ৰঙামাটিত উদ্ধাৰ বিৰল প্ৰজাতিৰ ‘বেং বগিয়া’ কাছ; আচৰিত ৰূপ দেখি হতবাক ৰাইজ

ডিজিটেল ডেস্ক: ৰঙামাটিৰ গুলুংটেমেৰাত উদ্ধাৰ হৈছে এক বিৰল প্ৰজাতিৰ বিয়াগোম কাছ। দেওবাৰে নিশা ৮.৩০ বজাত এঘৰ মানুহৰ ঢেঁকী জালত এই বিৰল প্ৰজাতিৰ কাছটো উদ্ধাৰ হয়।  

আগতে কাহানিও নেদেখা এনে বিৰল প্ৰজাতিৰ কাছবিধ দেখি স্থানীয় ৰাইজ হতবাক হৈ পৰে। 

দেখিবলৈ আন প্ৰজাতিৰ কাছতকৈ অলপ বেলেগ ধৰণৰ এইবিধ কাছ। সচৰাচৰ সকলোৱে কাছ দেখিছে যদিও এনেকুৱা আঁক বাঁক থকা কাছ সেই অঞ্চলত দেখিবলৈ পোৱা নাই।

ওচৰ চুবুৰীয়াৰ লগত আলোচনা মৰ্মে মানুহঘৰে লৰালৰিকৈ নুমলীগড় বন প্ৰহৰী বিষয়া কাৰ্যালয়ত খবৰ দিয়াত তেওঁলোকে উপস্থিত হৈ সাক্ষী হিচাপে লিখা এখন দিয়ে আৰু কাছটোক লৈ যায়।

বন বিভাগৰ মতে এই কাছবিধৰ নাম বেং বগিয়া আৰু ই এক বিৰল প্ৰজাতিৰ কাছ। সেয়ে সচৰাচৰ এইবিধ কাছ কমকৈ দেখিবলৈ পোৱা যায়। কাছবিধৰ ঠেং কেইখন পাখি সদৃশ আৰু ই জপিয়াইও যাব পাৰে আৰু এই প্ৰজাতিটো অতি খঙাল বুলিও জানিবলৈ দিয়ে বনবিভাগৰ লোকে।