অসম বিজেপি সংখ্যালঘু মৰ্চাৰ জনপ্ৰিয় যুৱ নেতা বহিষ্কৃত, বৰক্ষেত্ৰী আৰু বৰপেটাত বিতৰ্ক

নলবাৰী: অসম প্ৰদেশ বিজেপি সংখ্যালঘু মৰ্চাৰ ৰাজ্যিক আমন্ত্ৰিত সদস্য ছাদ্দাম দেৱানক তাৎক্ষণিকভাৱে পদৰ পৰা অব্যাহতি দিয়াৰ ঘটনাই ৰাজ্যজুৰি, বিশেষকৈ নলবাৰীৰ বৰক্ষেত্ৰী আৰু বৰপেটা জিলাৰ চেঙা সমষ্টিত ব্যাপক চৰ্চা লাভ কৰিছে। এজন সক্ৰিয় আৰু জনপ্ৰিয় যুৱ নেতা হিচাপে পৰিচিত ছাদ্দাম দেৱানৰ এই বহিষ্কৰণে বহুজনক আচৰিত কৰি তুলিছে।

সূত্ৰ অনুসৰি, ছাদ্দাম দেৱান কেৱল নলবাৰী জিলাৰ বৰক্ষেত্ৰী সমষ্টিতে নহয়, বৰপেটা জিলাৰ চেঙা সমষ্টিসহ কেইবাটাও অঞ্চলত যুৱক-যুৱতীসকলৰ মাজত যথেষ্ট জনপ্ৰিয় হৈ পৰিছিল। তেওঁ কম বয়সতে বিভিন্ন ৰাজহুৱা আৰু সামাজিক কাৰ্যসূচীত সক্ৰিয়ভাৱে অংশগ্ৰহণ কৰিছিল। দলীয় কাম-কাজত তেওঁৰ আগ্ৰহ আৰু সক্ৰিয়তাই তেওঁক শীঘ্ৰেই জনপ্ৰিয় কৰি তুলিছিল।

দেৱানে অসম বিজেপিৰ ৰাজ্যিক সভাপতি দিলীপ শইকীয়া, মুখ্যমন্ত্ৰী ড° হিমন্ত বিশ্ব শৰ্মা, মন্ত্ৰী জয়ন্ত মল্লবৰুৱা, সংখ্যালঘু মৰ্চাৰ ৰাজ্যিক সভাপতি শান্তি কুজুৰ, বৰক্ষেত্ৰীৰ বিধায়ক নাৰায়ণ ডেকা আৰু নলবাৰী জিলা বিজেপিৰ সভাপতি জয়ন্ত বুঢ়াগোঁহাইকে ধৰি কেইবাজনো জ্যেষ্ঠ বিজেপি নেতাৰ সৈতে সুসম্পৰ্ক বজাই ৰাখিছিল বুলিও জানিব পৰা গৈছে। তেওঁৰ এনে সক্ৰিয়তা আৰু জ্যেষ্ঠ নেতাৰ সৈতে থকা ঘনিষ্ঠতাৰ বাবেই তেওঁৰ ৰাজনৈতিক ভৱিষ্যত উজ্জ্বল বুলি ভবা হৈছিল।

কিন্তু হঠাৎ কিছু অভিযোগৰ ভিত্তিত অসম প্ৰদেশ বিজেপি সংখ্যালঘু মৰ্চাই ছাদ্দাম দেৱানক ৰাজ্যিক আমন্ত্ৰিত সদস্য পদৰ পৰা অপসাৰণ কৰাৰ সিদ্ধান্ত লয়। এই পদক্ষেপৰ ফলত সমগ্ৰ অঞ্চলটোত ৰাজনৈতিক মহলে বিভিন্ন ধৰণে আলোচনা কৰিছে আৰু এই বহিষ্কৰণৰ আঁৰৰ সঠিক কাৰণসমূহক লৈ প্ৰশ্ন উত্থাপন কৰিছে। এই ঘটনাই আগন্তুক দিনত দলৰ সংখ্যালঘু মৰ্চাৰ ওপৰত কি প্ৰভাৱ পেলায় সেয়া লক্ষ্যণীয় হ'ব।