ৰাম মন্দিৰৰ দান চুৰি প্ৰসংগ; ১৭ আগষ্টত শুনানি গ্ৰহণ কৰিব উচ্চতম ন্যায়ালয়ে

ডিজিটেল ডেস্ক : অযোধ্যাৰ ৰাম মন্দিৰৰ - দান-বৰঙনি চুৰিৰ গোচৰৰ ন্যায়ালয়ৰ নিৰীক্ষণত এছ আই টিৰ (এছ আই টি) তদন্ত বিচাৰি কৰা এলানি আৱেদনৰ শুনানি ১৭ আগষ্টত গ্ৰহণ কৰা হ'ব। সোমবাৰে উচ্চতম ন্যায়ালয়ে এই কথা জনায়। ভাৰতৰ মুখ্য ন্যায়াধীশ সূর্যকান্ত, ন্যায়াধীশ জয়মাল্য বাগচী আৰু ভি মোহনৰ পীঠক এজন অধিবক্তাই জনায় যে উত্তৰ প্ৰদেশ চৰকাৰৰ হৈ উপস্থিত থাকিবলগীয়া ছলিচিটৰ জেনেৰেল তুষাৰ মেহতা এক অনুষ্ঠানৰ বাবে ৰাষ্ট্ৰসংঘলৈ গৈছে। সেয়ে পীঠে এই বিষয়ৰ শুনানি ১৭ আগষ্টলৈ পিছুৱাই দিয়ে। 

উল্লেখযোগ্য যে এই বিষয়ত উচ্চতম ন্যায়ালয়ত তিনিখন আৱেদন দাখিল কৰা হৈছিল। উক্ত তিনিজন আৱেদনকাৰীৰ অন্যতম নৰেন্দ্ৰ কুমাৰ গোস্বামীয়ে অযোধ্যাৰ ৰাম মন্দিৰৰ দান-বৰঙনি চুৰিৰ বিষয়ত কেন্দ্ৰীয় অনুসন্ধান সংস্থাৰ (চি বি আই) তদন্তৰ বাবে অনুৰোধ জনাইছে।

তদুপৰি, ৰাম মন্দিৰৰ কাৰ্য পৰিচালনা কৰা শ্ৰীৰাম জনমভূমি তীৰ্থ ক্ষেত্ৰৰ ন্যাসৰ ধনৰ লেনদেনৰ বিষয়ত ক্রম্পট্ৰলাৰ আৰু অডিটৰ জেনেৰেল (কেগ)-ৰ হিচাপ পৰীক্ষা বিচাৰিছে। একে ব্যৱস্থা বিচাৰি অজয় কুমাৰ ৰায় আৰু দীনেশ কুমাৰ যাদৱেও উচ্চতম ন্যায়ালয়ত আৱেদন দাখিল কৰিছিল। 

আনহাতে আৰ জে ডিৰ সাংসদ সুধাকৰ সিঙে দাখিল কৰা তৃতীয়খন আৱেদনত উচ্চতম ন্যায়ালয়ৰ নিৰীক্ষণত চি বি আইৰ তদন্ত বিচৰাৰ উপৰি মন্দিৰ ন্যাসৰ সমস্ত লেনদেনৰ ফৰেনছিক অডিট (ফৰেনছিক হিচাপ পৰীক্ষা) বিচৰা হৈছে।

উৎস: দৈনিক জনমভূমি