰে কটাব লগা হৈছে জীৱন।

প্ৰাপ্ত তথ্য অনুসৰি, ডালিমী গোহাঁইৰ নামত আছিল প্ৰায় ডেৰ কঠা মাটি আৰু নিজৰ এটি আৱাসগৃহ। কিন্তু দুৰ্ভাগ্যজনকভাৱে কিছু বছৰ পূৰ্বে তেওঁ অনুপ দাস নামৰ এজন লোকক নিজৰ ঘৰৰ এটা কোঠা ভাড়া দিছিল। অভিযোগ উঠিছে যে, ভাড়াতীয়াৰ ৰূপত সোমোৱা অনুপ দাসে ক্ৰমে বৃদ্ধাগৰাকীৰ সমগ্ৰ ঘৰ আৰু মাটি বে-দখল কৰাৰ কু-অভিসন্ধি চলায়।

পৰিস্থিতি ইমানেই ভয়ানক হৈ পৰে যে, ভাড়াতীয়া অনুপ দাসে বৃদ্ধাগৰাকীক নিশা ডিঙি চেপি আৰু মুখত সোপা দি প্ৰাণে মৰাৰ চেষ্টা চলোৱাৰ এক গুৰুতৰ অভিযোগ উত্থাপিত হৈছে। এই অমানৱীয় অত্যাচাৰ আৰু প্ৰাণৰ সংশয়ৰ মাজেৰে নিৰাপত্তাহীনতাত ভুগি বৃদ্ধাগৰাকীয়ে ইতিমধ্যে নুমলীগড় আৰক্ষী থানাত এক এজাহাৰ দাখিল কৰিছে।

বৰ্তমান প্ৰাণৰ সুৰক্ষাৰ প্ৰতি লক্ষ্য ৰাখি নিজৰ ঘৰ এৰি প্ৰায় এমাহ ধৰি অন্যৰ আশ্ৰয়ত দিন কটাইছে এইগৰাকী দুৰ্ভগীয়া বৃদ্ধাই। এগৰাকী বিশেষভাৱে সক্ষম তথা অসহায় মহিলাৰ ওপৰত চলা এনে নিষ্ঠুৰ অত্যাচাৰৰ ঘটনাক লৈ এতিয়া সমগ্ৰ নুমলীগড় অঞ্চলতে তীব্ৰ প্ৰতিক্ৰিয়াৰ সৃষ্টি হৈছে আৰু দোষীৰ বিৰুদ্ধে কঠোৰ ব্যৱস্থা গ্ৰহণৰ দাবী উঠিছে।